தமிழ்நாட்டைச் சேர்ந்த ‘உதயம் அக்ரோ ஃபுட்ஸ்’-ன் 70% பங்குகளை வாங்கியது ரிலையன்ஸ்!

தமிழ்நாட்டின் பாரம்பரியமான அக்ரோ உணவுப் பொருட்கள் நிறுவனமான ‘உதயம் அக்ரோ ஃபுட்ஸ்’ நிறுவனத்தில் ரிலையன்ஸ் கன்சூமர் புரொடக்ட்ஸ் லிமிடெட் (RCPL) 70%க்கும் அதிகமான பங்குகளை கையகப்படுத்தியுள்ளது. இந்த ஒப்பந்தத்தின் மதிப்பு வெளிப்படுத்தப்படவில்லை. ஆண்டுக்கு ரூ.600 கோடிக்கும் மேற்பட்ட வருவாயைக் கொண்ட நிறுவனம் இது எனத் தகவல்கள் தெரிவிக்கின்றன.

சுமார் முப்பது ஆண்டுகளுக்கு முன்பு தொடங்கப்பட்ட உதயம் அக்ரோ ஃபுட்ஸ், தற்போது ரூ.668 கோடி வர்த்தக அளவைக் கொண்டதாக மதிப்பிடப்படுகிறது. அரிசி, பருப்பு, மசாலா, ஸ்நாக்ஸ், இட்லி மாவு உள்ளிட்ட ரெடி-டு-குக் காலை உணவுப் பொருட்கள் வரை விரிந்த தயாரிப்பு வரிசையுடன், தமிழ்நாடு மற்றும் அண்டை மாநிலங்களில் வலுவான விநியோக வலையமைப்பை நிறுவனம் பெற்றுள்ளது.

இந்த கூட்டு முயற்சியின் கீழ், ரிலையன்ஸ் நுகர்வோர் தயாரிப்பு நிறுவனம் கட்டுப்பாட்டு பங்குகளை வைத்திருக்கும் நிலையில், உதயத்தின் தற்போதைய மேம்பாட்டாளர்கள் சிறுபங்கு வைத்திருப்பார்கள். ஒப்பந்தத்தின் நிதி விவரங்கள் வெளியிடப்படவில்லை.

இதுகுறித்து ரிலையன்ஸ் கன்ஸ்யூமர் நிறுவன இயக்குநர் டி.கிருஷ்ணகுமார் கூறுகையில்,

“உதயம் என்றால் தனி அறிமுகம் தேவையில்லை. பல ஆண்டுகளாக ஆரோக்கியமான உணவுப் பொருட்களை நுகர்வோருக்கு வழங்கி வரும் இந்த பிராண்டு, தமிழ்நாட்டின் பாரம்பரியத்தையும் அறிவியல் அணுகுமுறையையும் தரமான உற்பத்தியுடன் இணைக்கும் சிறந்த எடுத்துக்காட்டு,” என்றார்.

உதயம் அக்ரோ ஃபுட்ஸின் மேலாண்மை இயக்குநர் எஸ்.சுதாகர் கூறுகையில்,

“ரிலையன்ஸ் உடனான இந்த கூட்டணி, உதயத்திற்கு புதிய அத்தியாயத்தைத் தொடங்குகிறது. பல ஆண்டுகளாக தமிழ்நாட்டு நுகர்வோரின் நம்பிக்கையை பெற்றுள்ள உதயம், குறிப்பாக பிராண்டட் பருப்பு வகைகளில் தரத்திற்கான அடையாளமாக உள்ளது. இந்த கூட்டணி புதிய வளர்ச்சி வாய்ப்புகளை உருவாக்கும்,” என்றார்.

இந்நிலையில், இந்திய நுகர்வோர் சந்தையில் தற்போது ஒருங்கிணைப்பு அதிகரித்து வரும் சூழலில், இந்த ஒப்பந்தம் முக்கியத்துவம் பெறுகிறது. குறைந்த விலை, நேரடி விநியோகம், துரித வணிகம் போன்ற அம்சங்களுடன் செயல்படும் பிராந்திய மற்றும் டிஜிட்டல்-முன்னணி பிராண்டுகளால் பெரிய பாரம்பரிய நிறுவனங்களுக்கு போட்டி அதிகரித்து வருகிறது. இதன் விளைவாக, சிறிய மற்றும் நடுத்தர நிறுவனங்களை பெரிய நிறுவனங்களும் முதலீட்டாளர்களும் தீவிரமாக நாடி வருகின்றனர்.