இந்தியக் குடும்பங்களுக்கான டிஜிட்டல் நல்வாழ்வு வழிகாட்டி - மனநல நிபுணர்களுடன் கூகுள் கூட்டணி!

இந்தியக் குடும்பங்களுக்கான ‘டிஜிட்டல் நல்வாழ்வு வழிகாட்டி’யை வெளியிடுவதற்காக, நிம்ஹான்ஸ், ஃபோர்டிஸ் ஹெல்த்கேர் மற்றும் பெற்றோர் நல ஆதரவாளர்களுடன் கூகுள் இந்தியா மற்றும் யூடியூப் இணைந்துள்ளன.

குடும்பங்கள் இணைந்து ஆரோக்கியமான டிஜிட்டல் பழக்கவழக்கங்களை உருவாக்க உதவும் வகையில் இந்த வழிகாட்டி உருவாக்கப்பட்டுள்ளதாக கூகுள் தெரிவித்துள்ளது.

முன்னணி மனநலம், கல்வி மற்றும் குழந்தை வளர்ச்சி நிபுணர்களின் ஆலோசனையுடன் உருவாக்கப்பட்ட இந்த வழிகாட்டி, வெறுமனே திரை நேரத்தைக் கட்டுப்படுத்துவதைக் கடந்து, ஆரோக்கியமான டிஜிட்டல் பழக்கங்களை உருவாக்குவதற்கான நடைமுறை மற்றும் ஆதாரபூர்வமான வழிமுறைகளை குடும்பங்களுக்கு வழங்குகிறது.

இந்தியாவில் கோடிக்கணக்கான இளைஞர்களுக்கு கற்றல், படைப்பாற்றல் மற்றும் புதிய விஷயங்களை ஆராய்வதற்கான முக்கிய தளமாக இணையம் மாறியுள்ளது.

“வேகமாக மாறிவரும் இந்தச் சூழலில் குடும்பங்களுக்கு ஆதரவளிக்கும் வகையில், இந்தியக் குடும்பங்களுக்கான டிஜிட்டல் நல்வாழ்வு வழிகாட்டியை கூகுள் இந்தியாவும் யூடியூப்பும் இன்று அறிமுகப்படுத்தியுள்ளன. இணையப் பாதுகாப்பு தொடர்பான கூகுளின் நீண்டகால உலகளாவிய அணுகுமுறையை அடிப்படையாகக் கொண்ட இந்தப் புதிய முயற்சி, இந்தியக் குடும்பங்களின் தனித்துவமான சூழலுக்கு ஏற்ப வடிவமைக்கப்பட்டுள்ளது,” என்று அந்த அறிக்கையில் தெரிவிக்கப்பட்டுள்ளது.

சிக்கலான நடத்தை அறிவியல் கருத்துகளை, அன்றாட வாழ்க்கையில் பெற்றோர் எளிதாகப் பின்பற்றக்கூடிய பழக்கவழக்கங்களாக மாற்றுவதில் இந்த வழிகாட்டி கவனம் செலுத்துகிறது.

தொழில்நுட்பப் பயன்பாட்டைக் கண்காணித்து கட்டுப்படுத்துவதிலிருந்து, அதில் குடும்ப உறுப்பினர்கள் இணைந்து பங்கேற்பதற்கு மாறுமாறு இது ஊக்குவிக்கிறது. குடும்பத்துக்கான ஊடகப் பயன்பாட்டு ஒப்பந்தங்களை இணைந்து உருவாக்குதல், தொழில்நுட்பம் பயன்படுத்தக் கூடாத பகுதிகளை அமைத்தல் உள்ளிட்ட நடைமுறை ஆலோசனைகளும் இதில் இடம்பெற்றுள்ளன.

இந்தியாவில் பல கோடி குடும்பங்களில் வெவ்வேறு தலைமுறைகளைச் சேர்ந்தவர்கள் ஒரே ஸ்மார்ட்போன் அல்லது டேப்லெட்டை பகிர்ந்து பயன்படுத்துவதை இந்த வழிகாட்டி கருத்தில் கொண்டுள்ளது. இதற்காக, குழந்தைகளின் பாதுகாப்பையும் பெரியவர்களின் தனியுரிமையையும் பாதுகாக்க, யூடியூப்பின் ‘Who’s Watching’ போன்ற சுயவிவர மாற்று வசதிகளைப் பயன்படுத்துவது குறித்தும் நடைமுறை வழிமுறைகள் வழங்கப்பட்டுள்ளன.