'நுண்ணறிவு நாயகிகள்' – AI வளர்ச்சியில் தடம் பதித்த சாதனை பெண்களை அறிமுகம் செய்யும் புதிய தொடர்!

யுவர்ஸ்டோரி தமிழ் வாசகர்களுக்கு 'கம்ப்யூட்டர் பெண்கள்' தொடரை நினைவிருக்கலாம். கம்ப்யூட்டர் துறை வரலாற்றிலும், வளர்ச்சியிலும் முக்கிய அங்கம் வகிக்கும் முன்னோடி பெண்களின் பங்களிப்பை விவரிக்கும் வகையில் இந்த தொடர் அமைந்திருந்தது. இதன் அடுத்த கட்டமாக, ஏஐ எனப்படும் செயற்கை நுண்ணறிவு துறையில் முக்கிய பங்காற்றிய பெண்களை மையமாகக் கொண்டு, ‘நுண்ணறிவு நாயகிகள்’ எனும் இந்த புதிய தொடர் அமைகிறது.

செயற்கை நுண்ணறிவு பெரும் பாய்ச்சல்களை நிகழ்த்திக்கொண்டிருக்கும் காலத்தில், அதன் விளைவாக ஏஐ நுட்பம் சமூகத்தின் எல்லா துறைகளிலும் நுழைந்து தாக்கத்தை ஏற்படுத்திக்கொண்டிருக்கும் நிலையில், ஏஐ துறையின் வளர்ச்சியில் பெண்களின் பங்களிப்பை மையப்படுத்தும் வகையில் இந்த தொடர் அமைகிறது.

ஏஐ துறையில் ஆய்வாளர்களாகவும், தொழில்முனைவோர்களாகவும், தொழில்நுட்ப வல்லுனர்களாகவும் பெண்கள் செயல்பட்டு வருவதன் பிரதிபலிப்பாக விளங்குவது மட்டும் அல்ல இந்த தொடரின் நோக்கம் – ஏஐ நுட்பத்தின் அடுத்த கட்ட வளர்ச்சியிலும், அதன் முழு பயனை மனித குலம் அடைவதிலும், பெண் ஆய்வாளர்களின் பங்கு முக்கியமானது எனும் கருத்தை வலியுறுத்துவதும் இதன் நோக்கமாக அமைகிறது.

நவீன ஏஐ நுட்பத்தின் ஆற்றல் மற்றும் அதன் பலன்கள் வியப்பை ஏற்படுத்தினாலும், இதற்கு மறுபக்கமும் இருக்கிறது. ஏஐ சாட்பாட்களும், ஏஐ ஏஜெண்ட்களும் செயல்திறன் மிக்கது, என சொல்லப்பட்டாலும், இவற்றின் செயல்பாட்டில் வரம்புகளும், போதமைகளும் இருக்கவே செய்கின்றன. குறிப்பாக ஏஐ சேவைகளின் செயல்பாட்டில் மறைந்திருக்கக் கூடிய சார்புகளும், சாய்வுகளும் கவலை அளிப்பதாக இருக்கின்றன.

ஏஐ; மனித தரவுகள் சார்ந்தே இயங்குவதால், அவற்றுக்கு பயிற்சி அளிக்க பயன்படும் தரவுகளில் இருக்கும் ஏற்றத்தாழ்வும், பாகுபாடும் ஏஐ வெளிப்பாட்டிலும் பிரதிபலிக்கின்றன. அதாவது, சமூகத்தில் இருக்கும் இன பாகுபாடும், பாலின பாகுபாடும் ஏஐ சேவைகளிலும் வெளிப்படுவதோடு, பல மடங்கு பெரிதாவதும் தெரிய வந்துள்ளது.

வேலைவாய்ப்பு தொடர்பான தேடலில் சி.இ.ஓ. போன்ற தலைமை பதவிகளுக்கு ஏஐ அல்கோரிதம்கள் பெரும்பாலும் வெள்ளை ஆண்களை பெயரையே சுட்டிக்காட்டுவதுவதும், பெண்கள் என்றால், செவிலியர்கள், நர்ஸ்கள் போன்ற வேலைக்கு தகுதியானவர்கள் எனும் பாலின சார்பை பிரதிபலிப்பதையும் இதற்கான உதாரணங்களாக சொல்லலாம்.

இதே போல, அல்கோரிதமின் சார்பால், கருப்பினத்தவர் பல விதங்களில் பாதிக்கப்படுவதும் பல இடங்களில் பதிவாகியுள்ளன. ஏஐ தொடர்பான பாதுகாப்பு சார்ந்த இடர்கள் ஒரு பக்கம் என்றால், ஏஐ செயல்பாட்டில் மறைந்திருக்கும் பாலின பாகுபாடு போன்ற சிக்கல்கள் சமூக நோக்கில் பெரும் பாதிப்பை ஏற்படுத்தக்கூடியவை, என அஞ்சப்படுகிறது.

எனவே தான், ஏஐ ஆய்விலும் உருவாக்கத்திலும் சமத்துவமான பார்வை தேவை, என வலியுறுத்தப்படுகிறது. இந்த பின்னணியில் ஏஐ ஆய்வில் பெண்களின் பங்களிப்பு இன்னும் அவசியமாகிறது. இதற்கேற்ப ஆய்வாளர்களாகவும், விஞ்ஞானிகளாகவும் பெண்கள் ஏஐ பரப்பில் செயல்பட்டு வருவதோடு, ஏஐ குறைகளை கண்டறிந்து வெளிச்சத்திற்கு கொண்டு வரும் செயல்பாட்டாளர்களாகவும், சார்பில்லாத சேவைகள் தேவை என குரல் கொடுக்கும் விமர்சகர்களாகவும் பங்களித்து வருகின்றனர். இத்தகைய சேவைகளை உருவாக்கும் ஆய்விலும் தீவிரம் காட்டுகின்றனர்.

ஏஐ நுட்பத்தை வளர்த்தெடுப்பதில் மட்டும் அல்லாமல், ஏஐ சார்ந்த பிரச்சனைகளை கண்டறிந்து அவற்றுக்கு தீர்வு காண்பதிலும் முன்னணியில் நிற்கும் மற்றும் ஏஐ உருவாக்கப்படும் விதம் மற்றும் செயல்படும் விதம் தொடர்பான விமர்சனங்களை முன்வைத்து விழிப்புணர்வை ஏற்படுத்தி வரும் நுண்ணறிவு நாயகிகளை இந்த தொடரில் அறிமுகம் செய்து கொள்ளலாம்.

1- பேச்சறிதல் நாயகி ஜேனேட் பேக்கர்

ஏஐ துறையில் பல முன்னோடி பெண்கள் இருந்தாலும், பேச்சறிதல் நுட்பத்தில் முக்கிய பங்காற்றிய ஜேனேட் பேக்கரிடம் (Janet Baker) இருந்து இந்த தொடரை துவக்குவது பலவிதங்களில் பொருத்தமாக இருக்கும்.

ஜேனேட் பேக்கர் தனது கனவர் ஜேம்ஸ் பேக்கருடன் இணைந்து உண்டாக்கிய டிராகன் நேச்சுரலி ஸ்பீக்கிங், பேச்சறிதல் நுட்பத்தை அடிப்படையாகக் கொண்ட முதல் வர்த்தக சேவை என்பதோடு, வெகுமக்கள் கவனத்தை ஈர்த்த முதல் ஏஐ சார்ந்த சேவைகளில் ஒன்றாகவும் திகழ்வது முக்கிய காரணம்.

அதே நேரத்தில், ஏஐ நுட்பத்தின் முக்கிய உட்பிரிவுகளில் ஒன்றாக விளங்கும் பேச்சறிதல் உருவான விதம் ஏஐ வரலாற்றில் எதிர்கொள்ளப்பட்ட சவால்களையும், சிக்கல்களையும் உணர்த்துவதாக இருப்பது இன்னொரு காரணம். பேச்சறிதலில், டிராகன் மென்பொருளை மிஞ்சக்கூடிய நவீன ஏஐ சேவைகள் உருவாகியுள்ளன என்றாலும், இந்த புதிருக்கு தீர்வு காண டிராகன் பின்பற்றிய வழிமுறை, எது உண்மையான ஏஐ எனும் ஆதார கேள்வியையும் எழுப்புவதாக இருக்கிறது.

ஏஐ வரலாற்றையும், அதன் வரம்புகளையும் புரிந்து கொள்ள உதவும் சேவையாகவும் டிராகன் சேவை விளங்குகிறது. இந்த பயணத்தில் ஆய்வாளராக மட்டும் அல்லாமல் தொழில்முனைவு நோக்கம் கொண்டவராகவும் ஜேனேட் பேக்கர் மிளிர்கிறார்.

பேச்சறிதல் நுட்பம்

பேச்சறிதலை சாத்தியமாக்குவதற்கான தீவிர ஆய்வை ஜேனேட் பேக்கர் தனது கணவரோடு சேர்ந்து துவங்கினார். அப்போது தான் அவர்களுக்கு திருமணம் ஆகியிருந்தது என்பது தான் சுவாரஸ்யமான விஷயம். ஆய்வு மாணவர்களான இருவரும் அமெரிக்காவின் ராக்பெல்லர் பல்கலையில் படித்துக்கொண்டிருந்த போது அறிமுகமாகி, காதலித்து திருமணமும் செய்து கொண்டனர்.

ஜெனே அப்போது உயிரி இயற்பியல் துறை ஆய்வில் ஈடுபட்டிருந்தார். அவரது வழிகாட்டி ஜெரோம் லெவிட்டின் உருவாக்கியிருந்த ’ஆசிலாஸ்கோப்’ இயந்திரம் கொண்டு ஆய்வு செய்து கொண்டிருந்தார். நரம்பியல் அமைப்பு தகவல்களை செயலாக்கம் செய்யும் விதம் குறித்து அவரது ஆய்வு அமைந்திருந்தது.

கம்ப்யூட்டர் பேச்சு

அவரது ஆய்வகத்திற்கு ஜிம் ஒரு முறை வருகை தந்த போது, கம்ப்யூட்டர் திரையில் கோடுகள் மேலும் கீழுமாக தொடர்ச்சியாக தோன்றி கொண்டிருப்பதை பார்த்தார். மனித பேச்சு வடிவின் செயலாக்கம் அது என்பதை தெரிந்து கொண்ட போது அதன் அமைப்பில் அவருக்கு ஆர்வம் உண்டானது. கணித வல்லுனரான ஜிம், மனித பேச்சு வடிவத்தை இப்படி திரையில் பிரதிபலிக்க செய்ய முடியும் என்றால் அதன் பொது தன்மைகளையும் கணக்கிடலாம், என நினைத்தார். இது அவர்களை மேலும் இணைக்கும் புள்ளியானது.

பேச்சறிதல் புதிரை விடுவிக்கும் ஆய்வில் ஈடுபடுவது என இருவரும் தீர்மானித்தனர்.

மனிதர்கள் பேசுவதை கம்ப்யூட்டர் போன்ற இயந்திரம் கேட்டு புரிந்து கொள்ள வழி செய்யும் பேச்சறிதல் என்பது கருத்தாக்க அளவில் ஈர்ப்புடையதாக இருந்தாலும், அதற்கான நடைமுறை சாத்தியம் எண்ணற்ற தடைகளை கொண்டிருந்தது. மனிதர்கள் பேச்சொலியை கேட்டு, அதன் அர்த்தம், பேசுபவரின் நோக்கம், பேசப்படும் மொழி என பல்வேறு அம்சங்களை ஒன்று கலந்து மிக எளிதாக அதன் அர்த்தத்தை புரிந்து கொள்கின்றனர்.

ஒரே சொல்லை ஒவ்வொருவரும் ஒரு விதமாக பேசினாலும் கூட சிறு குழந்தை கூட அந்த சொல்லை உணர்ந்து கொள்கிறது.

ஆனால், ஒரு கம்ப்யூட்டருக்கு இந்த ஆற்றலை ஏற்படுத்தி தருவது என்பது எண்ணிலடங்கா சிக்கல்களை கொண்டதாக இருந்தது. கம்ப்யூட்டருக்கு மனித மொழிகள் தெரியாது, சொற்களின் பொருளும் தெரியாது, அவற்றின் உச்சரிப்பையும் உணர முடியாது எனும் போது, எவ்விதம் அவற்றுக்கு பேசப்படும் சொற்களை கண்டறிய கற்றுத்தருவது என்பது அறிவியலுக்கு அப்பாற்பட்ட கேள்வியாக தோன்றியது.

ராணுவ ஆதரவு

இதை எல்லாம் மீறி மேற்கொள்ளப்பட்ட முயற்சியின் பெரும் சாதனையாக ‘பெல் லேப்ஸ்’ உருவாக்கிய ஆட்ரே எனும் கம்ப்யூட்டர் அமைப்பு, பூஜ்ஜியம் முதல் 9 வரையான எண்கள் உச்சரிப்பை கண்டறியும் திறன் கொண்டிருந்ததாக உருவாக்கப்பட்டிருந்தது. இதை சாத்தியமாக்கவும், அந்த எண்களின் பேச்சொலியை பதிவு செய்து பட்டியலாக்கி, கேட்கப்படும் ஒலியோடு ஒப்பிட்டு பார்த்து தீர்மானிக்க வேண்டியிருந்தது.

செயற்கை நுண்ணறிவின் ஒரு கிளையாக பேச்சறிதல் தொடர்பான ஆய்வு சவால்களை மீறி தொடர்ந்து மேற்கொள்ளப்பட்டாலும், ஒரு கட்டத்தில் இது சாத்தியமே இல்லை, என கைவிடும் நிலை உண்டானது. செயற்கை நுண்ணறிவு ஆய்வுலகிற்கான பின்னடைவாகவும் இது அமைந்தது. ஆனால், அதிர்ஷ்டவசமாக அமெரிக்காவின் ராணுவ ஆய்வு பிரிவு, பேச்சறிதல் ஆய்வை ஊக்குவிக்கத் தயாராக இருந்தது.

ராணுவத்திற்கு நடைமுறையில் பயன்படக்கூடிய தீர்வை கண்டறியும் பேச்சறிதல் ஆய்வு குழுக்களுக்கு நிதி அளிக்கவும் முன் வந்தது. ஆயிரம் சொற்களை கண்டறியும் அமைப்பை உருவாக்கினால் கூட போதும், என அறிவிதத்து. இந்த வரம்பில் இருந்தே பேச்சறிதலுக்கான சவாலையும் உணரலாம்.

இதே கால கட்டத்தில் தான் பேக்கர் தம்பதி பேச்சறிதல் ஆய்வில் ஆர்வம் கொண்டிருந்தனர். பேச்சறிதல் ஆய்வுக்கான நிதி பெற்ற அமைப்புகளில் ஒன்றான காரனகி மெலான் பல்கலைக்கு இருவரும் ஆய்வாளர்களாக வந்து சேர்ந்தனர்.

டாக்டர் கனவு

ஜேனேட் ஐந்து வயதாக இருக்கும் போதே டாக்டராக வேண்டும் என விரும்பினார். அந்த ஆர்வத்தோடு மனித உடற்கூறு தொடர்பான புத்தகத்தை படித்து பார்க்க முயற்சித்தாலும், புத்தகத்தை அவரால் தொடர்ந்து படிக்க முடியவில்லை. ஆனால், உடலின் மற்ற அமைப்புகளை புரிந்து கொள்ளாமல் மற்ற எந்த ஒரு அமைப்பையும் புரிந்து கொள்வது சாத்தியமில்லை எனும் பாடத்தை அதன் மூலம் கற்றுக்கொண்டார். இந்த பாடம் பேச்சறிதல் ஆய்வு பயணத்தில் பின்னர் கைகொடுத்தது.

ஜேனேட் தனது ஆய்வு ஏட்டுச்சுரைக்காயாக இல்லாமல், சமூகத்திற்கு நடைமுறை பயன்பாடு கொண்டிருக்க வேண்டும், என விரும்பினார். இந்த எண்ணத்துடன் தான் பேச்சறிதல் சவாலை ஏற்றுக்கொண்டிருந்தார்.

பேச்சறிதல் ஆய்வை பொருத்தவரை அதன் சிக்கலான தன்மைக்கேற்ப தீர்வு காணும் வழிமுறையும் மிகவும் சிக்கலான தன்மை கொண்டிருந்தது. மனிதர்கள் மிக சுலபமாக புரிந்து கொள்ளும் பேச்சை, கம்ப்யூட்டருக்கு புரிய வைக்க வேண்டும் எனில், மொழியியல் அறிவு, இலக்கணம் விதிகள், சொற்களின் அமைப்பு, பேச்சாளர் யார் போன்ற அம்சங்கள் எல்லாம் கலந்த செயல்பாடு தேவை என கருதப்பட்டது.

அது மட்டும் அல்லாமல் தனித்தனி சொற்களை அடையாளம் காண வைப்பது ஓரளவு சாத்தியமானாலும், தொடர்ந்து பேசப்படும் சொற்களை உணர வைப்பது என்பது பெரும் சவாலாக அமைந்தது.

கணிதம் காட்டிய வழி

இதற்கு மாறாக, கணிதவியல் சார்ந்த மாதிரி அணுகுமுறையை பேக்கர் தம்பதி கொண்டிருந்தனர். கணிதவியலில் பிரபலமாக இருந்த மார்கோவ் மாதிரி கருத்தாக்கம் சார்ந்து முழுக்க முழுக்க புள்ளியியல் அடிப்படையிலான ஒரு மாதிரியை உருவாக்கினர். இதற்காக ஆங்கிலத்தில் அடுத்தடுத்து வரக்கூடிய இரண்டு மூன்று சொற்களை கண்டறிந்து அவற்றை அகராதியாக தொகுத்தனர்.

அடுத்த கட்டமாக பேசப்படும் ஒலிக்கு ஏற்ப சொற்களை கண்டறிவதோடு, இந்த அகராதியில் பொருத்திப்பார்த்து அதிக வாய்ப்புள்ள சொற்களை தேர்வு செய்யும் அல்கோரிதமையும் உருவாக்கினர். இந்த முறையில், இலக்கண விதிகள், மொழியறிவு, நுண்ணறிவு எதுவும் இல்லாமல் எல்லாமே எண்கள் சார்ந்து அமைந்திருந்தது.

பேசப்படும் சொற்களின் பொருளை கருத்தில் கொள்ளாமல், சொற்கள் தோன்றும் வரிசையின் புள்ளியியல் தன்மை அடிப்படையில் பேச்சறிதலை இவர்கள் அணுகிய விதம் மற்ற ஆய்வாளர்களுக்கு திகைப்பை ஏற்படுத்தியது. மொழியை இவ்விதம் மாதிரியாக்க முடியாது என விமர்சனம் எழுந்தது. ஆனால், பேக்கர் தம்பதி தங்கள் முறையில் நம்பிக்கை கொண்டிருந்தனர்.

இதனிடையே, அவர்கள் ஐபிஎம் நிறுவனத்தில் பணிக்கு சேர்ந்திருந்தனர். அங்கும் ஆய்வை தொடர்ந்தாலும், பேச்சறிதல் ஆய்வை நிஜ உலக சூழலில் சோதித்துப் பார்க்க முடியாத கட்டுப்பாட்டால் வெறுத்துப்போய் விலகி வந்து சொந்த நிறுவனத்தை தனியே துவக்கினர்.

டிராகன் வருகை

1982ம் ஆண்டு இப்படி அவர்கள் துவக்கிய நிறுவனம் தான் 'டிராகன் சிஸ்டம்ஸ்' (Dragon Systems). வெளி முதலீடு எதுவும் இல்லாமல் சொந்த சேமிப்பு மற்றும் ஆய்வை மட்டுமே நம்பி நிறுவனத்தை துவக்கினர். அடுத்து வந்த ஆண்டுகளில் பேச்சறிதல் மென்பொருளில் மெல்ல முன்னேறி 1990ல் டிராகன் 'டிக்டேட்' எனும் மென்பொருளை அறிமுகம் செய்தனர். பொது பயன்பாட்டிற்கான முதல் பேச்சறிதல் மென்பொருளான இது குரல் மூலம் கம்ப்யூட்டரை தொடர்பு கொள்வதை சாத்தியமாக்கி நல்ல வரவேற்பை பெற்றது.

பேச்சறிதல் நுட்பத்தை தொடர்ந்து மேம்படுத்திய நிலையில், கம்ப்யூட்டர் நினைவுத்திறன் வளர்ச்சியும் இதற்கு ஈடுகொடுத்தது. இதன் பயன்பாக டிராகன் நேச்சுரல் ஸ்பிக்கிங் வடிவம் அறிமுகம் ஆன போது பெரும் வரவேற்பை பெற்றதோடு ஏஐ சேவைகளின் நடைமுறை பயன்பாட்டை உணர்த்தும் ஆரம்ப வெற்றிக்கதைகளில் ஒன்றாக அமைந்தது.

இன்று நவீன ஏஐ வளர்ச்சியால் பேச்சறிதல் சார்ந்த குரல் வழி சேவைகள் பெருமளவு முன்னேறி வந்துவிட்டாலும் அவற்றுக்கான ஆதார நுட்பம் என்பது டிராகன் உண்டாக்கிய அடித்தளமாகவே இருக்கிறது.