அமெரிக்க வரிவிதிப்பினால் பாதிக்கப்பட்ட MSME துறைக்கு ஆதரவு அளிக்க மத்திய அரசு பரிசீலனை!

அமெரிக்க அதிபரின் கூடுதல் வரி தாக்கத்தால் பாதிக்கப்பட்ட சிறு, குறு மற்றும் நடுத்தர தொழில்களுக்காக விரைவில் நடவடிக்கைகள் எடுக்க இருப்பதாக மத்திய அரசு அறிவித்துள்ளது.

தி இந்தியன் எக்ஸ்பிரஸ் வெளியிட்ட செய்தியின் படி,

சிறு, குறு மற்றும் நடுத்தர தொழில்கள் அமைச்சகத்தின் (MSME) ஒரு மூத்த அதிகாரி, கூடுதல் வரியால் பாதிக்கப்பட்ட துறைகளுக்காக கடன் உத்தரவாதத் திட்டங்களைத் தாண்டிய ஆதரவு நடவடிக்கைகள் விரைவில் அமல்படுத்தப்பட உள்ளதாக தெரிவித்துள்ளார்.

அமெரிக்க அதிபர் விதித்த கூடுதல் வரி காரணமாக நூல், ஆடை, மற்றும் கம்பளத் துறைகள் கடுமையாக பாதிக்கப்பட்டுள்ளன. இதனால் வேலை இழப்பு மற்றும் கடன்கள் (NPA) அதிகரிக்கும் ஆபத்தும் இருப்பதாக அரசு வட்டாரங்கள் தெரிவித்துள்ளன.

அமெரிக்க அரசு இந்தியப் பொருட்கள் மீது மொத்தம் 50% கூடுதல் வரி விதித்துள்ளது — அதில் 10% அடிப்படை வரி, 2025 ஏப்ரல் 2 அன்று அறிவிக்கப்பட்ட 25% பரஸ்பர வரி, மேலும் 2025 ஆகஸ்ட் 27 அன்று அறிவிக்கப்பட்ட கூடுதல் 25% வரி அடங்கும்.

இக்கூடுதல் வரிகள் ஆடை, நகை, இரசாயனங்கள், காலணிகள் மற்றும் கடல் உணவு துறைகளை பாதிக்கின்றன. 2024 ஆம் ஆண்டு இந்தியாவின் அமெரிக்காவிற்கான ஏற்றுமதி $79.44 பில்லியனாக இருந்தது.

புதிய அரசுத் திட்டங்கள், வரிப்பளுவினால் போட்டித்திறன் குறைந்த MSME ஏற்றுமதியாளர்களை நட்டத்திலிருந்து காக்கவும், புதிய ஏற்றுமதி சந்தைகளில் விரிவடையவும் உதவுவதை நோக்கமாகக் கொண்டுள்ளன.

நிதி அமைச்சகம் தற்போது MSME-களுக்கு வழங்கப்படவுள்ள கடன் தொகையின் அளவைத் தீர்மானிக்கும் பணியில் உள்ளது. ஒரு மூத்த அதிகாரி,

“பொருத்தமான அளவு நிதி ஒதுக்கப்படும், கடன் ஓட்டம் தடைபடாமல் பார்த்துக் கொள்ளப்படும்,” என தெரிவித்துள்ளார்.

தாமதமான கட்டணங்கள் மற்றும் அதிகரித்த உற்பத்தி செலவுகள் காரணமாக MSMEகள் ஏற்கனவே மூலதன நெருக்கடியை எதிர்கொள்கின்றன. மொத்த கடன் வெளிப்பாடு சுமார் ரூ.40 லட்சம் கோடி அளவில் உள்ள நிலையில், மேலும் நிதி அழுத்தம் ஏற்பட்டால் செயல்படாத சொத்துக்கள் (NPA) அதிகரிக்கும் அபாயம் இருப்பதாக நிபுணர்கள் எச்சரிக்கின்றனர்.

கிரிசில் ரேட்டிங்ஸ் தரவின்படி, MSME கடன் தொகுதியில் உள்ள செயல்படாத கடன்களின் விகிதம் FY25-இல் 3.59% இலிருந்து FY26-இல் சுமார் 3.9% ஆக உயரக்கூடும். MSME கடன்கள் தற்போது இந்திய வங்கித் துறையின் மொத்த நிலுவைக் கடன்களில் சுமார் 17% ஆக உள்ளன.

MSME ஆதாரமான முக்கிய ஏற்றுமதி துறைகளில் ஒன்றான நெசவு மற்றும் ஆடைத் துறை மிகுந்த பாதிப்பைச் சந்தித்துள்ளது. 2025 செப்டம்பரில் இத்துறையின் ஏற்றுமதி, கடந்த ஆண்டின் அதே மாதத்துடன் ஒப்பிடுகையில் 10% க்கும் மேலாக சரிந்துள்ளது.

இதேபோல், கடல் உணவு ஏற்றுமதியாளர்கள், அமெரிக்காவுக்கான இறால் ஏற்றுமதி குறைந்திருப்பதாகத் தெரிவித்துள்ளனர். அமெரிக்கா இந்தியாவின் மொத்த கடல் உணவு ஏற்றுமதியில் சுமார் 35% பங்கை வகிக்கிறது. அதிகாரப்பூர்வ தரவுகள் இன்னும் வெளியாகவில்லை என்றாலும், FY26-இல் கடல் உணவு ஏற்றுமதி மொத்த அளவில் குறையும் என்று வட்டாரங்கள் எதிர்பார்க்கின்றன.