தைரோகேர் வேலுமணி உள்ளிட்ட முதலீட்டாளர்களிடமிருந்து ரூ.4 கோடி நிதி திரட்டிய Avni Wellness

பெண்கள் சுகாதார நலன் ஸ்டார்ட் அப் 'அவ்னி வெல்னஸ்' (Avni Wellness), Proteus Partners தலைமை வகித்த வியூக நோக்கிலான சுற்றில் ரூ.4 கோடி நிதி திரட்டியுள்ளது. இந்த சுற்றில் செயல்பாட்டு முதலீட்டாளர்கள் புரு குப்தா, ஸ்ரீஜித் மூலயில் மற்றும் தைரோகேர் நிறுவனர் ஏ.வேலுமணி, சோம்யா நிகம் உள்ளிட்டோர் பங்கேற்றனர்.

இந்தியாவின் வளர்ந்து வரும் பெண்கள் நுட்பம் மற்றும் பெண்கள் நலன் சார்ந்த சந்தையில் தனது இருப்பை வலுவாக்கிக் கொள்ளும் வகையில் டிஜிட்டல் காமர்ஸ் வர்த்தக விரிவாக்கம், சுழற்சி ஊட்டச்சத்து சார்ந்த பொருட்கள் விரிவாக்கம், பெண்கள் சார்ந்த நுண் தொழில்முனைவோர் வலைப்பின்னல் வலுவாக்கம் ஆகியவற்றில் இந்நிறுவனம் கவனம் செலுத்தி வரும் நிலையில் இந்த நிதிச்சுற்று நிகழ்ந்துள்ளது.

நேரடி வாடிக்கையாளர்கள் மேடை மற்றும் இ-காமர்ஸ் சேனல்கள் உள்ளிட்ட டிஜிட்டல் வர்த்தகம் 75 சதவீத வருவாய் அளிப்பதாக நிறுவனம் தெரிவிக்கிறது. வாடிக்கையாளர்களை தக்க வைப்பது,  அமேசான் மற்றும் குவிக் காமர்ஸ் சந்தையில் நிலையை வலுவாக்குவது, இந்தியா முழுவதும் 10,000 பெண் தொழில்முனைவோர்களாக தனது வலைப்பின்னலை விரிவாக்குவது ஆகியவற்றுக்கு இந்த நிதி பயன்படுத்தப்பட உள்ளது.

சுஜாதா பவார் மற்றும் ஆபூர்வ் அகர்வால் ஆகியோரால் நிறுவப்பட்ட ’அப்னி வெல்னஸ்’ (Avni Wellness) மாதவிடாய் சுகாதாரம், சுழற்சி ஊட்டச்சத்து, பெண்களுக்கான வரும்முன் காப்போம் சுகாதாரம் உள்ளிட்ட பிரிவுகளில் கவனம் செலுத்தி வருகிறது. நிறுவனம் குறிப்பிடும் இந்தியாவின் முதல் மறுபயன்பாட்டிற்கான கிருமிகளுக்கு எதிரான சானிட்டரி நாப்கின், லிப்போசோமல் இரும்பு சத்து,  PCOS நலன் பொருட்கள், சுண்ணாம்பு சத்து பொருட்கள் உள்ளிட்டவற்றை நிறுவனம் கொண்டுள்ளது.

அடுத்த கட்ட வளர்ச்சிக்கான அடுத்த 12 மாதங்களில் மேலும் ரூ.15 கோடி திரட்ட திட்டமிட்டிருப்பதாக நிறுவனம் தெரிவிக்கிறது.

”பெண்கள் நலன் என்பது பெரும்பாலும் மாதவிடாய் மற்றும் சானிட்டரி நாப்கின் சார்ந்ததாக கருதப்படுகிறது. பெண்களின் பல்வேறு வாழ்க்கை நிலைக்கு ஏற்ற ஒருங்கிணைந்த அணுகுமுறையை நாம் மேற்கொள்ள வேண்டிய கட்டத்தில் உள்ளோம். இந்நிலையில், சுகாதாரம், ஊட்டச்சத்து சார்ந்த பல்வேறு பிரிவுகளில் எங்கள் விரிவாக்கத்திற்கு இந்த நிதி உதவும் என்று, அவ்னி வெல்னஸ் நிறுவனர் சுஜாதா பவார் கூறியுள்ளார்.

பொருட்கள் மற்றும் சேனல்கள் வலுப்படுத்தல் மூலம் நிறுவனம் வளர்ச்சி அடைய திட்டமிட்டுள்ளது, என இணை நிறுவனர் அபூர்வ் அகர்வால் கூறியுள்ளார். ஒரு பிராண்டாக அடித்தளத்தில் இருந்து வளர்ச்சியை அடைந்துள்ளோம். இந்த நிதி சரியான பொருட்கள், சரியான சேனல்களில் கவனம் செலுத்த உதவும் என்றும் கூறியுள்ளார்.