‘நான் வாடிக்கையாளரின் வலியை நேரில் உணர்ந்தவன்’ - ஆராய்ச்சியாளர் அனீல் குமார் மேட்ச்மேக்கர் ஆன சுவாரசிய கதை!

அனீல் குமாரைப் பார்த்தால், அவர் ஒரு ஐடி எக்ஸ்பர்ட் அல்லது, கார்ப்பரேட்டில் தலைமைப் பொறுப்பில் இருப்பவர் என்றே நினைக்கத்தோன்றும். அவரை ஒரு ‘மேட்ச்மேக்கர்’ என்று சொன்னால், அவ்வளவு எளிதாக நம்பிவிடமுடியாது, அவர் நம்மிடம் பேசும் வரை.

ஆனால், நாம் நினைத்ததுபோல, அவரது தொடக்க வாழ்க்கை அப்படித்தான் இருந்துள்ளது. ஐஐடி மெட்ராசில் படித்துவிட்டு, அமெரிக்க கடற்படையின் சூப்பர் கம்ப்யூட்டர்களில் சமன்பாடுகளைத் தீர்ப்பதில் பல ஆண்டுகளைச் செலவிட்ட ஓர் ஆராய்ச்சியாளராக, சியாட்டிலில் உள்ள ஒரு பிரத்யேக நிறுவனத்தில் இருந்து கடல்சார் துறையைச் சேர்ந்த வாடிக்கையாளர்களுக்கு ஏழு ஆண்டுகள் ஆலோசனை வழங்கிய பொறியாளராக, சிகாகோ பூத் பல்கலைக்கழகத்தில் உயரிய விருது பெற்ற எம்பிஏ பட்டதாரியாக விளங்கிய ஒருவரின் மிடுக்கு இன்றும் அவரிடம் தெரியும்.

அவரது வாட்ஸ்அப் ஸ்டேட்டஸ் கூட, “விஷயம் இருந்தால் நேரடியாகப் பேசுங்கள். சும்மா ‘ஹாய், ஹலோ, ஹே’ அனுப்பிவிட்டு பதிலை எதிர்பார்க்காதீர்கள். இது எனக்கு எரிச்சலை ஏற்படுத்தும் என்று என் நண்பர்களுக்குத் தெரியும்...” என்று தனது கறாரான, நேரடியான குணத்தையே வெளிப்படுத்தும்.

வழக்கமான வெட்டிப் பேச்சுகளில் சற்றும் விருப்பமில்லாத இந்த மனிதர்தான், கடந்த 17 ஆண்டுகளின் பெரும்பகுதியை பல பேரிடம் பேசுவதிலேயே செலவழித்துள்ளார்.

வாடிக்கையாளர்களைத் தங்களது நிறுவனத்தில் இணைக்கும்போது இரண்டு மணி நேரத்திற்கும் மேலாகப் பேசி, அவர்களுடைய வாழ்க்கையின் அடுக்குகளை ஆராய்வதும், யதார்த்தத்திற்குப் புறம்பான எதிர்பார்ப்புகளைக் கொண்டிருப்பவர்களைக் கேள்வி கேட்பதும், முகத்தில் குளிர்ந்த நீரைத் தெளித்து உண்மையை உணர வைப்பதுமே இவரது பணியாக உள்ளது.

ஆராய்சியாளர் மேட்ச்மேக்கர் ஆன கதை:

“நான் ஒன்றும் எலைட் மேட்ச்மேக்கர் இல்லை” என்று சொல்கிறார் அனீல் குமார். “நான் ஒரு தற்செயலான மேட்ச்மேக்கர். எதிர்பாராத விதமாக இந்தத் துறைக்கு வந்தவன். என் கனவு முற்றிலும் வேறொன்றாக இருந்தது,” என்று காபி ஷாப்பில் நிகழ்ந்த இந்த சந்திப்பின்போது நம்மிடம் கூறினார்.

அனீல் குமார் சென்னையில், மிகவும் முற்போக்கான ஒரு குடும்பத்தில் மூன்று சகோதரர்களில் இளையவராக பிறந்தார். பாலக்காட்டைச் சேர்ந்த அவரது தந்தை, 1960-களில் கொல்கத்தாவில் வேலை செய்தபோது அங்கிருந்த சிந்தி இனத்தைச் சேர்ந்த அனிலின் தாயாரைக் காதலித்துத் திருமணம் செய்துகொண்டார். பெற்றோர் தங்களது மகன்களுக்குக் கொடுத்த முழு சுதந்திரம்தான் அனீல் குமாரின் ஒட்டுமொத்த வாழ்க்கையையும், அவரது ஜோடி365 தளத்தின் கட்டமைப்பையும் தீர்மானித்தது.

தமிழ் சினிமாவின் உச்ச நட்சத்திரமான அஜித் குமார் இவருடைய சொந்த அண்ணன் ஆவார். ஆனால், அந்த அடையாளத்தின் மூலம் தன்னை வெளிப்படுத்திக் கொள்ளாமல், தான் ஒரு தொழில்முனைவர் என்ற தனிப்பட்ட அடையாளத்தையே விரும்புகிறவர் அனீல் குமார்.

அனீல்குமார் மற்றும் அவரின் பெற்றோரின் அந்த கனவு, ஐஐடியில் படிக்க வேண்டும் என்பது. அதுவும் ஏதோ ஒரு ஐஐடி அல்ல, ஐஐடி மெட்ராஸில் படிக்கவேண்டும் என்பதே. அவரது அந்தக் கனவு நனவாகவும் செய்தது. அதன்பிறகு, அமெரிக்காவின் ஐயோவா பல்கலைக்கழகத்தில் மெக்கானிக்கல் இன்ஜினியரிங்கில் முதுகலைப் பட்டமும், மிச்சிகன் பல்கலைக்கழகத்தில் கம்ப்யூட்டேஷனல் ஹைட்ரோடைனமிக்ஸில் பிஹெச்டி பட்டமும் பெற்றார். அவர் அமெரிக்காவில் விண்ணப்பித்த 10 முதுகலை படிப்புகளுக்குமே அவருக்கு அனுமதி கிடைத்தது. அவரது ஒட்டுமொத்த வாழ்க்கைப் பாதையும் ஒரு நிரந்தரப் பேராசிரியர் பணியை நோக்கியோ அல்லது பொறியியல் துறையின் ஒரு உயரிய பதவியை நோக்கியோதான் சென்றுகொண்டிருந்தது.

ஆனால், அதற்கு நேர்மாறாக, தனது 30-களின் மத்தியில் அனீல் குமார் அனைத்து தகுதிகளும் சாதனைகளும் கொண்ட ஒரு சிங்கிள் மனிதராக நின்றார். அப்போது சந்தையில் இருந்த ஒவ்வொரு திருமணத் தகவல் மையத் தளங்களும் அவருக்குப் பெரும் ஏமாற்றத்தையே கொடுத்தன.

தொழிலில் புராடக்ட்-மார்க்கெட் ஃபிட் இருக்கிறதா, வாடிக்கையாளர்கள் இந்தத் தயாரிப்பை ஏற்றுக்கொள்வார்களா என்று வென்ச்சர் கேபிடலிஸ்ட் முதலீட்டாளர்கள் ஸ்டார்ட்அப் நிறுவனர்களிடம் கேட்பது வழக்கம். ஆனால், அனீல் குமாரின் பதில் இதற்குக் கறாரான நேரடித்தன்மையுடன் வெளிப்படுகிறது:

“நான் ஒரு வாடிக்கையாளரின் வலியை நேரடியாக வாழ்ந்து பார்த்தவன். என் உடலில் இருக்கும் காயங்களையும், வெட்டுக்களையும், தழும்புகளையும் நீங்கள் பார்க்க வேண்டுமா?” என்று கேட்கிறார்.

அந்த வலி ஒன்றும் கற்பனையானது அல்ல. தனது 20-களின் மத்தியிலிருந்து 30-களின் நடுப்பகுதி வரை அனீல் குமார், இந்திய மற்றும் அமெரிக்காவின் முன்னணி திருமண இணையதளங்கள் அனைத்தையும் பயன்படுத்திப் பார்த்துள்ளார். ஆன்லைன் மூலம் தனக்கு ஏற்ற பெண்ணை கண்டறிந்து, அவரை திருமணம் செய்து கொள்ளப்போவதாக நினைத்தார். இரண்டு முறை இதில் ஏமாற்றமே கண்டார். அந்த இரண்டு உறவுகளுமே அவருக்குப் பெரும் ஏமாற்றத்திலும் மனவேதனையிலும்தான் முடிந்தன.

ஒருமுறை ஒரு பெண்ணுடன் தொலைபேசியில் தொடர்ந்து 17 மணி நேரம் பேசினார். அதில் முதல் 16 மணி நேரம் மிகவும் அற்புதமாக இருந்தது. ஆனால், கடைசி ஒரு மணி நேரம் அவர்கள் இருவரும் ஒருவரையொருவர் கத்திக் கதறி சண்டை போட்டுக் கொண்டதாக தெரிவித்தார்.

 “அது 17 மாதங்களோ, 17 வாரங்களோ அல்ல, வெறும் 17 மணி நேரத்திற்குள் ஒரு 17 ஆண்டுகால உறவு சுருங்கி முடிந்துவிட்டது போன்ற உணர்வைத் தந்தது,” என்கிறார் அனீல்.

மற்றொரு முறை முழுமையாக 24 மணி நேரம் நீடித்த ஒரு தொலைபேசி அழைப்பும் இருந்தது. சிகாகோ பூத் பல்கலைக்கழகத்தில் ஒரு வார இறுதி விடுமுறையில், லாஸ் ஏஞ்சல்ஸ் நகரில் இருந்த ஒரு பெண்ணைச் சந்திப்பதற்காக அனீல் விமானம் ஏறிச் சென்றார். ஆனால், அங்குச் சென்ற பிறகுதான், அந்தப் பெண்ணுக்கும், தனக்கு செட் ஆகவில்லை என்ற உண்மை அவருக்குத் தெரிந்தது.

இந்த எல்லா நிகழ்வுகளுக்கும் மத்தியில், அனீல் குமார் தனது சொந்த காதல் தோல்விகளைத் தாண்டி, அவரை மிகவும் பாதித்த ஒரு விஷயத்தைக் கவனித்தார். இந்தச் சிக்கல் அவருக்கு மட்டுமே உரியது அல்ல. அவரைப் போல நன்கு படித்த, சாதித்த, சிங்கிளாக இருக்கும் அத்தனை இளம் தொழில்முறை வல்லுநர்களுக்கும் அன்றைய திருமணத் தளங்கள் தோல்வியையே பரிசளித்தன.

சவாலே சமாளி:

இந்தியாவில் இணையப் பயன்பாடு ஒற்றை இலக்கத்தில் இருந்த அந்தக் காலகட்டத்தில், பிரபலமான திருமணத் தளங்களில் இருந்த பாதிக்கும் மேற்பட்ட ப்ரொஃபைல்களைப் பெற்றோர்களோ அல்லது பாதுகாவலர்களோதான் நிர்வகித்து வந்தனர். அந்த மேட்ரிமோனி தளங்கள் அனைத்தும் அவசரகதியில் திருமண நிச்சயம் செய்யும் தொழிற்சாலைகளாக மட்டுமே இருந்தன.

அதேநேரத்தில், வந்த டேட்டிங் ஆப்ஸ்கள் அனைத்தும் அமெரிக்கச் செயலிகளின் நகல்களாக இருந்ததால், காதலர் தினத்தன்று கூட ஜோடிகளைத் துன்புறுத்தும் வலதுசாரி அமைப்புகள் இருக்கும் இந்தியச் சமூகத்திற்கு அவை மிகவும் ஆபாசமானவையாகத் தெரிந்தன. இவை இரண்டிற்கும் இடைப்பட்ட ஒரு தளம் இங்கு இல்லவே இல்லை.

சிகாகோ பூத் பல்கலைக்கழகத்தில் தனது எம்பிஏ படிப்பின் பாதியிலேயே, மிட்வெஸ்ட்டின் முன்னணி ஏஞ்சல் நெட்வொர்க்குகளில் ஒன்றான 'ஹைட் பார்க் ஏஞ்சல்ஸ்' நிறுவனத்தின் முதல் லீட் அசோசியேட்டாக வேலை கிடைக்கப்பெற்ற அனுபவத்துடன், 2009-ஆம் ஆண்டின் தொடக்கத்தில் அனீல் குமார் 'ஜோடி365' (Jodi365) என்ற யோசனையை உருவாக்கினார். இதற்கு அவர், 'மேட்ரிமோனி365' என்றோ அல்லது 'டேட்365' என்றோ பெயரிடவில்லை, மாறாக 'ஜோடி' என்று பெயரிட்டார். இந்த ஒரு வார்த்தைதான் இந்தி, தமிழ், பெங்காலி, மராத்தி, குஜராத்தி எனப் பல இந்திய மொழிகளிலும் ஒரே அர்த்தத்தைக் கொடுக்கக்கூடியது, என்று பெயரை வைத்ததாக கூறினார்.

உங்களுக்கு ஏற்ற சரியான துணையை, உங்களுக்கு உகந்த வேகத்தில் கண்டறிவதே இதன் நோக்கம். இது பாரம்பரிய திருமணத் தளங்களுக்கும், வளர்ந்து வரும் டேட்டிங் ஆப்ஸ்களுக்கும் இடைப்பட்ட ஒரு விவேகமான கலவையாக இருக்க முயல்கிறது.

“சிகாகோவில் கருவாகி, சென்னையில் உருவாகி, உலகம் முழுவதிலும் உள்ள தரமான இந்தியர்களை இணைக்கிறது ஜோடி365,” என்ற வாசகம்தான் இந்த இணையதளத்தின் அடிக்குறிப்பில் முதல் நாளிலிருந்து இன்று வரை இடம் பெற்றுள்ளது.

அனீல் குமாரின் வெளிப்படையான ஒப்புதல் வாக்குமூலத்தின்படி, ‘ஜோடி365’ நிறுவனம் அதன் முதல் பத்தாண்டுகளில் குறைந்தது அரை டஜன் முறையாவது முடங்கிப் போயிருக்க வேண்டும். அது இன்னமும் உயிர்ப்புடன் தப்பிப் பிழைத்து இருக்கிறது என்றால், அதற்கு ஒரே ஒரு குணம்தான் காரணம்: அதுதான் ’பிடிவாதம்.’

மேட்ச்மேக்கிங் தொழில் என்பது ஒரு கொடூரமான இருபக்கச் சந்தை ஆகும். இதில் ஆண்களும் பெண்களும் தோராயமாகச் சம எண்ணிக்கையில் இருக்க வேண்டும், அதுவும் உள்ளூர்ச் சந்தைகளில் அவர்கள் அதிகமாக இருக்க வேண்டும். அப்போதுதான் கோயம்புத்தூரில் இருக்கும் ஒருவருக்குச் சென்னையில் இருப்பவரை மட்டுமே காட்டாமல் உள்ளூரிலேயே வரன் தேட முடியும்.

”மேட்ச்மேக்கிங் சந்தையில், நீங்கள் ஒருவருக்குச் சிறந்த துணையைத் தேடிக் கொடுத்துவிட்டால், உடனடியாக அந்தப் பணமளிக்கும் வாடிக்கையாளரை நீங்கள் இழக்க நேரிடும்.”

அனீல் குமார் தனது சொந்த நெட்வொர்க்கில் இருந்து சில லட்சம் டாலர்களைத் திரட்டுவதற்கு முன்பு, ஒன்பது ஆண்டுகள் எவ்வித வெளி முதலீடும் இன்றி இந்த நிறுவனத்தை நடத்தினார். தனது ஒட்டுமொத்தச் சேமிப்பையும் இதற்காக இழந்தார். அமெரிக்காவின் பென்ஷன் ஃபண்டிற்கு இணையான நிதியை, அதற்கான முன்கூட்டியே எடுக்கும் அபராதத் தொகையையும் தாங்கிக்கொண்டு முழுமையாகத் திரும்பப் பெற்றார்.

அமெரிக்காவில் தான் கட்டிய பிரத்யேக வீட்டை விற்று, அதன் மூலம் கிடைத்த 3,00,000 டாலருக்கும் அதிகமான தொகையை மீண்டும் இந்த பிசினஸிலேயே முதலீடு செய்தார். கையில் இருந்த பணம் முழுவதும் தீர்ந்துபோன இக்கட்டான காலங்களில், தமிழ் சினிமாவின் உச்ச நட்சத்திரங்களில் ஒருவரான அவரது சகோதரர் அஜித் குமார் மற்றும் அவரது பெற்றோர் உள்ளிட்ட குடும்பத்தினர் இவருக்கு நிதியுதவி வழங்கி ஆதரவு கொடுத்தனர்.

இதன் போட்டிச் சூழல் ஆரம்பத்திலிருந்தே மிகவும் இரக்கமற்றதாக இருந்தது. டிண்டர் (Tinder) செயலி உலகளவில் பிரபலமடைந்தபோது, இந்தியாவிலும் அதன் நகல்கள் உடனே உருவாகத் தொடங்கின. அதற்குப் பிந்தைய ஆண்டுகளில் வென்ச்சர் மூலதனப் பணத்தை வாரி இறைத்துத் தொடங்கப்பட்டு, பின்னர் சாம்பலாகிப் போன ஒரு டஜன் டேட்டிங் ஆப்ஸ்களின் பெயர்களை அனீல் குமார் வரிசையாகப் பட்டியலிடுகிறார்: Vee, Woo, TrulyMadly, Matchify, iCrushiFlush எனப் பல.

’TrulyMadly’ நிறுவனம் ஹெலியன் மற்றும் கே கேபிடலிடம் இருந்து 35 கோடி ரூபாய் திரட்டியது. மேலும், 'மேக்மைடிரிப்' இணை நிறுவனரின் நம்பகத்தன்மையும் அதற்கு இருந்தது, இருந்தபோதிலும் டிண்டர், பம்பிள், ஹிஞ்ச், ஓக்குகியூபிட் ஆகியவை இந்தியாவிற்குள் நுழைந்த பிறகு அது கடுமையான சவாலைச் சந்தித்தது.

“அவை அனைத்தும் நொறுங்கி காணாமல் போனது,” என்கிறார் அனீல் குமார். “இந்தியாவின் டிண்டர் சந்தை என்பது ஒரு ரத்தக்களரியான சந்தையாகத்தான் இருக்கும், ஏனெனில் இது ஒரு திறந்தவெளிச் சந்தை,” என்கிறார்.

ஒருமுறை ஒரு டாப்-டயர் விசி முதலீட்டு நிறுவனம் இவரைத் தேடி வந்தது. அனீல் குமார் விமான நிலையத்திலிருந்து அந்த நிறுவனத்தின் தலைவருடன் இரண்டரை மணி நேரம் பேசினார். ஒரே வாரத்தில் செக் எழுதித் தருவதாக அவரிடம் கூறப்பட்டது. ஆனால் அனீல் அதை நிராகரித்தார்.

“அந்தக் குறிப்பிட்ட நேரத்தில் பிசினஸை வளர்ப்பதில் எனக்கு இருந்த சவால்களுக்குப் பணம் மட்டுமே தீர்வாக இருக்கும், என்று நான் நினைக்கவில்லை,” என்கிறார் அவர்.

அதன் பிறகுதான் அந்த பெயர் உரிமப் போர் தொடங்கியது. பாரத் மேட்ரிமோனி நிறுவனம், குறைந்த கல்விப் பின்னணி கொண்ட எளிய மக்களுக்கான ஒரு புதிய தயாரிப்பாக ‘ஜோடி’ என்ற பெயரில் செயலியை அறிமுகப்படுத்தியது. அனீல் குமார் அடுத்த 10 நாட்களுக்குள் அதற்கு எதிராக ஒரு தடை அறிவிப்பை அனுப்பினார். இந்த வழக்கு சென்னை உயர் நீதிமன்றத்திற்குச் சென்றது. நீதிபதி ஒருவர் தற்காலிக மற்றும் நிரந்தரத் தடைகளை ஒரே விரைவான உத்தரவாக இணைத்து வழங்கவிருந்த தருணத்தில், அந்த நீதிபதி வேறு இடத்திற்கு மாற்றப்பட்டார். தற்போது இந்த வழக்கு இன்னும் மேல்முறையீட்டில் நிலுவையில் உள்ளது.

தனது ஆரம்பக் கால வாழ்க்கையின் பெரும் பகுதியில், ஜோடி365 ஒரு வித்தியாசமான, அளவிடக்கூடிய தளமாகவே கட்டமைக்கப்பட்டது. டிண்டர் செயலி வெறும் மூன்று கேள்விகளை மட்டுமே (வயது, இருப்பிடம், புகைப்படம்) கேட்டபோது, ஜோடி365 பயனரைப் பற்றி 50 கேள்விகளையும், அவர்களின் துணையின் விருப்பங்களைப் பற்றி 30 கேள்விகளையும் கேட்டது.

டிண்டர் நிறுவனம் புகைப்பட சரிபார்ப்பைக் கொண்டு வருவதற்கு முன்பே, ஜோடி365 ஐந்து வினாடி வீடியோ செல்ஃபி சரிபார்ப்பு முறையை அறிமுகப்படுத்தியது. ஒவ்வொரு ப்ரொஃபைலையும் மனிதர்களைக் கொண்டு கைமுறையாக ஆய்வு செய்து, ஒரு சரிபார்ப்புக்கு மூன்று முதல் நான்கு நிமிடங்கள் வரை முதலீடு செய்தது.

திருப்புமுனை கிட்டியது எப்படி?

உலகின் முன்னணி பயண இணையதளங்கள் பயன்படுத்தும் அமைப்புகளுக்கு இணையாக, மில்லி விநாடிகளில் பல்லாயிரக்கணக்கான வரன் சேர்க்கைகளைச் செயலாக்கக் கூடிய அதிநவீன கிராஃப் டேட்டாபேஸ் மூலம் இயங்கும் மேட்ச்மேக்கிங் இன்ஜினை இது உருவாக்கியது.

ஆனால், சந்தை அனீல் குமாருக்கு அவர் கேட்க விரும்பாத ஓர் உண்மையைத் தொடர்ந்து உணர்த்திக் கொண்டே இருந்தது. சரிபார்ப்பை முடித்த பாதி ப்ரொஃபைல்கள் மீண்டும் அந்தத் தளத்திற்குத் திரும்பவே இல்லை. 30 விநாடி ரீல்ஸைப் பார்ப்பதே ஒரு பெரிய அர்ப்பணிப்பாகக் கருதப்படும் இந்த யுகத்தில், இத்தகைய நீளமான மற்றும் கடினமான பதிவு முறை, கெட்டவர்களை வடிகட்டுவதை விட நல்ல வாடிக்கையாளர்களைத் தளத்தை விட்டே வேகமாக வெளியேற்றிக் கொண்டிருந்தது.

இறுதியில் ஒரு சரணாகதி மூலம் அந்த மாபெரும் திருப்புமுனை கிடைத்தது. அனீல் குமார் பெரிய அளவிலான வளர்ச்சியைத் தேடுவதை நிறுத்திவிட்டு, அதன் உண்மையான தாக்கத்தில் கவனம் செலுத்தத் தொடங்கினார்.

“முட்டாளே, இங்கு முக்கிய வார்த்தை ‘வளர்ச்சி’ அல்ல, ‘தாக்கம்’ தான் என்று எனக்கு நானே சொல்லிக்கொண்டேன். என்னால் சமூகத்தின் டாப் 1 சதவீதம் அல்லது டாப் 10 சதவீத மக்களுக்கு ஒரு மாற்றத்தை உருவாக்க முடியும். உண்மையான நோக்கமும், அதற்கான வசதியும் உள்ள மனிதர்கள் அவர்கள்,” என்கிறார்.

ஜோடி365 அதன் பிறகு முற்றிலும் தனிப் பயனாக்கப்பட்ட ஒரு பிரத்யேக சேவையாக மாறியது. வாடிக்கையாளர்களே தங்களுக்குப் பிடித்த வரன்களைத் தேடிப் பார்க்கும் முறை முற்றிலும் மூடப்பட்டது. பயனர்கள் இப்போதும் இணையதளம் மற்றும் மொபைல் செயலி மூலமாகவே உள்வாங்கப்பட்டு, விரிவான கேள்விகளுக்குப் பதிலளிக்கின்றனர். ஆனால் அதன்பிறகு, அனீல் குமாரின் குழுவைச் சேர்ந்த ஒரு உறுப்பினர் அந்தப் பொறுப்பை முழுமையாக ஏற்றுக்கொள்கிறார்.

நிறுவனம் ‘சிக்னேச்சர் டயர்’ என்று அழைக்கும் மிக உயரிய சேவையில் அனீல் குமார் நேரடியாகக் களமிறங்கும்போது, அந்த நேர்காணல் அமர்வு இரண்டு மணி நேரத்திற்குக் குறைவாக இருப்பதே இல்லை. ஒவ்வொரு கேள்வியும் ஒரு பெரிய உரையாடலாக மாறுகிறது. ‘கண்டிப்பாக இருக்க வேண்டியவை’ எவை, ‘இருந்தால் நல்லது’ எவை என்று தனித்தனியாகப் பிரிக்கப்படுகின்றன. விருப்பங்கள் என்பவை வெறும் ஆம்/இல்லை என்ற விதிகளாக இல்லாமல், ஒரு விரிவான கோணத்தில் ஆராயப்படுகின்றன:

எது சிறந்தது, எது சிறந்ததாக இல்லாவிட்டாலும் ஏற்றுக்கொள்ளக் கூடியது, எது எக்காரணம் கொண்டும் ஏற்றுக்கொள்ள முடியாத அசைக்க முடியாத எல்லை என்று அலசப்படுகிறது.

“ஒரு கடையில் இருக்கும் குறிப்பிட்ட பொருட்களை விற்கும் ஒரு கடைக்காரனாக என்னை நினைக்காதீர்கள்," என்கிறார் அனீல் குமார். என்னை உயர் பதவிகளுக்கு ஆட்களைத் தேடும் அதிகாரியாக நினைத்துக் கொள்ளுங்கள்," என்று கூறுகிறார்.

இந்த ஒப்பீடு ஏதோ தற்செயலானது அல்ல. ஜோடி365 நிறுவனத்தின் இந்தச் சேவை ஒரு நிறுவனத்தின் உயர்பதவிக்கான தேடலைப் போன்றே கட்டமைக்கப்பட்டுள்ளது.

தேடுவது, திரையிடுவது, சரிபார்ப்பது மற்றும் வாடிக்கையாளர்கள் தங்களது நாகரிகம் கருதியோ அல்லது சங்கடத்தினாலோ நேரடியாகக் கேட்கத் தயங்கும் கேள்விகளை இவர்களே முன்னின்று நடத்துவது போன்ற பணிகளைச் செய்கிறது. நீங்கள் எவ்வளவு சம்பாதிக்கிறீர்கள்? உங்கள் சொத்து மதிப்பு என்ன? கடந்த காலத்தில் எத்தனை உறவுகள் இருந்தன? உங்கள் திருமணம் எப்படி முடிவுக்கு வந்தது? என்பன போன்ற பல கேள்விகள் கேட்கப்படுகின்றன.

“ஒரு நம்பகமான இடைத்தரகரின் மதிப்பைச் சிலர் குறைத்து மதிப்பிடுகிறார்கள்,” என்கிறார் அனீல் குமார்.

அதற்கேற்ப இந்தச் சேவையின் கட்டணமும் நிர்ணயிக்கப்பட்டுள்ளது. இதற்கான குறைந்தபட்ச முன்பணம் ஒரு லட்ச ரூபாயாகும், மேலும் திருமண நிச்சயம் ஆன பிறகு அதன் வெற்றிக் கட்டணமாக மற்றொரு ஒரு லட்சம் ரூபாய் வசூலிக்கப்படுகிறது.

அனீல் குமாரின் தனிப்பட்ட ஆலோசனைகள் அடங்கிய சிக்னேச்சர் டயர் சேவை 5 லட்சம் ரூபாயிலிருந்து தொடங்குகிறது. இத்தகைய அதிகப்படியான கட்டணம் இருந்தபோதிலும், அனீல் குமார் தனது குழுவில் கூடுதல் ஆட்களைச் சேர்க்கும் வரை வாடிக்கையாளர்கள் நீண்ட காத்திருப்புப் பட்டியலில் இருக்க வேண்டியுள்ளது.

கடந்த இரண்டு மாதங்களில் மட்டும், வாடிக்கையாளர்களை நேரடியாகக் கையாளும் கைதேர்ந்த ஆறு புதிய அசோசியேட்டுகள் இக்குழுவில் இணைந்துள்ளனர். இந்த ஆண்டு பாதியடைவதற்குள் வாடிக்கையாளர் சேவை மற்றும் பின்னணி தொழில்நுட்பப் பணிகளுக்காக மேலும் ஆறு பேரைச் சேர்த்து தனது குழுவின் திறனை விரிவுபடுத்த அனீல் திட்டமிட்டு வருகிறார்.

குறிப்பிடத்தக்க அணுகுமுறை:

அனீல் குமார் சமீபத்திய ஆண்டுகளில் சமூக ஊடகங்களில் ஒரு முக்கியமான குரலாக மாறியுள்ளார். மேட்ச்மேக்கிங் ஆலோசனைகள், உறவுகள் குறித்த ஞானம் மற்றும் களத்தில் தனது வாழ்நாளில் கற்றுக்கொண்ட கடினமான பாடங்கள் குறித்து அவர் தொடர்ந்து பதிவிட்டு வருகிறார்.

இந்த எந்தவொரு பதிவிலும் அவர் 'ஜோடி365' என்ற தனது நிறுவனத்தின் பெயரை எங்குமே குறிப்பிடுவதில்லை. இந்த உள்ளடக்கம் ஒரு விளம்பர உத்தி அல்ல, மாறாக, தான் கற்றுக்கொண்ட விஷயங்களை மற்றவர்களுடன் பகிர்ந்து கொள்ள வேண்டும் என்ற அவரது உள்ளார்ந்த உந்துதல்தான் அதற்குக் காரணம்.

“நான் வணிகத்திற்காக எங்கும் விளம்பரம் செய்வதில்லை. இந்த சமூக ஊடகப் பதிவுகளின் மூலம் புதிய வாடிக்கையாளர்கள் ஜோடி365 தளத்தைத் தேடி வருவது ஒரு மகிழ்ச்சியான விளைவே தவிர, அது அதற்கான நோக்கம் அல்ல. யாராவது அவருக்கு நேரடித் செய்தி அனுப்பி, எங்களைப் போன்றவர்களுக்கும் நீங்கள் சேவை செய்கிறீர்களா என்று கேட்டால், அவரது பதில் என் குழுவிடம் பேசுங்கள் என்பதே,” என்கிறார்.

இந்த அணுகுமுறை, காலப்போக்கில் ஓர் அமைதியான வெற்றிக் சக்கரமாக மாறியுள்ளது. இயற்கையான ஆர்வமும், வாய்வழிப் பாராட்டுக்களும், வெற்றிகரமான திருமணங்கள் மூலம் கிடைக்கும் பரிந்துரைகளும் இந்த நிறுவனத்தை வளர்த்து வருகின்றன.

ஜென்ஸீ இளைஞர்கள் மேட்ச்மேக்கிங் துறையிலிருந்து என்ன எதிர்பார்ப்பார்கள் என்ற கேள்விக்கு, அவரிடம் அது தொடர்ந்து கேட்கப்பட்ட போதிலும், மிகவும் எச்சரிக்கையுடன்தான் பதிலளிக்கிறார்.

“இந்தத் துறை இன்னும் பரிணாம வளர்ச்சியடைந்து கொண்டிருக்கிறது...” என்று கூறுகிறார். அவர் கவனித்த ஒரு விஷயம் என்னவென்றால், இன்றைய குடும்பங்கள் மாறிவிட்டன.

ஒரு காலத்தில் முறைசாரா மேட்ச்மேக்கர்களாகச் செயல்பட்ட அத்தைகள், மாமாக்கள் மற்றும் அண்டை வீட்டாரின் விரிவுபடுத்தப்பட்ட நெட்வொர்க்குகள் மறைந்து, கூட்டுக் குடும்பங்கள் தனிக் குடும்பங்களாகச் சுருங்கிவிட்டன. ஒரு காலத்தில் முடங்கிப்போகும் அளவிற்கு ஒரு களங்கமாக இருந்த விவாகரத்து, இன்று பெரும்பாலான குடும்பங்கள் தங்களுக்கு மிக அருகிலேயே எதிர்கொள்ளும் அளவிற்கு மிகவும் சாதாரணமான ஒன்றாக மாறிவிட்டது. பெற்றோர்கள் இன்னும் இந்தத் தேடலில் ஈடுபடுகிறார்கள், ஆனால் இறுதி முடிவு என்பது முழுக்க முழுக்கக் பிள்ளைகளின் கைகளில்தான் இருக்கிறது.

“நாங்கள் அதிகபட்சமாக அவர்களிடம் கேட்பது ஒன்றே ஒன்றுதான்: உங்கள் தேடலிலும் இறுதி முடிவெடுப்பதிலும் உங்கள் பெற்றோரின் பங்களிப்பு எந்த அளவிற்கு இருக்கிறது? அதற்கான பதில் எப்போதும் ஒன்றாகத்தான் இருக்கிறது. தேடல் என்பது கூட்டு முயற்சியாக இருந்தாலும், இறுதி முடிவு அவர்களுடையதுதான்.”

இந்த எல்லா ஆலோசனைகளுக்கும் நம்பகத்தன்மை சேர்க்கும் ஒரு விஷயம் என்னவென்றால், அனீல் குமாரும் தனது சொந்த வாழ்க்கையில் இந்த எல்லா விளைவுகளையும் முழுமையாகச் சந்தித்தவர் என்பதுதான்.

ஜோடி365 நிறுவனத்தைக் கட்டமைக்கத் தொடங்கிய சில ஆண்டுகளில், சென்னையில் நடந்த ஒரு எம்பிஏ நெட்வொர்க்கிங் டின்னரில் அவர் தனது வருங்கால மனைவியைச் சந்தித்தார். தீவிரமான காதல், திருமணம், ஆனால், அதன் பிறகு ஏற்பட்ட ஒரு கடினமான விவாகரத்து அவரைத் தனது 47-வது வயதில் மீண்டும் சிங்கிளாக்கியது. ஆனால் இது மற்றவர்கள் சரியான துணையைத் தேர்ந்தெடுக்க உதவ வேண்டும் என்ற அவரது உறுதியை மேலும் வலுப்படுத்தியது.

முற்போக்கான பின்னணியில் வளர்ந்தவர் என்ற முறையில், அவரது திருமணத் தளத்தில் பயனர்கள் ஒன்றுக்கும் மேற்பட்ட மதங்கள், ஒன்றுக்கும் மேற்பட்ட சமூகங்களைத் தேர்ந்தெடுக்க முடிகிறது, மேலும் அடையாளத்தை ஒருபோதும் ஒரே ஒரு செக்பாக்ஸிற்குள் அது சுருக்குவதில்லை.

அஜித் குமார் பல பந்தயக் களங்களில் இயங்கும் தனது ரேசிங் டீம் கார்களில் 'Jodi365' லோகோவை ஒட்டித் தனது தம்பியின் நிறுவனத்திற்கு ஆதரவு தந்துள்ளார். இந்த உறவு ஒரு வணிக உத்தியாக இல்லாமல், குடும்பத்தின் அசைக்க முடியாத அன்பின் அடையாளமாகவே நீடிக்கிறது. அனீல் குமார் தனது இணையதளத்தில் இந்த ஆதரவை எங்குமே விளம்பரமாகப் பயன்படுத்தவில்லை.

“உறவுகளுக்கு உங்களால் எப்படி விலை பேச முடியும்?” என்று கேட்கிறார் அவர். அதில் உள்ள உண்மையை முழுமையாக நம்புகிறார்.

தனது 53-வது வயதிலும் அனீல் குமார் வாரத்தின் 7 நாட்களும் உழைக்கிறார். நிறுவனம் தற்போது லாபகரமாக இயங்கி வருகிறது. அவர் தற்போது ஸ்டார்ட்அப்களுக்கு ஏஞ்சல் முதலீடுகளைச் செய்யத் தொடங்கியுள்ளார், ஒரு தொலைக்காட்சி நிகழ்ச்சியில் விருந்தினராகப் பங்கேற்று முதலீடும் செய்துள்ளார், மேலும் ஒரு சிறிய முதலீட்டு நிதியத்தை உருவாக்குவது குறித்தும் ஆராய்ந்து வருகிறார்.

ஜோடி365 தளத்தின் சற்றே எளிமையான, இலவசப் பதிப்பைக் கொண்டு வரும் திட்டங்களும் அவரிடம் உள்ளன. நூற்றுக்கணக்கான மணி நேரங்கள் அவர் நடத்திய திருமண உரையாடல்களைக் கொண்டு பயிற்சி அளிக்கப்பட்ட ஒரு ஏஐ டிஜிட்டல் ட்வினை உருவாக்கும் ஒரு செயற்கை நுண்ணறிவுத் திட்டமும் தற்போது செயல்பாட்டில் உள்ளது; இது எதிர்காலத்தில் செயலிக்குள்ளேயே ஒரு சிறந்த ஆலோசகராகச் செயல்படும்.

ஆனால், அனீல் குமாரை இன்று மிகவும் உந்தித் தள்ளும் லட்சியம் தொழில்நுட்பம் சார்ந்தது அல்ல. அது அவரது தனிப்பட்ட வாழ்க்கை சார்ந்தது. அவர் இன்னும் ஒரு தந்தையாக மாறவில்லை. ஆனால் அதற்கான சாத்தியக் கூறுகளை அவர் இன்னும் கைவிடவில்லை. தனது வாழ்க்கையின் பெரும்பாலான விஷயங்களை அணுகுவதைப் போலவே, இதையும் அவர் அசாத்திய வெளிப்படைத்தன்மையுடன் அணுகுகிறார்.

“ஆரோக்கியம்தான் எல்லாவற்றையும் விட முக்கியம் என்பதை எனக்கு நானே அதிகமாக நினைவூட்டிக் கொள்கிறேன். இன்னும் கடக்க வேண்டிய தூரம் முன்னால் நிறைய இருக்கிறது,” என்கிறார் அவர்.