எளிய மக்களுக்கான 'குடிநீர் ஏடிஎம்' - உ.பி. இளைஞரின் வெற்றிக் கதை!

உத்தரப் பிரதேச மாநிலம் காசியாபாத் மாவட்டத்தில், மிகக் குறைந்த விலையில் உள்ளூர் மக்களுக்குத் தூய்மையான குடிநீரை வழங்கி வருகிறது ஒரு சிறிய தானியங்கி குடிநீர் விநியோக மையம்.

அஜய் குமார் என்பவரால் அவரது 'அவிகா பெவரேஜஸ்' நிறுவனத்தின் கீழ் நடத்தப்படும் இந்த மையம், ஒரு நவீன ஆர்.ஓ வாட்டர் ஏடிஎம் போலச் செயல்படுகிறது. இங்கு பொதுமக்கள் நாணயத்தைச் செலுத்தி 20 லிட்டர் சுத்திகரிக்கப்பட்ட குடிநீரைப் பெற்றுக்கொள்ள முடியும்.

காசியாபாத் மாவட்டத்தைச் சேர்ந்த அஜய் குமார், அரசின் முதலமைச்சர் யுவ உத்யமி விகாஸ் அபியான் திட்டத்தின் கீழ் கடன் பெற்று இந்த உற்பத்திப் பிரிவை நிறுவினார்.

இந்த அமைப்பு ஒரு பெரிய நீர் சுத்திகரிப்பு நிலையத்துடன் இணைக்கப்பட்ட தானியங்கி இயந்திரமாக வடிவமைக்கப்பட்டு உள்ளதால், மக்கள் நாளின் எந்த நேரத்திலும் எளிதாகக் குடிநீரைப் பெற முடிகிறது.

இந்த மையத்தில், ஆழ்துளைக் கிணற்றில் இருந்து எடுக்கப்படும் நிலத்தடி நீர் முதலில் சேகரிக்கப்பட்டு, பின்னர் ஆர்.ஓ சுத்திகரிப்பு ஆலை மூலம் சுத்திகரிக்கப்படுகிறது.

இந்தத் தூய்மையான நீர் ஒரு சேமிப்புத் தொட்டிக்கு மாற்றப்பட்டு, வெளியில் உள்ள ஏடிஎம் இயந்திரத்துடன் இணைக்கப்படுகிறது. வாடிக்கையாளர்கள் தங்களது பாத்திரங்களுடன் வந்து, நாணயத்தைச் செலுத்தி, நிர்ணயிக்கப்பட்ட அளவிலான குடிநீரை எடுத்துச் செல்கின்றனர்.

யோசனை உதித்தது எப்படி?

இந்தத் தொழிலைத் தொடங்குவதற்கு முன்பு, அஜய் குமார் சிவில் இன்ஜினியரிங் படித்துவிட்டு, இந்திய வானூர்தி நிலையங்கள் ஆணையத்தில் ஒரு வருடம் அப்ரண்டிஸ் பயிற்சியை முடித்திருந்தார். அவர் தினசரி வேலைக்குச் சென்று வரும்போது, மெட்ரோ ரயில் நிலையங்களில் சிறிய அளவிலான குடிநீர் விநியோக இயந்திரங்கள் நிறுவப்பட்டிருப்பதை உற்று நோக்கினார். அந்த இயந்திரங்கள் மிகக் குறைந்த அளவு தண்ணீரை, ஒப்பீட்டளவில் அதிக விலைக்கு விநியோகித்தன.

இதைக் கவனித்த குமார், இதேபோன்ற ஓர் அமைப்பை ஏன் குடியிருப்புப் பகுதிகளுக்கு ஏற்றவாறு, பெரிய அளவில் பயன்படுத்தக் கூடாது என்று சிந்திக்கத் தொடங்கினார். இந்த சிந்தனைதான் படிப்படியாக வளர்ந்து, நடுத்தரக் குடும்பங்களுக்கு மலிவு விலையில் குடிநீர் வழங்கும் ஒரு சமூக அளவிலான வாட்டர் ஏடிஎம் யோசனையாக மாறியது.

சிறிய அளவுகளில் தண்ணீரை விற்பதற்குப் பதிலாக, குடும்பப் பயன்பாட்டிற்கு உகந்ததாக ஒரே நேரத்தில் 20 லிட்டர் தண்ணீரை விநியோகிக்கும் வகையில் அவர் தனது அமைப்பை வடிவமைத்தார். இந்தத் தானியங்கி முறை மனித உழைப்பின் தேவையையும் பெருமளவு குறைத்தது.

அஜய் குமார் இந்தத் தொழிலைத் திட்டமிட்டபோது, மூலதனப் பற்றாக்குறைதான் அவரது முதன்மை சவாலாக இருந்தது. நிதியுதவிக்கான வழிகளைத் தேடிக்கொண்டிருந்தபோது, ஒரு செய்தித்தாள் விளம்பரம் மூலம் அரசின் தொழில்முனைவோர் திட்டத்தைப் பற்றி அறிந்துகொண்டு, வழிகாட்டுதலுக்காக மாவட்டத் தொழில் மையத்தை அணுகினார். அந்தச் செயல்முறையின் மூலம், அவருக்குக் கிடைத்த கடன் உதவி, சுத்திகரிப்பு ஆலை மற்றும் தானியங்கி விநியோக இயந்திரத்தை அமைக்கப் பெரிதும் உதவியது.

இன்று, இந்த மையம் தங்குதடையின்றி இயங்கி, சுற்றுவட்டார மக்களுக்குத் தூய்மையான குடிநீரை வழங்கி வருகிறது.

அஜய் குமார் இந்த அமைப்பின் தொழில்நுட்ப அம்சங்களை நேரில் கவனித்துக் கொள்கிறார். மேலும், இரண்டு தொழிலாளர்கள் இந்த விநியோக மையத்தின் செயல்பாடுகளில் அவருக்கு உதவுகிறார்கள்.

தற்போதைய மையம் சீராக இயங்கி வருவதால், மலிவு விலை குடிநீர் கிடைக்காத மற்ற பகுதிகளுக்கும் இந்த மாதிரியை விரிவுபடுத்த குமார் திட்டமிட்டு வருகிறார்.

தினசரி பயணத்தின்போது கவனித்த ஒரு சாதாரண விஷயம், இன்று உள்ளூர் மக்களுக்கு வேலை வாய்ப்பையும், மலிவு விலை குடிநீரையும் வழங்கும் ஒரு நிலையான சிறு தொழிலாக உருவெடுத்துள்ளது.