கல்யாணம் நடத்த ரூ.15 லட்சம்; கடை வாடகை ரூ.40 லட்சம் - ‘ஜியோ வேர்ல்ட் பிளாசா’ பற்றி தெரியுமா?

ரிலையன்ஸ் இண்டஸ்ட்ரீஸ் தலைவர் முகேஷ் அம்பானி பாந்த்ராவின் குர்லா காம்ப்ளக்ஸ் பகுதியில் கட்டப்பட்டுள்ள, மும்பை மாநகரின் மிகப்பெரிய வணிக வளாகமான 'ஜியோ வேர்ல்ட் பிளாசா'வின் வாடகை பற்றிய விவரங்கள் கேட்டாலே தலை சுற்ற வைக்கின்றன.

7,50,000 சதுர அடி பரப்பளவில், ஜியோ வேர்ல்ட் பிளாசாவில் 66 சொகுசு பிராண்ட் நிறுவனங்கள் தங்கள் கடைகளை அமைத்துள்ளன. மும்பையில் இணையற்ற சொகுசு ஷாப்பிங் அனுபவத்தை வழங்கும் நோக்கத்துடன் இந்த பிளாசா வடிவமைக்கப்பட்டுள்ளது. இது தனிப்பட்ட ஷாப்பிங் உதவி, மல்டிபிளக்ஸ் தியேட்டர் மற்றும் ஃபுட் எம்போரியம் போன்ற சேவைகளைக் கொண்டுள்ளது.

இந்த மாலில் லூயிஸ் உட்டன், குஸ்ஸி, பர்பெர்ரி, வாலண்டினோ, டியோர், பாலென்சியாகா, ரோலக்ஸ், போட்டேகா வெனெட்டா, கார்டியர், பல்கேரி, ஜிம்மி சூ போன்ற பிராண்டுகளின் ஷோரூம்கள் அமைக்கப்பட்டுள்ளன.

மணீஷ் மல்ஹோத்ரா, ராகுல் மிஸ்ரா, ஃபால்குனி மற்றும் ஷேன் மற்றும் அபு ஜானி-சந்தீப் கோஸ்லா உட்பட பல புகழ்பெற்ற ஆடை வடிவமைப்பாளர்களும் தங்கள் படைப்புகளை ஜியோ வேர்ல்ட் பிளாசாவில் காட்சிப்படுத்தியுள்ளனர்.

இதையெல்லாம் விட ஸ்பெஷல் ஐயிட்டம் ஒண்ணு இருக்கு என்பது போல்... ஒவ்வொரு பிராண்ட் ஷோரூம்களின் வாடகையை கேட்டு தான் நெட்டிசன்கள் அதிர்ச்சியில் உள்ளனர்.

மாதம் ரூ.40 லட்சம் வாடகை:

உலகின் இரண்டாவது பெரிய பணக்காரரான பெர்னார்ட் அர்னால்ட் என்பவருக்குச் சொந்தமான லூயிஸ் உட்டன் ஸ்டோர் இந்த மெகா மாலில் அமைந்துள்ளது. இந்தக் கடைக்கு லூயிஸ் உட்டன் ரூ.40 லட்சம் வாடகை செலுத்த ஒப்பந்தம் செய்யப்பட்டுள்ளதாகத் தெரிவிக்கப்படுகிறது. இதுதான் இந்தியாவிலேயே மிகப்பெரிய லூயிஸ் உட்டன் ஷோரூம் எனக்கூறப்படுகிறது. அதனால் தான் வாடகை அதிகமாம்.

ஜியோ வேர்ல்ட் பிளாசாவில் 7,365 சதுர அடி பரப்பளவில் ஷோரூம் அமைந்துள்ளது. குத்தகை மொத்தம் 9.5 ஆண்டுகளுக்கு என்று தெரிகிறது. 36 மாதங்களுக்கு ஒருமுறை வாடகை 15 சதவீதம் அதிகரிக்கும். இந்த ஒப்பந்தம் ஆகஸ்ட் 21, 2023 அன்று முடிவடைந்ததாக கூறப்படுகிறது.

மற்றொரு சொகுசு பிராண்டான டியோர் ஸ்டோர் ஜியோ வேர்ல்ட் பிளாசாவில் அமைக்கப்பட்டுள்ளது. இந்த டியோர் பிராண்ட் கடையும் ரூ.21 லட்சம் வாடகையாக வழங்குகிறது. டெபாசிட் தொகையாக மட்டும் ரூ. 1.39 கோடி செலுத்தப்பட்டுள்ளதாக கூறப்படுகிறது.

மேலும், சொகுசு பிராண்டுகள் தங்கள் மாதாந்திர வருவாயில் ஒரு பகுதியை ரிலையன்ஸுடன் பகிர்ந்து கொள்ளும் எனக்கூறப்படுகிறது. ராய்ட்டர்ஸ் அறிக்கையின்படி, தங்களது மொத்த வருவாயில் 4% முதல் 12% வரை பங்களிப்புகள் இருக்கும் எனக்குறிப்பிடப்பட்டுள்ளது.

திருமணம் நடத்த எவ்வளவு வாடகை?

மும்பையில் அனைத்து பணக்காரர்களின் திருமணங்கள் மற்றும் நிகழ்வுகளுக்கு ஜியோ கார்டன் மிகவும் பிடித்த இடமாக மாறியுள்ளது. முகேஷ் அம்பானியின் மகன் ஆகாஷ் அம்பானிக்கும், ஷ்லோகா மேத்தாவுக்கும் இந்த ஆடம்பர கார்டனில் தான் திருமணம் நடைபெற்றது.

ஜியோ வேர்ல்ட் பிளாசா இந்தியாவின் மிக விலையுயர்ந்த மால் ஆக மாறியுள்ளது. பிராண்ட் ஷோரூம்கள், விஐபி வரவேற்பு, திருமண வரவேற்பு மற்றும் போர்ட்டர் சேவையும் இந்த பிளாசாவில் கிடைக்கும்.

ஜியோ வேர்ல்ட் சென்டரின் அதிகாரப்பூர்வ வலைத்தளத்தின்படி, முழு மாலிலும் வைஃபை வசதியுள்ளது. இங்கு ஒரே நேரத்தில் 2,000 கார்கள் மற்றும் SUV-க்கள் நிறுத்தக்கூடிய பார்க்கிங் வசதியுள்ளது.

இந்த இடத்தை ஒரு நாள் வாடகைக்கு எடுக்க செலவுகள் தவிர்த்து, 15 லட்சம் ரூபாய் எனக்கூறப்படுகிறது. இருப்பினும், பார்வையாளர்கள் நிகழ்ச்சிகள் இல்லாத நாட்களில் சுற்றிப்பார்க்க 10 ரூபாய் கட்டணம் வசூலிக்கப்படுகிறது.

1215 people loved this story

---

ரூ.150 கோடி சொகுசு பங்களா; ரத்தன் டாடா வீட்டில் உள்ள வசதிகள் என்னென்ன தெரியுமா?