ஆழ்தொழில்நுட்ப புத்தாக்க நிதியம், புதிய ஏஐ, டிஜிட்டல் சேவைகள் - சட்டமன்றத்தில் ஐடி அமைச்சர் குமார் பகிர்ந்த முக்கிய அம்சங்கள்!

தமிழகத்தில் செயற்கை நுண்ணறிவு (AI), ஆழ்தொழில்நுட்பம், புத்தாக்கம் மற்றும் டிஜிட்டல் சேவைகள் துறையை அடுத்த கட்டத்துக்கு கொண்டு செல்லும் வகையில், அரசு பல்வேறு புதிய திட்டங்களை அறிவித்துள்ளது.

சட்டப்பேரவையில் செயற்கை நுண்ணறிவு, தகவல் தொழில்நுட்பவியல் மற்றும் டிஜிட்டல் சேவைகள் துறை மானியக்கோரிக்கை மீதான விவாதத்துக்கு பதிலளித்த அமைச்சர் ஆர்.குமார், இந்தத் துறைகளில் முதலீடு, ஆராய்ச்சி, தொழில்முனைவு மற்றும் அரசு சேவைகளின் டிஜிட்டல் மாற்றத்தை ஊக்குவிக்கும் வகையில் 10 முக்கிய அறிவிப்புகளை வெளியிட்டார்.

ஆழ்தொழில்நுட்ப நிறுவனங்களுக்கு ரூ.50 கோடி நிதியம்

தமிழகத்தில் உருவாகும் ஆழ்தொழில்நுட்ப நிறுவனங்களுக்கு நிதியுதவி அளிக்கும் வகையில், தமிழ்நாடு தொழில்நுட்ப மையம் சார்பில் ரூ.50 கோடி தொடக்க நிதியுடன் ‘வெற்றி தமிழகம் ஆழ்தொழில்நுட்ப புத்தாக்க நிதியம்’ உருவாக்கப்பட உள்ளது. இதில் 25 சதவீத நிதி SC/ST நிறுவனங்களுக்காக ஒதுக்கப்படும்.

சென்னை, கோவையில் AI சிறப்பு மையங்கள்

செயற்கை நுண்ணறிவு ஆராய்ச்சி மற்றும் பயன்பாட்டை விரிவுபடுத்தும் நோக்கில், சென்னை மற்றும் கோவையில் தலா ஒரு AI சிறப்பு மையம் அமைக்கப்பட உள்ளது. பொது-தனியார் கூட்டாண்மை அடிப்படையில் உருவாக்கப்படும் இந்த மையங்கள், AI ஆராய்ச்சி, புதிய கண்டுபிடிப்புகள், திறன் மேம்பாடு, புத்தொழில் நிறுவனங்களின் வளர்ப்பு மற்றும் பொறுப்பான AI பயன்பாடு ஆகியவற்றில் கவனம் செலுத்தும். நான்கு ஆண்டுகளில் இத்திட்டத்துக்கு ரூ.20 கோடி செலவிடப்படும்.

ஒரே செயலியில் 500 அரசு சேவைகள்

குடும்ப அட்டை தொடர்பான சேவைகள், ஓட்டுநர் உரிமம் புதுப்பித்தல் உள்ளிட்ட 500 அரசு சேவைகளை பொதுமக்கள் தங்கள் கைபேசி மூலமாக எளிதாகப் பெறும் வகையில் ‘வெற்றி தமிழ்நாடு சூப்பர் செயலி’ உருவாக்கப்பட உள்ளது. ரூ.5 கோடி மதிப்பிலான இந்தத் திட்டம், அரசு சேவைகளை ஒரே டிஜிட்டல் தளத்துக்குள் கொண்டு வருவதை நோக்கமாகக் கொண்டுள்ளது.

அரசுத் திட்டங்கள் குறித்து மக்களின் கருத்துகளுக்கு இணையதளம்

அரசின் திட்டங்கள் மற்றும் செயல்பாடுகள் குறித்து பொதுமக்கள் தங்கள் கருத்துகளையும் ஆலோசனைகளையும் நேரடியாகத் தெரிவிக்கும் வகையில் ‘வெற்றி தமிழ்நாடு’ என்ற இணையதளம் உருவாக்கப்பட உள்ளது. இதற்காக ரூ.1 கோடி ஒதுக்கப்பட்டுள்ளது.

தொழில்முனைவோருக்கு இலவச AI வசதிகள்

தமிழகத்தில் AI அடிப்படையிலான தயாரிப்புகள் மற்றும் சேவைகளை உருவாக்கும் தொழில்முனைவோருக்கு ஆதரவளிக்கும் வகையில் ரூ.10 கோடி செலவில் இலவச AI சேவைகள் வழங்கப்பட உள்ளன. இதன் ஒரு பகுதியாக, அரசுக்குச் சொந்தமான உயர் செயல்திறன் கொண்ட GPU கணினிக் குழுமமும் அமைக்கப்படும்.

வன்பொருள் துறைக்கு ‘TN DRIVE’

தனித்துவமான வன்பொருள் வடிவமைப்பு, முன்மாதிரி உருவாக்கம் மற்றும் முன்னோடி உற்பத்திக்குத் தேவையான வசதிகளை தொழில்முனைவோர் எளிதில் அணுகுவதற்காக ‘TN DRIVE’ திட்டம் செயல்படுத்தப்பட உள்ளது. வடிவமைப்பு, ஆராய்ச்சி மற்றும் மேம்பாடு, புத்தாக்கம், தொழில்முனைவு மற்றும் பொறியியல் ஆகியவற்றை ஒருங்கிணைக்கும் இத்திட்டத்துக்கு ரூ.3 கோடி செலவிடப்படும்.

500 பண்பாட்டுத் தளங்கள் டிஜிட்டல் ஆவணம்

தமிழ்நாடு பண்பாட்டு மின் நிலவரத் திட்டத்தின் இரண்டாம் கட்டமாக, ராமநாதபுரம், தூத்துக்குடி, திருநெல்வேலி, தென்காசி, கன்னியாகுமரி மற்றும் புதுக்கோட்டை மாவட்டங்களில் உள்ள 500 பண்பாட்டுத் தளங்கள் மற்றும் நிகழ்வுகள் ஆவணப்படுத்தப்பட உள்ளன. ரூ.60 லட்சம் செலவில் இந்தப் பணிகள் மேற்கொள்ளப்படும்.

AI உதவியுடன் தமிழ் இணைய மொழி ஆய்வகம்

தமிழ் மொழியின் இணையப் பயன்பாட்டை நவீன தொழில்நுட்பத்துடன் இணைக்கும் வகையில், செயற்கை நுண்ணறிவு அடிப்படையிலான தமிழ் இணைய மொழி ஆய்வகம் தொடங்கப்பட உள்ளது. முதற்கட்டமாக ரூ.50 லட்சம் செலவில் செயல்படுத்தப்படும் இத்திட்டம், பின்னர் இணையக் கல்வித் திட்டங்களிலும் விரிவுபடுத்தப்படும்.

AI கொள்கைகளுக்கு ஆலோசனைக் குழு

தமிழகத்தில் செயற்கை நுண்ணறிவின் பயன்பாடு, கொள்கை உருவாக்கம் மற்றும் செயல்படுத்துதல் தொடர்பாக அரசுக்கு ஆலோசனை வழங்க தனியான AI ஆலோசனைக் குழு அமைக்கப்பட உள்ளது.

அரசு, சுகாதாரம், வேளாண்மையில் AI

அரசின் மின் அலுவலகப் பணிகளை மேம்படுத்துவதற்கான AI கருவி உருவாக்கப்படுவதுடன், சுகாதாரம் மற்றும் வேளாண்மைத் துறைகளுக்கான AI மாதிரிகளும் உருவாக்கப்பட உள்ளன. இதற்காக ரூ.75 லட்சம் செலவிடப்படும்.

மொத்தத்தில், செயற்கை நுண்ணறிவு மற்றும் ஆழ்தொழில்நுட்பத்தில் முதலீடு செய்வதுடன், தொழில்முனைவோர் மற்றும் புத்தொழில் நிறுவனங்களை ஊக்குவித்தல், அரசு சேவைகளை எளிமைப்படுத்துதல், தமிழ் மொழியை AI தொழில்நுட்பத்துடன் இணைத்தல், பண்பாட்டுத் தரவுகளை டிஜிட்டல் முறையில் பாதுகாத்தல் என பல்வேறு துறைகளை உள்ளடக்கியதாக இந்த அறிவிப்புகள் அமைந்துள்ளன.