இன்டர்நெட் இல்லாமலே UPI - பட்டன் போன்களில் PhonePe டிஜிட்டல் பணப்பரிவர்த்தனை வசதி அறிமுகம்!

ஸ்மார்ட்போன் மற்றும் இணைய இணைப்பு இல்லாதவர்களும் UPI மூலம் பணம் செலுத்தும் வகையில் PhonePe UPI 123Pay என்ற புதிய சேவையை PhonePe அறிமுகப்படுத்தியுள்ளது. இதன் மூலம் பட்டன் போன் (Feature Phone) பயன்படுத்துபவர்களும் இணையம் இல்லாமலேயே UPI பரிவர்த்தனைகளை மேற்கொள்ள முடியும்.

பட்டன் போன்களில் UPI வசதியை அறிமுகப்படுத்தும் முதல் பெரிய மூன்றாம் தரப்பு UPI செயலி நிறுவனமாக PhonePe தன்னை நிலைநிறுத்தியுள்ளது. இந்த புதிய சேவை Nokia, HMD, Lava International மற்றும் Itel Mobile நிறுவனங்களின் குறிப்பிட்ட சாதனங்களில் முன்பே நிறுவப்பட்ட நிலையில் கிடைக்கும்.

மேலும், வரும் மாதங்களில் கூடுதல் மொபைல் தயாரிப்பு நிறுவனங்களுடன் இணைந்து இந்த வசதியை விரிவுபடுத்த உள்ளதாக PhonePe தெரிவித்துள்ளது.

பட்டன் போன்களுக்காகவே உருவாக்கப்பட்ட பிரத்யேக தொழில்நுட்ப கட்டமைப்பின் அடிப்படையில் இந்த சேவை செயல்படுகிறது. SMS அடிப்படையிலான தொழில்நுட்பத்தை பயன்படுத்துவதால், குறைந்த அளவிலான 2G நெட்வொர்க் வசதி உள்ள பகுதிகளிலும் பரிவர்த்தனைகளை மேற்கொள்ள முடியும்.

என்னென்ன வசதிகள்?

PhonePe UPI 123Pay மூலம்,

• மொபைல் எண் அல்லது UPI ID வழியாக ஒருவரிடமிருந்து மற்றொருவருக்கு பணம் அனுப்பலாம்.
• UPI ID அல்லது QR குறியீடு மூலம் கடைகள் மற்றும் வணிகர்களுக்கு பணம் செலுத்தலாம்.
• கேமரா வசதி கொண்ட பட்டன் போன்களில் QR குறியீட்டை ஸ்கேன் செய்து பணம் செலுத்தலாம்.
• வங்கிக் கணக்கு இருப்பைச் சரிபார்க்கலாம்.
• முந்தைய பரிவர்த்தனைகளின் விவரங்களைப் பார்க்கலாம்.

எதிர்காலத்தில் பில் கட்டணம் செலுத்துதல், மொபைல் ரீசார்ஜ் மற்றும் ஆதார் அடிப்படையிலான UPI பதிவு உள்ளிட்ட வசதிகளும் சேர்க்கப்படும் என PhonePe தெரிவித்துள்ளது.

AI உதவியுடன் குரல் வழி சேவை

முதன்முறையாக UPI பயன்படுத்துபவர்கள் மற்றும் ஸ்மார்ட்போன் இல்லாதவர்களுக்கு உதவும் வகையில், PhonePe குரல் வழி AI உதவி மையத்தையும் அறிமுகப்படுத்தியுள்ளது.

வழக்கமான IVR முறைக்கு பதிலாக, இந்த AI உதவியாளர் படிப்படியாக செயல்படுத்தும் முறையை விளக்குவதுடன், UPI தொடர்பான அடிப்படை கேள்விகளுக்கும் பதிலளிக்கும். ஆங்கிலம் மற்றும் 12 இந்திய மொழிகளில் இந்த வசதி கிடைக்கும்.

“ஸ்மார்ட்போன்களின் எல்லையைத் தாண்டி, நாட்டின் ஒவ்வொரு மூலையிலும் டிஜிட்டல் பணப்பரிவர்த்தனையின் பயன்களை கொண்டு சேர்ப்பதே PhonePe UPI 123Pay-யின் நோக்கம்,” என்று PhonePe நிறுவனர் மற்றும் தலைமைச் செயல் அதிகாரி சமீர் நிகம் தெரிவித்தார்.

PhonePe UPI 123Pay-யில் பதிவு செய்வது எப்படி?

ஸ்மார்ட்போன் அல்லது இணைய இணைப்பு தேவையில்லை.

1. பட்டன் போனில் முன்பே நிறுவப்பட்டுள்ள PhonePe செயலியைத் திறக்க வேண்டும்.
2. விதிமுறைகளை ஏற்றுக்கொண்டதும் சாதனம் தானாகப் பதிவு செய்யப்படும்.
3. பட்டியலில் இருந்து உங்கள் வங்கியைத் தேர்வு செய்ய வேண்டும்.
4. டெபிட் கார்டின் கடைசி 6 இலக்கங்கள் மற்றும் காலாவதி தேதியை உள்ளிட வேண்டும்.
5. UPI PIN-ஐ அமைத்தவுடன் UPI ID உடனடியாக செயல்படுத்தப்படும்.

பணம் செலுத்துவது எப்படி?

1. PhonePe செயலியைத் திறந்து Scan & Pay, Contact Book, Mobile Number அல்லது Pay to UPI ID ஆகியவற்றில் ஒன்றைத் தேர்வு செய்ய வேண்டும்.
2. மொபைல் எண் அல்லது UPI ID-ஐ உள்ளிட வேண்டும்.
3. செலுத்த வேண்டிய தொகையை உள்ளிட்டு UPI PIN-ஐ பதிவு செய்ய வேண்டும்.
4. உறுதிப்படுத்தியதும் பணப்பரிவர்த்தனை நிறைவடையும்.
5. வெற்றிகரமான பரிவர்த்தனைக்குப் பின்னர் உறுதிப்படுத்தல் திரையில் காட்டப்படும்.

இனி ஸ்மார்ட்போன் இல்லாதவர்களுக்கும் UPI — இணைய இணைப்பு இல்லாமல்கூட!