இந்தியா செமிகண்டக்டர் மிஷன் 2.0-க்கு ரூ.1.25 லட்சம் கோடி ஒதுக்கீடு - மத்திய நிதி அமைச்சக குழு ஒப்புதல்!

இந்தியாவை உலகளாவிய சிப் உற்பத்தி மையமாக மாற்றும் நோக்கில் செயல்படுத்தப்படும் இந்தியா செமிகண்டக்டர் மிஷன் (ISM) 2.0 திட்டத்திற்கு ரூ.1.25 லட்சம் கோடி நிதி ஒதுக்கீடு செய்யும் முடிவுக்கு மத்திய நிதி அமைச்சகத்தின் செலவினத் துறை ஒப்புதல் வழங்கியுள்ளது. இந்த பரிந்துரை விரைவில் மத்திய அமைச்சரவையின் ஒப்புதலுக்காக அனுப்பப்பட உள்ளது என்று தகவல்கள் தெரிவிக்கின்றன.

இந்த நிதி ஒதுக்கீடு, இந்தியா செமிகண்டக்டர் மிஷன் 1.0-க்கு வழங்கப்பட்ட ₹76,000 கோடி நிதியை விட குறிப்பிடத்தக்க அளவில் அதிகமாகும். நாட்டின் செமிகண்டக்டர் உற்பத்தித் திறனை விரிவுபடுத்துவதற்கும், உலக சிப் உற்பத்தி சங்கிலியில் இந்தியாவின் பங்கினை வலுப்படுத்துவதற்கும் இந்தப் புதிய திட்டம் முக்கியத்துவம் பெறுகிறது.

2026-27 மத்திய பட்ஜெட்டில் அறிவிக்கப்பட்ட 'இந்தியா செமிகண்டக்டர் மிஷன் 2.0' திட்டம், செமிகண்டக்டர் உற்பத்திக்குத் தேவையான உபகரணங்கள், மூலப்பொருட்கள், உள்நாட்டு அறிவுசார் சொத்துரிமைகள் (IP), சிப் வடிவமைப்பு மற்றும் வலுவான விநியோகச் சங்கிலி உருவாக்கம் ஆகியவற்றில் கவனம் செலுத்துகிறது.

மத்திய மின்னணு மற்றும் தகவல் தொழில்நுட்பத் துறை அமைச்சர் அஷ்வினி வைஷ்ணவ் முன்னதாக கூறுகையில்,

"இந்தியா செமிகண்டக்டர் மிஷன் 2.0 திட்டம் உள்நாட்டு சிப் வடிவமைப்பு, தயாரிப்பு மேம்பாடு, தொழில்துறை கூட்டாளிகளை ஈர்த்தல் மற்றும் திறமையான மனிதவள மேம்பாடு ஆகியவற்றுக்கு முன்னுரிமை அளிக்கும்," என்றார்.

இந்தியா செமிகண்டக்டர் மிஷன் திட்டத்தின் கீழ் இதுவரை மொத்தம் 12 செமிகண்டக்டர் உற்பத்தித் திட்டங்களுக்கு ஒப்புதல் அளிக்கப்பட்டுள்ளது. இதில் ஒரு செமிகண்டக்டர் ஃபேப்ரிகேஷன் யூனிட், இரண்டு காம்பவுண்ட் செமிகண்டக்டர் உற்பத்தி யூனிட்கள் மற்றும் ஒன்பது பேக்கேஜிங் யூனிட்கள் அடங்கும். இத்திட்டங்களின் மொத்த முதலீட்டு மதிப்பு சுமார் ரூ.1.64 லட்சம் கோடியாகும்.

வடிவமைப்புத் துறையில், டிசைன் லிங்க்டுஇன் சென்டிவ் (DLI) திட்டத்தின் கீழ், 24 திட்டங்களுக்கு ஆதரவு வழங்கப்பட்டுள்ளது. மேலும், 105 நிறுவனங்களுக்கு மேம்பட்ட சிப் வடிவமைப்பு கருவிகள் வழங்கப்பட்டுள்ளன. பல்வேறு உலகளாவிய ஃபவுண்ட்ரிகளில் 23 சிப் வடிவமைப்பு ‘tapeouts’ வெற்றிகரமாக நிறைவேற்றப்பட்டுள்ளன. இது செமிகண்டக்டர் வடிவமைப்பில் இந்தியாவின் வளர்ந்து வரும் திறனை வெளிப்படுத்துகிறது.

இந்தியாவின் செமிகண்டக்டர் முன்னேற்றத்தை "நீண்டகால கனவு" என்று குறிப்பிட்ட மின்னணு மற்றும் தகவல் தொழில்நுட்ப அமைச்சகத்தின் மூத்த அதிகாரி ஒருவர்,

"12 செமிகண்டக்டர் உற்பத்தித் திட்டங்களுக்கு ஒப்புதல் அளிக்கப்பட்டுள்ளது. அவற்றில் இரண்டு திட்டங்கள் இந்த ஆண்டின் தொடக்கத்தில் வணிக உற்பத்திக்காக தொடங்கப்பட்டுள்ளன. மேலும், CG Semi நிறுவனம் ஜூலை 4ம் தேதி திறந்து வைக்கப்பட உள்ளது. இந்த ஆண்டின் இறுதிக்குள் மேலும் ஒன்று அல்லது இரண்டு திட்டங்கள் செயல்பாட்டுக்கு வரலாம். இதன் மூலம், நாட்டில் வணிக ரீதியிலான செமிகண்டக்டர் உற்பத்தி என்ற நமது நீண்டகால கனவு நனவாகியுள்ளது," என்று தெரிவித்தார்.

மேலும் அவர், "தொழில்நுட்பத் துறையில் இந்தியா இன்று முக்கியமான சக்தியாக உருவெடுத்துள்ளது. சர்வதேச தரநிலைகள் தொடர்பான விவாதங்களிலும் இந்தியாவின் குரல் முக்கியத்துவம் பெறுகிறது," என்றார்.

இந்தியா செமிகண்டக்டர் மிஷன் 2.0-க்கு வழங்கப்பட்டுள்ள புதிய நிதி ஒதுக்கீடு, உலக சிப் உற்பத்தித் துறையில் இந்தியாவின் போட்டித்திறனை உயர்த்துவதோடு, நாட்டை முன்னணி செமிகண்டக்டர் உற்பத்தி மையமாக மாற்றும் முயற்சிக்கு புதிய வேகத்தை வழங்கும், என எதிர்பார்க்கப்படுகிறது.

தொகுப்பு: முத்துகுமார்