AI தேவை அதிகரிப்பால் வலுவான காலாண்டு - பெரிய முதலீட்டு திட்டத்தில் Alphabet நிறுவனம்!
நிறுவனத்தின் முதலாம் காலாண்டு நிகர லாபம் ஆண்டு அடிப்படையில் 81% உயர்ந்து $62.6 பில்லியனாக உயர்ந்துள்ளது. கடந்த ஆண்டின் இதே காலக்கட்டத்தில் இது $34.5 பில்லியனாக இருந்தது.
Alphabet Inc. நிறுவனம் 2026 ஆம் ஆண்டின் முதல் காலாண்டில் வலுவான நிதி செயல்திறனை பதிவு செய்துள்ளது. சுந்தர் பிச்சைக் கூறுகையில், “2026 ஆம் ஆண்டு சிறப்பான தொடக்கம்” எனக் குறிப்பிட்டுள்ளார்.
நிறுவனத்தின் முதலாம் காலாண்டு நிகர லாபம் ஆண்டு அடிப்படையில் 81% உயர்ந்து $62.6 பில்லியனாக உயர்ந்துள்ளது. கடந்த ஆண்டின் இதே காலக்கட்டத்தில் இது $34.5 பில்லியனாக இருந்தது. இதில் $36.9 பில்லியன் அளவிலான பங்கு முதலீட்டு லாபமும் அடங்கும்.
வருவாய் 22% உயர்ந்து $109.9 பில்லியனாக உயர்ந்துள்ளது. இது தொடர்ச்சியாக 11வது காலாண்டாக இரட்டை இலக்க வளர்ச்சியை பதிவு செய்துள்ளது.
கிளவுட் வளர்ச்சி வேகம்
Google Cloud பிரிவு வலுவான வளர்ச்சியைத் தொடர்ந்து பதிவு செய்துள்ளது. கிளவுட் வருவாய் 63% உயர்ந்து $20 பில்லியனாக உயர்ந்துள்ளது. செயல்பாட்டு வருமானம் $6.6 பில்லியனாக உயர்ந்து 32.9% வளர்ச்சி கண்டுள்ளது.
AI சேவைகளுக்கான தேவை அதிகரித்துள்ளதால், கிளவுட் வளர்ச்சிக்கு இது முக்கிய காரணமாக உள்ளது.
“எங்கள் AI தீர்வுகள் இப்போது கிளவுட் வளர்ச்சியின் முக்கிய இயக்கியாக மாறியுள்ளது” என்று பிச்சை தெரிவித்தார்.
Gemini Enterprise பயன்பாட்டில் கட்டண பயனர்கள் காலாண்டு அடிப்படையில் 40% உயர்ந்துள்ளனர். API வழியாக நிமிடத்திற்கு 16 பில்லியன் டோக்கன்கள் செயலாக்கப்படுகின்றன.
முதலீடு அதிகரிப்பு
AI தேவையால் கணினி வளங்களில் தட்டுப்பாடு இருப்பதாக நிறுவனம் தெரிவித்துள்ளது. இதனால் முதலீட்டை அதிகரிக்க முடிவு செய்துள்ளது.
முதல் காலாண்டில் மூலதன செலவு $35.7 பில்லியனாக இருந்து, 107% உயர்ந்துள்ளது. இதில் 60% சர்வர்கள் மற்றும் 40% டேட்டா சென்டர்கள் மற்றும் நெட்வொர்க் உபகரணங்களுக்கு செலவிடப்பட்டுள்ளது.
2026 முழு ஆண்டிற்கான மூலதனச் செலவின வழிகாட்டி $180–190 பில்லியனாக உயர்த்தப்பட்டுள்ளது. 2027-இல் இது மேலும் அதிகரிக்கும் என எதிர்பார்க்கப்படுகிறது.
Tensor Processing Unit (TPU) என்ற AI சிப் தொழில்நுட்பத்தின் 8-வது தலைமுறையை நிறுவனம் அறிமுகப்படுத்தியுள்ளது. இது முன்பு கிளவுட் வழியாக மட்டுமே கிடைத்த நிலையில், தற்போது சில வாடிக்கையாளர்களின் டேட்டா சென்டர்களிலும் வழங்க திட்டமிடப்பட்டுள்ளது.
Alphabet நிறுவனத்தின் பெரும்பாலான வருவாய் இன்னும் விளம்பரங்களிலிருந்து வருகிறது. மொத்த விளம்பர வருவாய் 15.5% உயர்ந்து $77.3 பில்லியனாக உள்ளது.
Google Search வருவாய் 19% உயர்ந்து $60.4 பில்லியனாக உயர்ந்துள்ளது. YouTube விளம்பர வருவாய் 11% உயர்ந்து $9.9 பில்லியனாக உள்ளது.
Other Bets இழப்பு
Waymo போன்ற திட்டங்களை உள்ளடக்கிய “Other Bets” பிரிவின் வருவாய் $411 மில்லியனாக குறைந்துள்ளது. இந்த பிரிவு $2.1 பில்லியன் இழப்பை பதிவு செய்துள்ளது.
2026 மார்ச் 31 நிலவரப்படி, Alphabet நிறுவனத்தின் பணியாளர் எண்ணிக்கை 1,94,668 ஆக உயர்ந்துள்ளது.
AI மற்றும் கிளவுட் துறைகளில் வளர்ச்சி தொடரும் நிலையில், நிறுவனம் முக்கிய முதலீடுகளை அதிகரித்து, எதிர்கால வளர்ச்சியை பிடிக்க முயற்சி மேற்கொண்டு வருகிறது.