சர்வதேச விருந்தோம்பல் நிறுவனம் Ironhill-இல் முதலீடு செய்துள்ளார் இசையமைப்பாளர் அனிருத் ரவிச்சந்தர்!

இந்தியாவின் முன்னணி இசையமைப்பாளரும், உலகளவில் அறியப்பட்ட கலைத் தொழில்முனைவோருமான அனிருத் ரவிச்சந்தர், தனது ‘அல்புகர்க் ரெக்கார்ட்ஸ்’ (Albuquerque Records) நிறுவனம் மூலம் 'அயர்ன்ஹில்' (Ironhill) நிறுவனத்தில் முதலீடு செய்துள்ளார். முதலீட்டுத் தொகை என்ன என்பது வெளியிடப்படவில்லை.

அயர்ன்ஹில் இந்தியா மற்றும் அயர்ன்ஹில் அமெரிக்கா இணைந்து உருவாக்கப்பட்ட சர்வதேச விருந்தோம்பல் நிறுவனமாக Ironhill செயல்பட்டு வருகிறது. இந்தியாவில் வேகமாக வளர்ந்துள்ள அயர்ன்ஹில்லின் செயல்பாட்டு அனுபவம் மற்றும் நுகர்வோர் புரிதலுடன், அமெரிக்காவின் கிராஃப்ட் பீர் தயாரிப்பு மரபு மற்றும் விருந்தோம்பல் அனுபவத்தை இணைத்து சர்வதேச அளவில் விரிவடைவதே நிறுவனத்தின் நோக்கமாகும்.

அனிருத் ரவிச்சந்தருக்கு உலகளாவிய விருந்தோம்பல் மற்றும் உணவு-பானத் துறையில் இது இரண்டாவது முதலீடாகும். இதற்கு முன்பு அவர் ’லோகா லோகா டெகிலா’ (Loca Loka Tequila) நிறுவனத்தில் முதலீடு செய்துள்ளார். கலாசாரம், வாழ்க்கைமுறை மற்றும் நுகர்வோர் பிராண்டுகள் சந்திக்கும் துறைகளில் அவர் மேற்கொண்டு வரும் முதலீடுகளின் வரிசையில் அயர்ன்ஹில் முதலீடும் இடம்பெற்றுள்ளது.

அயர்ன்ஹில் நிறுவனத்தின் இணை நிறுவனரான ஸ்ரீ ஹர்ஷா வட்லமுடியுடன் லோகா லோகா டெகிலா நிறுவனத்திலும் அனிருத் இணைந்து பணியாற்றி வருகிறார். அயர்ன்ஹில்லில் முதலீடு செய்வதற்கான வாய்ப்பு கிடைத்தபோது அதிகம் யோசிக்க வேண்டிய அவசியம் ஏற்படவில்லை என்று அனிருத் தெரிவித்துள்ளார்.

“அயர்ன்ஹில் உண்மையான ஆன்மாவையும் அதற்கேற்ற அளவிலான வளர்ச்சியையும் கொண்ட அரிய விருந்தோம்பல் பிராண்டை உருவாக்கியுள்ளது. ஒவ்வொரு நகரத்திலும் வாடிக்கையாளர்களுக்காக அவர்கள் உருவாக்கியுள்ள அனுபவம்தான் என்னை மிகவும் ஈர்த்தது. அயர்ன்ஹில் உலகளாவிய அத்தியாயத்தைத் தொடங்கும் இந்த நேரத்தில், நான் ஒரு நிறுவனத்தில் மட்டுமல்ல, ஒரு கொள்கையிலும் முதலீடு செய்கிறேன். சிறந்த இசையைப் போலவே சிறந்த அனுபவங்களுக்கும் மொழிபெயர்ப்பு தேவையில்லை," என்று அயர்ன்ஹில் முதலீட்டாளர் அனிருத் ரவிச்சந்தர் கூறினார்.

அனிருத்தின் முதலீடு வெறும் முதலீடாக மட்டும் இல்லாமல், அயர்ன்ஹில் சர்வதேச சந்தைகளில் கால் பதிக்கும் நேரத்தில் அவரது படைப்பாற்றல் மற்றும் உலகளாவிய பிராண்ட் அனுபவம் நிறுவனத்துக்கு கூடுதல் பலமாக அமையும், என்று அயர்ன்ஹில் தெரிவித்துள்ளது.

இதுகுறித்து அயர்ன்ஹில் இந்தியாவின் இணை நிறுவனரும் இயக்குநர் குழு உறுப்பினருமான ஸ்ரீ ஹர்ஷா வட்லமுடி கூறுகையில்,

“லோகா லோகா நிறுவனத்தின் மூலம் அனிருத்துடன் இணைந்து பணியாற்றிய அனுபவம், பிராண்டுகளை உருவாக்குவது குறித்த அவரது சிந்தனையையும், வெவ்வேறு கலாசாரங்களைக் கடந்து அவை பயணிப்பதற்கான காரணங்களையும் புரிந்துகொள்ள எனக்கு உதவியது. நாங்கள் உலகளாவிய அரங்கில் அடியெடுத்து வைக்கும் இந்தத் தருணத்தில் அவர் அயர்ன்ஹில்லில் முதலீடு செய்திருப்பது, பிராண்டுகளை உண்மையாக உருவாக்கத் தெரிந்தவர்களுக்கு எங்கள் முயற்சியின் மீது உள்ள நம்பிக்கையை வெளிப்படுத்துகிறது. அவரைப் போன்ற ஒரு சிறந்த கலைஞர் எங்கள் நிறுவனத்தில் முதலீடு செய்திருப்பதில் நாங்கள் பெருமையும் மகிழ்ச்சியும் அடைகிறோம்,” என்றார்.

அயர்ன்ஹில் இந்தியாவின் வளர்ச்சி மூலதனம், செயல்பாட்டு அளவு மற்றும் நுகர்வோர் சந்தை குறித்த புரிதல் ஆகியவற்றையும், அயர்ன்ஹில் அமெரிக்காவின் கிராஃப்ட் பீர் தயாரிப்பு மரபு மற்றும் விருந்தோம்பல் துறை அனுபவத்தையும் ஒருங்கிணைத்து ஒரே சர்வதேச தளமாக உருவாக்கப்பட்டுள்ளது. இந்தியா மற்றும் அமெரிக்காவில் பல விருந்தோம்பல் மையங்களை தற்போது இயக்கி வரும் இந்நிறுவனம், 2026 மற்றும் 2027ஆம் ஆண்டுகளில் புதிய சர்வதேச சந்தைகளில் விரிவடைய திட்டமிட்டுள்ளது.