உணவுப் பாதுகாப்பு விதிகளைக் கடுமையாக்கியது Zomato - போலி சீஸ் மற்றும் பனீருக்குத் தடை!

உணவு விநியோக நிறுவனமான ஜோமாட்டோ, தனது தளத்தில் பட்டியலிடப்பட்டுள்ள உணவகங்கள் அனலாக் சீஸ் (analogue cheese), பனீர் அல்லது பிற பால் பொருட்கள் உள்ளிட்ட அனலாக் உணவு வகைகளை விற்பனை செய்வதற்கு 'பூஜ்ஜிய சகிப்புத்தன்மை' (zero-tolerance) கொள்கையைத் திங்கள்கிழமை அறிவித்தது. மேலும், இந்த விதிமுறையைப் பின்பற்றாத உணவகங்களை நீக்குவதற்கான உரிமை தங்களுக்கு இருப்பதாகவும் அந்நிறுவனம் கூறியுள்ளது.

அனலாக் உணவு வகைகள் என்பது பாரம்பரிய மூலப்பொருட்களுக்குப் பதிலாக, அதே தோற்றத்தையும் உணர்வையும் தரும் மலிவான அல்லது மாற்றுப் பொருட்களை (உண்மையான பால் அல்லது சீஸுக்குப் பதிலாகத் தாவர எண்ணெய்கள் போன்றவை) பயன்படுத்துவதாகும்.

மகாராஷ்டிராவில் உணவு மற்றும் மருந்து நிர்வாகத் துறை (Food and Drug Administration) மாநிலம் தழுவிய அளவில் மேற்கொண்ட அதிரடி நடவடிக்கைகள் மற்றும் டெல்லியில் உள்ள ஐந்து நட்சத்திர ஹோட்டல்களில் இந்திய உணவுப் பாதுகாப்பு மற்றும் தர நிர்ணய ஆணையம் (FSSAI) நடத்திய ஆய்வுகளுக்குப் பிறகு, உணவுப் பாதுகாப்பு மீது மீண்டும் கவனம் திரும்பியுள்ள நிலையில் இந்த நடவடிக்கை எடுக்கப்பட்டுள்ளது.

'அனலாக் பால் பொருட்கள்' (analogue dairy) கொண்டுள்ளதாக உணவகக் கூட்டாளர்களால் அறிவிக்கப்பட்ட உணவு வகைகள், உடனடியாகத் தளத்தில் இருந்து நீக்கப்பட்டுள்ளதாக ஜோமாட்டோ தெரிவித்துள்ளது.

இந்த விதிமுறைகளைத் தொடர்ந்து பின்பற்றாத உணவகக் கூட்டாளர்கள் தளத்தில் இருந்து நீக்கப்படுவார்கள் என்றும் ஜோமாட்டோ மேலும் குறிப்பிட்டுள்ளது.

திங்கள்கிழமை தனது தளத்தில் உள்ள வணிகர்களுக்கு அனுப்பிய சுற்றறிக்கையில்,

வாடிக்கையாளர்களுக்கு வழங்கப்படும் உணவுப் பொருட்கள் அதிலுள்ள மூலப்பொருட்களைத் துல்லியமாகக் குறிப்பிடுவதாகவும், பாதுகாப்பானதாகவும், எதிர்பார்க்கப்படும் தர அளவீடுகளைப் பூர்த்தி செய்வதாகவும் இருப்பதை உறுதி செய்வதே எங்களின் முன்னுரிமையாகும். அதன்படி, எங்கள் தளத்தில் அனலாக் சீஸ், அனலாக் பனீர் மற்றும் பிற அனலாக் பால் பொருட்கள் அடங்கிய உணவு வகைகளைப் பட்டியலிடுவதிலும் வழங்குவதிலும் நாங்கள் பூஜ்ஜிய சகிப்புத்தன்மைக் கொள்கையைச் செயல்படுத்துகிறோம்," என்று தெரிவித்துள்ளது.

உணவுப் பாதுகாப்பு மற்றும் ஒழுங்குமுறைத் தேவைகளுக்கு ஏற்ப, வாடிக்கையாளர்களுக்கான வெளிப்படைத்தன்மை மற்றும் உணவின் தரத்தை மேம்படுத்துவதற்காகவே இந்த முயற்சி மேற்கொள்ளப்பட்டு வருவதாக அந்த உணவு விநியோக நிறுவனம் தெரிவித்துள்ளது.

"தங்கள் மெனுவில் அனலாக் சீஸ், அனலாக் பனீர் அல்லது பிற அனலாக் பால் பொருட்களைப் பயன்படுத்துவதாக ஏற்கனவே அறிவித்துள்ள உணவகங்களின் அத்தகைய உணவுப் பொருட்கள் தளத்திலிருந்து உடனடியாக முடக்கப்படும்," என்றுஜோமாட்டோ கூறியுள்ளது.

இயற்கையான பால் பொருட்களுக்கு மாறுவது; உடனடியாக மாறுவது சாத்தியமில்லாத பட்சத்தில் அனலாக் பால் பொருட்கள் அடங்கிய உணவுகளை மெனுவிலிருந்து அகற்றுவது; மேலும், ஜோமாட்டோவில் பட்டியலிடப்பட்ட பொருட்கள் துல்லியமாக இருப்பதை உறுதி செய்யவும், பயன்படுத்தப்படும் மூலப்பொருட்களைச் சரிபார்க்கவும் சப்ளையர்கள் வழங்கும் தயாரிப்பு லேபிள்கள் மற்றும் மூலப்பொருள் அறிவிப்புகளை மதிப்பாய்வு செய்வது போன்ற உடனடி நடவடிக்கைகளை எடுக்குமாறு உணவகக் கூட்டாளர்களை சொமேட்டோ வலியுறுத்தியுள்ளது.