iPhone Duo அறிமுகம்: மடிக்கக்கூடிய மொபைல் போன் யுகத்தில் ஐபோன் ஆப்பிள்!

ஆப்பிள் நிறுவனம் தனது முதல் மடிக்கக்கூடிய ஸ்மார்ட்போனான iPhone Duo-வை அறிமுகப்படுத்தியுள்ளது. இதன் மூலம் தனது வன்பொருள் தயாரிப்புகளின் வரிசையில் ஆப்பிள் புதிய அத்தியாயத்தைத் தொடங்கியுள்ளது. உலகம் முழுவதும் உள்ள ஐபோன் பயனர்களுக்கு, பாக்கெட்டில் வைத்துச் செல்லக்கூடிய வடிவத்தில் பெரிய திரை அனுபவத்தை வழங்கும் முயற்சியாக இந்த புதிய மாடல் அமைந்துள்ளது.

மடிக்கக்கூடிய புதிய ஃபிளாக்ஷிப் மாடலுடன், வழக்கமான உயர்நிலை ஸ்மார்ட்போன்களான iPhone 18 Pro மற்றும் iPhone 18 Pro Max ஆகியவற்றையும் ஆப்பிள் அறிமுகப்படுத்தியுள்ளது. இவற்றில் மாறுபடும் அபர்ச்சர் கொண்ட கேமரா ஆப்டிக்ஸ், மேம்படுத்தப்பட்ட வெப்பக் கட்டுப்பாட்டு அமைப்பு மற்றும் 2 நானோமீட்டர் தொழில்நுட்பத்தில் உருவாக்கப்பட்ட சிப் ஆகியவை இடம்பெற்றுள்ளன.

Samsung, Google, Huawei உள்ளிட்ட நிறுவனங்கள் ஏற்கெனவே மடிக்கக்கூடிய ஸ்மார்ட்போன்களின் நெகிழ்வான திரை மற்றும் கீல் தொழில்நுட்பங்களை மேம்படுத்தி வரும் நிலையில், iPhone Duo மூலம் ஆப்பிளும் இந்த வளர்ந்து வரும் சந்தையில் களமிறங்கியுள்ளது.

வலுவான கட்டமைப்பு பொறியியலையும், அதற்கேற்ற மென்பொருள் வசதிகளையும் ஒருங்கிணைத்து, பல்பணி, மீடியா பயன்பாடு மற்றும் மொபைல் உற்பத்தித்திறன் ஆகியவற்றில் புதிய அனுபவத்தை உருவாக்க ஆப்பிள் முயன்றுள்ளது.

பொறியியல், திரை மற்றும் வடிவமைப்பு

புதிய பொறியியல் கட்டமைப்பை அடிப்படையாகக் கொண்ட iPhone Duo, Grade 5 டைட்டானியம் சேஸிஸ், கண்ணாடி போன்ற பளபளப்பான மேற்பரப்பு மற்றும் 3D பிரிண்ட் செய்யப்பட்ட கீல் கவர் ஆகியவற்றைக் கொண்டுள்ளது. கீல் கவரில் மைக்ரோ-பிளாஸ்டட் மேற்பரப்பு பயன்படுத்தப்பட்டுள்ளது.

இதன் பின்புறத்தில் செராமிக் ஷீல்ட் பேனலும், முன்புறத்தில் Ceramic Shield 2 திரையும் வழங்கப்பட்டுள்ளன. முந்தைய தலைமுறை மாடல்களுடன் ஒப்பிடும்போது, புதிய முன்புறத் திரை மூன்று மடங்கு அதிக கீறல் எதிர்ப்பைக் கொண்டிருப்பதாக ஆப்பிள் தெரிவித்துள்ளது. மேலும், IP68 தரச் சான்றுடன் வரும் இந்த போன் தூசிக்கு முழுமையான பாதுகாப்பையும், 6 மீட்டர் ஆழம் வரையிலான தண்ணீரில் 30 நிமிடங்கள் வரை நீடிக்கும் நீர்ப்புகா பாதுகாப்பையும் கொண்டுள்ளது.

மடிப்பு கீலில் 100-க்கும் மேற்பட்ட தனித்தனி பாகங்கள் இடம்பெற்றுள்ளன. இவை திரையின் மையப் பகுதியைத் தாங்குவதுடன், போனை மடிக்கும்போது உருவாகும் அழுத்தத்தைக் குறைக்கும் வகையில் வடிவமைக்கப்பட்டுள்ளன.

iPhone Duo-வை விரித்தால் 7.6 இன்ச் Super Retina XDR உள்திரை கிடைக்கிறது. இதில் பிரதிபலிப்பைக் குறைப்பதற்கும், மடிப்பு கோடு அதிகமாகத் தெரியாமல் செய்வதற்கும் மேட் nano-texture coating பயன்படுத்தப்பட்டுள்ளது. போனை மடித்த நிலையில் பயன்படுத்தும்போது 5.4 இன்ச் வெளிப்புறத் திரை கிடைக்கிறது. இது iPhone 18 Pro வழங்கும் திரைப் பரப்பளவில் 90 சதவீதத்தைக் கொண்டுள்ளது.

இரு திரைகளிலும் ProMotion தொழில்நுட்பம், Always On வசதி மற்றும் வெளிப்புறத்தில் அதிகபட்சமாக 3,000 nits பிரகாசம் ஆகியவை இடம்பெற்றுள்ளன. Apple Pencil-ஐ USB-C மூலம் பயன்படுத்தும் வசதி இந்த ஆண்டின் பிற்பகுதியில் வழங்கப்படும் என்றும் ஆப்பிள் தெரிவித்துள்ளது.

புதிய மடிக்கக்கூடிய ஐபோனின் முக்கியத்துவத்தை விளக்கிய ஆப்பிள் தலைமைச் செயல் அதிகாரி ஜான் டெர்னஸ்,

“முதல் ஐபோன் அறிமுகமானதிலிருந்து iPhone Duo தான் ஐபோனில் ஏற்பட்டுள்ள மிகப்பெரிய மாற்றம். முற்றிலும் புதிய வடிவமைப்புடனும், எளிதாகப் பயன்படுத்தக்கூடிய அனுபவங்களுடனும், வன்பொருளையும் மென்பொருளையும் ஒன்றிணைத்து வடிவமைத்தால் என்ன செய்ய முடியும் என்பதை இது காட்டுகிறது. மடிக்கக்கூடிய போனைப் பயன்படுத்துவதன் அர்த்தத்தையே இது மாற்றுகிறது,” என்றார்.

கேமரா புதுமைகள் மற்றும் புதிய மென்பொருள் அனுபவம்

புகைப்படத் திறனில், iPhone Duo-வில் 48MP Fusion Main கேமரா, 2x ஆப்டிக்கல் Telephoto லென்ஸ், 48MP Fusion Ultra Wide கேமரா, Center Stage முன்புறக் கேமரா மற்றும் திரைக்குள் பொருத்தப்பட்ட FaceTime கேமரா ஆகியவை இடம்பெற்றுள்ளன.

மடிக்கக்கூடிய வடிவமைப்பை பயன்படுத்தி புதிய வகையான புகைப்பட அனுபவங்களையும் ஆப்பிள் உருவாக்கியுள்ளது. Smart Take எனப்படும் வசதி, சாதனத்திலேயே இயங்கும் செயற்கை நுண்ணறிவைப் பயன்படுத்தி காட்சிகளை நிகழ்நேரத்தில் பகுப்பாய்வு செய்து, புகைப்படம் எடுக்க வேண்டிய தருணத்தில் தானாகவே shutter-ஐ இயக்குகிறது.

வெளிப்புறத் திரையைப் பயன்படுத்தி புகைப்படம் எடுக்க உதவும் Duo Preview, குழந்தைகளின் கவனத்தை ஈர்க்க அனிமேஷன்களைக் காட்டும் Kid Cue மற்றும் பலர் இணைந்து வீடியோ அழைப்பில் பங்கேற்க உதவும் Duo FaceTime போன்ற வசதிகளும் வழங்கப்பட்டுள்ளன.

iPhone Duo, iOS 27 இயங்குதளத்தில் செயல்படுகிறது. பெரிய திரையின் செங்குத்துப் பரப்பை முழுமையாகப் பயன்படுத்தும் வகையில் Lock Screen கட்டுப்பாடுகள் மற்றும் Dock ஆகியவை மாற்றியமைக்கப்பட்டுள்ளன. முதன்முறையாக ஐபோனில் Split View வசதி வழங்கப்பட்டுள்ளது. இதன் மூலம் இரண்டு செயலிகளை ஒரே நேரத்தில் அருகருகே இயக்க முடியும்.

இந்த போனுக்கு A20 Pro சிப் சக்தியளிக்கிறது. 2 நானோமீட்டர் உற்பத்தித் தொழில்நுட்பத்தில் உருவாக்கப்பட்ட இந்த சிப்புடன் தனிப்பயன் vapour chamber வெப்பக் கட்டுப்பாட்டு அமைப்பும் இணைக்கப்பட்டுள்ளது. சீல் செய்யப்பட்ட திரவக் குளிரூட்டும் அமைப்பாக செயல்படும் இது, சாதனத்தில் உருவாகும் வெப்பத்தை வெளியேற்றுகிறது.

இரட்டை பேட்டரி அமைப்பைக் கொண்ட iPhone Duo, உள்திரையில் 31 மணி நேரம் வரையிலும், வெளிப்புறத் திரையில் 44 மணி நேரம் வரையிலும், இரு திரைகளையும் சம அளவில் பயன்படுத்தும்போது 24 மணி நேரம் வரையிலும் வீடியோ இயக்கத்தை வழங்கும் என ஆப்பிள் தெரிவித்துள்ளது.

மடிக்கக்கூடிய வடிவமைப்பின் உற்பத்தித்திறன் அம்சங்களைச் சுட்டிக்காட்டிய டெர்னஸ்,

“பாக்கெட்டில் எளிதாக வைத்துச் செல்லக்கூடிய அளவில் ஐபோன் வரலாற்றிலேயே மிகப்பெரிய திரையுடன், A20 Pro சிப்பின் சக்தியையும் இணைத்துள்ள iPhone Duo, நீங்கள் எங்கிருந்தாலும் அதிக கவனத்துடனும் உற்பத்தித்திறனுடனும் செயல்பட உதவுகிறது. உள்ளடக்கங்களை ரசிப்பது, பல செயலிகளில் ஒரே நேரத்தில் பணியாற்றுவது அல்லது கேமிங் செய்வது என உங்கள் அனுபவத்தை இது மேம்படுத்துகிறது” என்றார்.

iPhone 18 Pro வரிசை

இதனுடன் iPhone 18 Pro மற்றும் iPhone 18 Pro Max மாடல்களையும் ஆப்பிள் அறிமுகப்படுத்தியுள்ளது. இதன் மூலம் வழக்கமான ஃபிளாக்ஷிப் ஐபோன் வரிசையையும் நிறுவனம் தொடர்ந்து வலுப்படுத்தியுள்ளது.

Pro மாடல்களில் 48MP Fusion Main கேமரா இடம்பெற்றுள்ளது. இதில் ஆறு லேசர் மூலம் வெட்டப்பட்ட பிளேடுகளைக் கொண்ட மாறுபடும் அபர்ச்சர் அமைப்பு வழங்கப்பட்டுள்ளது. இதன் மூலம் லென்ஸுக்குள் நுழையும் ஒளியின் அளவையும், புகைப்படத்தில் தெளிவாகத் தோன்றும் ஆழத்தையும் கட்டுப்படுத்த முடியும். இந்த அமைப்பை தானியங்கி முறையிலோ அல்லது பயனர் விரும்பியபடியோ நான்கு வெவ்வேறு நிலைகளில் பயன்படுத்தலாம்.

புகைப்படங்களின் உண்மைத்தன்மையை உறுதி செய்யும் நோக்கில் Apple Reference Image என்ற புதிய வசதியையும் ஆப்பிள் அறிமுகப்படுத்தியுள்ளது. பயனர் விருப்பத்தின் அடிப்படையில் செயல்படும் இந்த வசதி, புகைப்படம் எடுக்கப்படும் நேரத்திலேயே சென்சார் பிக்சல்களுக்கான தகவல்களைப் பதிவு செய்து, மாற்ற முடியாத reference files-ஐ உருவாக்குகிறது. AI மூலம் உருவாக்கப்பட்ட அல்லது மாற்றியமைக்கப்பட்ட படங்களை அடையாளம் காண உதவும் SynthID தரநிலைக்கும் இந்த சாதனங்கள் ஆதரவளிக்கின்றன.

ப்ரோ வரிசையின் மேம்பாடுகள் குறித்து ஆப்பிளின் உலகளாவிய மார்க்கெட்டிங் பிரிவின் மூத்த துணைத் தலைவர் கிரெக் ஜோஸ்வியக் கூறுகையில்,

“iPhone 18 Pro-வில் பயனர்கள் அதிகம் கவனம் செலுத்தும் கேமரா, செயல்திறன், பேட்டரி மற்றும் நுண்ணறிவு ஆகிய அம்சங்களில் முன்னேற்றங்களைச் செய்துள்ளோம். இந்தப் பகுதிகளில் சிறிய அளவிலான மேம்பாடுகளை மட்டும் செய்யவில்லை; மிகப்பெரிய முன்னேற்றங்களை ஏற்படுத்தி, இதுவரை உருவாக்கப்பட்ட சிறந்த Pro iPhone-ஐ உருவாக்கியுள்ளோம்,” என்றார்.

iPhone 18 Pro மற்றும் iPhone 18 Pro Max ஆகிய இரண்டிலும் A20 Pro சிப் பயன்படுத்தப்பட்டுள்ளது. இதில் 6-core CPU, 7-core GPU மற்றும் இரண்டு 16-core Neural Engine-கள் என மொத்தம் 32 cores கொண்ட இயந்திரக் கற்றல் செயலாக்க அமைப்பு இடம்பெற்றுள்ளது.

மேம்படுத்தப்பட்ட வெப்பக் கட்டுப்பாட்டு அமைப்பில், iPhone 17 Pro-வை விட மூன்று மடங்கு அதிகமான பரப்பளவு கொண்ட vapour chamber பயன்படுத்தப்பட்டுள்ளது. இதன் மூலம் தொடர்ந்து இயங்கும் செயல்திறன் 40 சதவீதம் வரை அதிகரிக்கும் என ஆப்பிள் கூறுகிறது.

பேட்டரி திறனிலும் முன்னேற்றம் செய்யப்பட்டுள்ள நிலையில், eSIM-only மாடல்கள் iPhone 18 Pro-வில் 36 மணி நேரம் வரையிலும், iPhone 18 Pro Max-ல் 45 மணி நேரம் வரையிலும் வீடியோ இயக்கத்தை வழங்கும் என தெரிவிக்கப்பட்டுள்ளது.

விலை மற்றும் விற்பனை

இரு தயாரிப்பு வரிசைகளிலும் Siri AI மற்றும் Apple Intelligence ஆகியவற்றின் ஒருங்கிணைப்பை ஆப்பிள் மேலும் விரிவுபடுத்தியுள்ளது. தனிப்பட்ட பயனர் தகவல்களைப் புரிந்துகொள்ளும் திறன், திரையில் உள்ள தகவல்களை அறியும் வசதி மற்றும் Private Cloud Compute மூலம் பாதுகாப்பான கிளவுட் செயல்பாடுகள் ஆகியவை இதில் அடங்குகின்றன.

இணைப்பு வசதிகளுக்காக N1 ஒயர்லெஸ் வலையமைப்பு சிப் பயன்படுத்தப்பட்டுள்ளது. இது Wi-Fi 7, புளூ டூத் 6 மற்றும் த்ரெட் ஆகியவற்றை ஆதரிக்கிறது. இதனுடன் C2 cellular modem வழங்கப்பட்டுள்ளது.

மேலும், பல்வேறு சர்வதேச சந்தைகளில் eSIM-only மாடல்களின் விநியோகத்தையும் ஆப்பிள் விரிவுபடுத்துகிறது. இதன் மூலம் வழக்கமான SIM கார்டுகளுக்குப் பதிலாக டிஜிட்டல் subscriber profiles பயன்படுத்தப்படுகின்றன.

இந்தியாவில் iPhone 18 Pro-வின் ஆரம்ப விலை ரூ.1,64,900 ஆகவும், iPhone 18 Pro Max-ன் ஆரம்ப விலை ரூ.1,79,900 ஆகவும் நிர்ணயிக்கப்பட்டுள்ளது. Pro மாடல்களுக்கான முன்பதிவு செப்டம்பர் 12, சனிக்கிழமை தொடங்குகிறது. செப்டம்பர் 18, வெள்ளிக்கிழமை முதல் கடைகளில் விற்பனை தொடங்கும்.

மடிக்கக்கூடிய iPhone Duo-வின் ஆரம்ப விலை ரூ.2,99,900. 256GB, 512GB, 1TB மற்றும் 2TB சேமிப்பு திறன்களில் இது கிடைக்கிறது. iPhone Duo-வுக்கான முன்பதிவு அக்டோபர் 16, வெள்ளிக்கிழமை தொடங்குகிறது. அக்டோபர் 23, வெள்ளிக்கிழமை முதல் கடைகளில் விற்பனைக்கு வருகிறது.