EDITIONS
Asamiya

গৱেষণা ক্ষেত্ৰখনত অসমৰ ছাত্ৰ-ছাত্ৰীৰ বাবে প্ৰচুৰ সম্ভাৱনা কঢ়িয়াই আনিছে এডুপেকডে

26th Feb 2016
Add to
Shares
2
Comments
Share This
Add to
Shares
2
Comments
Share

গৱেষণাৰ ক্ষেত্ৰখনত অসম বহু পিছ পৰি আছে, বিশেষকৈ কাৰিকৰী বিষয়ৰ গৱেষণাৰ বাবে অসমত বিশেষ সুবিধা নাই।ইয়াৰ লগতে বিদেশত গৱেষণা কৰিবলৈ সুবিধা নাপায় অসমৰ মেধাবী ছাত্ৰ-ছাত্ৰীয়ে। আই.আই.টি, এন.আই.টি আদি উচ্চ স্তৰৰ প্ৰতিষ্ঠানৰ স্নাতক, স্নাতকোত্তৰ ডিগ্ৰীধাৰী বহু ছাত্ৰ-ছাত্ৰী সুবিধাৰ অভাৱৰ বাবেই যোগ্য কৰ্মসংস্থাপনৰ পৰা বঞ্চিত হৈছে। অসমত কৰ্মসংস্থাপনৰ ছবিখন আৰু দুখ লগা।নিজৰ বিভাগৰ চাকৰি নাপাই উপাৰ্জনৰ খাতিৰতে যিকোনো ক্ষেত্ৰত কৰ্মসংস্থাপন লৈ হতাশাত ভুগে এইসকল মেধাৱী ছাত্ৰ-ছাত্ৰী।কিন্তু এই সমস্যাৰ সমাধানৰ কথা চিন্তা কৰিছিল শিলচৰ এন.আই.টি.ত পঢ়ি থকা ইঞ্জিনিয়াৰিঙৰ এজন ছাত্ৰই।অসমৰ ছাত্ৰ-ছাত্ৰী সকলে যাতে বিশ্বৰ আগশাৰীৰ বিশ্ববিদ্যালয়ত গৱেষণাৰ সুবিধা লাভ কৰে,সেই উদ্দেশ্য আগত ৰাখি তেইশ বছৰীয়া উদ্যমী ল'ৰা জনে নিজা প্ৰচেষ্টাত অসমত আৰম্ভ কৰিলে Edupacked নামৰ শৈক্ষিক প্ৰতিষ্ঠান। এই বছৰৰ মে মাহত এডুপেকডৰ ফালৰ পৰা প্ৰথম বাৰৰ বাবে অসমকে ধৰি উত্তৰ-পূৰ্বাঞ্চলৰ ওঠৰ জনীয়া ছাত্ৰ-ছাত্ৰীৰ দল বিশ্বৰ বিভিন্ন ঠাইৰ আগশাৰীৰ বিশ্ববিদ্যালয়ত গৱেষণাৰ বাবে পঠিওৱা হ'ব।

image



এডুপেকডৰ জন্ম আৰু উদ্দেশ্য

এডুপেকডৰ জন্মদাতা যোৰহাটৰ প্ৰকাশ কুমাৰ সিঙ। প্ৰকাশ সিঙে শিলচৰ এন.আই.টি.ত মেকানিকেল ইঞ্জিনিয়াৰিঙৰ ডিগ্ৰী লৈ ইউ.কে.ৰ নৰ্থাম্বিয়া বিশ্ববিদ্যালয়ত গৱেষণা কৰিছিল। পৰৱৰ্তী সময়ত গোৱাৰ Vedanta Limited নামৰ কম্পেনিত তিনি মাহ চাকৰি কৰি তেওঁ অসমলৈ আহি যোৰহাটত এডুপেকড স্থাপন কৰে। এন.আই.টি.ত তৃতীয় বৰ্ষ পঢ়ি থাকোতে তেওঁ বিদেশত ইন্টাৰ্নশ্বিপৰ বাবে যথেষ্ট কষ্ট কৰিবলগীয়া হৈছিল। তেওঁ কয়-'ইন্টাৰ্নশ্বিপৰ বাবে ২০০০ টা মেইল পঠিওৱাৰ পিচত সুবিধা পাইছিলো। তেতিয়া অনুভৱ কৰিছিলো যে অসমৰ ছাত্ৰ-ছাত্ৰী সকলে বিদেশত গৱেষণাৰ বাবে সুবিধা নাপায়। অসমত ৰিচাৰ্চৰ স্কপ নাই। ৰিচাৰ্চ ফিল্ডত একো এক্সপ'জাৰ নাপায়। বহুতে ডিগ্ৰী লৈ বহি আছে। সেয়ে মই অসমত গ্ল'বেল ৰিচাৰ্চ কম্পেনি আৰম্ভ কৰাৰ কথা চিন্তা কৰি ২০১৫ চনৰ আগষ্টত www.edupacked.com নামৰ ৱেবছাইট আৰম্ভ কৰিলো।'


'অসমৰ দৰে ঠাইত ৰিচাৰ্চ কম্পেনী এটা আৰম্ভ কৰাটো একপ্ৰকাৰৰ প্ৰত্যাহ্বান। প্ৰথমে বহু কষ্ট হৈছিল। আই.আই.টি, এন.আই.টি আদি প্ৰতিষ্ঠান সমূহলৈ গৈ এডভাৰটাইজ, ভিডিঅ' কনফাৰেন্স আদি কৰি ছাত্ৰ-ছাত্ৰী সকলক বুজাবলগীয়া হৈছিল। আনহাতে ফেলশ্বিপ ফাণ্ডিঙৰ বাবে আগশাৰীৰ কোম্পানিৰ লগত যোগাযোগ কৰিছিলো। জানুৱাৰী মাহত পাঁচজন ৰিচৰ্চ পাৰ্চন লৈ যোৰহাটত এটা কাৰ্যালয় আৰম্ভ কৰিলো। এন.আই.টি শিলচৰ, এন.আই.টি আগৰতলা, এন.আই.টি মেঘালয়, আই,আই,টি.গুৱাহাটী আদি প্ৰতিষ্ঠানত কেম্পাচ ইন্টাৰভিউ আৰু আমাৰ বিশেষ নিৰ্বাচন প্ৰক্ৰিয়াৰে ১৮ জন ছাত্ৰ-ছাত্ৰী নিৰ্বাচন কৰি অহা মে মাহত প্ৰথমটো দল গৱেষণাৰ বাবে বিদেশলৈ পঠিয়াম।'


উল্লেখযোগ্য যে, প্ৰথম পৰ্যায়ত এডুপেকডে Curtin University Malaysia, Curtin University Perth, University of Leeds, The University of Edinburgh School of Engineering, University of New Hampshire, Northumbia University ৰ লগত যোগাযোগ কৰি গৱেষণাৰ বাবে ছাত্ৰ-ছাত্ৰী পঠিওৱাৰ ব্যৱস্থা কৰিছে।পৰৱৰ্তী সময়ত আমেৰিকা যুক্তৰাষ্ট্ৰ, যুক্তৰাজ্য, অষ্ট্ৰেলিয়া, মালায়েছিয়া, ছিঙ্গাপুৰ, ইটালি, নিউজিলেণ্ড, এথেন্স আদিৰ আগশাৰীৰ বিশ্ববিদ্যালয়লৈ গৱেষণাৰ দল পঠিয়াওৱাৰ লক্ষ্য আগত ৰাখিছে। লিখিত পৰীক্ষা, ভাইভা আদি প্ৰক্ৰিয়াৰে নিৰ্বাচিত মেধাবী ছাত্ৰ-ছাত্ৰী সকলক ৪৫ দিনীয়া গৱেষণাৰ বাবে ৩.২ লাখ টকা আৰু অহা যোৱাৰ খৰচ বহন কৰিব এডুপেকডে। গৱেষণাত ভাল ফল দেখুওৱা ছাত্ৰ-ছাত্ৰী সকলে বিদেশৰ বিশ্ববিদ্যালয়ৰ লগতে বিভিন্ন প্ৰান্তৰ অট'ম'বাইল কম্পেনিত কৰ্মসংস্থাপনৰ সুবিধা লাভ কৰিব।

এডুপেকডৰ টীম

এডুপেকডৰ প্ৰতিষ্ঠাপক আৰু মুখ্য নিয়োগ বিষয়া হিচাপে আছে প্ৰকাশ কুমাৰ সিঙ, সভাপতি আৰু সঞ্চালক প্ৰধানৰ দায়িত্বত আছে ৰাজীৱ সিঙ, গৱেষণা, কাউন্সিলিঙ আদিৰ বাবে এডিনবাৰ্গ বিশ্ববিদ্যালয়ৰ অধ্যাপক গেৰেথ হাৰিছন, হাৰ্ভাড বিশ্ববিদ্যালয়ৰ অধ্যাপক ৰবাৰ্ট জে উড, হেৰিয়ট ৱাট বিশ্ববিদ্যালয়ৰ অধ্যাপক য়াও চু লী,অষ্ট্ৰেলিয়াৰ স্কুল অৱ মেকানিকেল এণ্ড মেনুফেকচাৰিঙ ইঞ্জিনিয়াৰিঙ বিভাগৰ অধ্যাপক ড. ৰবাৰ্ট টেইলৰ, ৰবাৰ্ট গৰ্ডন বিশ্ববিদ্যালয়ৰ ড. জেমচ, অষ্ট্ৰেলিয়াৰ কাৰ্টিন বিশ্ববিদ্যালয়ৰ ইয়ান হাওৱাৰ্ডকে ধৰি ভিজিটিঙ ৰিচাৰ্চ এছচিয়েট এণ্ড পাৰ্টনাৰ হিচাপে বিশ্বৰ আগশাৰীৰ বিশ্ববিদ্যালয়ৰ অধ্যাপক সকল জড়িত আছে।

image



এডুপেকডে ইঞ্জিনিয়াৰিঙ বিভাগৰ ছাত্ৰ-ছাত্ৰী সকলৰ উচ্চ শিক্ষা আৰু আগশাৰীৰ প্ৰতিষ্ঠানত কৰ্মসংস্থাপনৰ উদ্দেশ্য আগত ৰাখিছে। প্ৰথমে এন.আই.টি., আই.আই.টি. আদি প্ৰতিষ্ঠানৰ ছাত্ৰ-ছাত্ৰীসকলক গৱেষণাৰ সুবিধা প্ৰদান কৰাৰ লগতে পৰৱৰ্তী সময়ত অসম ইঞ্জিনিয়াৰিঙ কলেজ, গুৱাহাটী ইঞ্জিনিয়াৰিঙ কলেজ আৰু আগশাৰীৰ ব্যক্তিগত প্ৰতিষ্ঠানৰ ছাত্ৰ-ছাত্ৰীক গৱেষণাৰ সুবিধা প্ৰদান কৰিব।

বৰ্তমান যোৰহাটত কাৰ্যালয় স্থাপনৰ লগতে ডিব্ৰুগড়, গোলাঘাট, গুৱাহাটীৰ পিছত সমগ্ৰ ভাৰতবৰ্ষতে কাৰ্যালয় স্থাপন কৰিব।এনেদৰেও অসমৰ বহু লৰা-ছোৱালীয়ে কৰ্মসংস্থাপন লাভ কৰিব বুলি প্ৰকাশ সিঙে জানিবলৈ দিয়ে।'আমি ইঞ্জিনিয়াৰিঙ আৰু মেনেজমেন্ট বেকগ্ৰাউণ্ডৰ ল'ৰা-ছোৱালীক কৰ্মসংস্থাপন দিম। মাৰ্চ মাহৰ পৰা আমাৰ নিয়োগ প্ৰক্ৰিয়া আৰম্ভ হব। ইয়াৰ বাবে অসমৰ প্ৰায়বোৰ কাকততে আমি বিজ্ঞাপন দিম।'

ৰিনিৱেবল এনাৰ্জী লেব

গৱেষণা আৰু কৰ্মসংস্থাপনৰ লগতে এডুপেকডে এই দুই ক্ষেত্ৰতে প্ৰচুৰ সম্ভাৱনাৰ প্ৰতি লক্ষ্য ৰাখি 'নৰ্থ ইষ্টাৰ্ন ৰিনিৱেবল এনাৰ্জী লেব' স্থাপনৰ উদ্যোগ হাতত লৈছে। বিশ্বৰ বিভিন্ন ৰিনিৱেবল এনাৰ্জী লেবৰ সৈতে সহযোগী হিচাপে এই লেবত ৰিনিৱেবল এনাৰ্জীৰ ক্ষেত্ৰত বিভিন্ন গৱেষণা কাৰ্য হ'ব যি গৱেষণাই শক্তি ক্ষেত্ৰত বিভিন্ন অৱদান আগবঢ়াব পাৰিব। ইয়াৰ লগতে এই ক্ষেত্ৰৰ প্ৰতি আগ্ৰহী ছাত্ৰ-ছাত্ৰী সকলে অসমতে থাকি গৱেষণা কাৰ্য কৰিব পাৰিব।


'যোৰহাটৰ টোকোলাই চাহ গৱেষণা কেন্দ্ৰ আৰু উত্তৰ-পূব বিজ্ঞান আৰু প্ৰযুক্তি কেন্দ্ৰ (NEIST, Jorhat)ৰ সৈতে লগলাগি কিছুমান গৱেষণাৰ বাবে ছাত্ৰ-ছাত্ৰী নিয়োগ কৰিম।আনহাতে মে' মাহৰ পিছত আমি এটা এক্সচেঞ্জ প্ৰগ্ৰেম কৰিব বিচাৰোঁ।অসমৰ ছাত্ৰ-ছাত্ৰী বিদেশত গৱেষণাৰ বাবে যোৱাৰ লগতে অষ্ট্ৰেলিয়া আৰু নিউজিলেণ্ডৰ পৰা ছাত্ৰ-ছাত্ৰী অসমত গৱেষণাৰ বাবে আনিম। ইয়াৰ লগতে এপ্ৰিলৰ পৰা আৰম্ভ হবলগীয়া ষ্টাৰ্ট আপ ইণ্ডিয়া আঁচনিৰ সৈতে আমাৰ কম্পেনি পঞ্জীয়ন কৰিম।' প্ৰকাশ কুমাৰ সিঙে ভৱিষ্যত পৰিকল্পনা সম্পৰ্কে এনেদৰে মন্তব্য কৰে।

অসমৰ ছাত্ৰ-ছাত্ৰী সকলক গৱেষণা ক্ষেত্ৰখনৰ প্ৰতি আগ্ৰহী কৰি উৎকৃষ্ট মানৱ সম্পদ গঢ়াৰ লগতে কৰ্মসংস্থাপনৰ বিভিন্ন বাট মুকলি কৰাৰ লক্ষ্য আগত লৈ আগবঢ়া এডুপেকডৰ এই ব্যতিক্ৰমী অভিযানে অসমৰ কাৰিকৰী ক্ষেত্ৰত জাগৰণ অনাই নহয়,অসম তথা উত্তৰ-পূৰ্বাঞ্চলৰ সমৃদ্ধিৰ ক্ষেত্ৰত নিশ্চিতভাৱে এক গুৰুত্বপূৰ্ণ ভূমিকা গ্ৰহণ কৰিব।

এনেকুৱা আৰু কাহিনীৰ বাবে আমাৰ ফেচবুক পেজ লাইক কৰক

আপুনি ভাল পাব পৰা অন্যান্য কাহিনী

অৱশেষত চৰকাৰে নিৰ্ধাৰণ কৰিলে ষ্টাৰ্টআপৰ সংজ্ঞা

ঘৰে ঘৰে মুৰ্গী মাংসৰ সোৱাদ দিবলৈ দীপ বৰাৰ 'চিকেন ভান'

এটা ধানৰ পৰা ক’লা ধানৰ বিপ্লৱ অনা গোৱালপাৰাৰ কৃষক উপেন্দ্ৰ ৰাভা

হিংসা বিয়পোৱা বন্ধ কৰক


Add to
Shares
2
Comments
Share This
Add to
Shares
2
Comments
Share
Report an issue
Authors

Related Tags

Latest Stories

Sign up for our Daily Newsletter