ಗಂಭೀರ ಸ್ಥಿತಿಯಲ್ಲಿರುವ ರೋಗಿಗಳ ರಕ್ಷಣೆಗೆ ವಾಯುಗಾಮಿ ಪೊಡ್ಗಳನ್ನು ಅಭಿವೃದ್ಧಿಪಡಿಸಿದ ಭಾರತೀಯ ವಾಯು ಸೇನೆ
ಎತ್ತರದ, ದೂರದ ಪ್ರದೇಶಗಳಲ್ಲಿ ತೀವ್ರ ಆರೋಗ್ಯ ಸಮಸ್ಯೆಯಿಂದ ಬಳಲುತ್ತಿರುವ ರೋಗಿಗಳನ್ನು ಸ್ಥಳಾಂತರಿಸಿ ರಕ್ಷಿಸಲು ಭಾರತೀಯ ವಾಯು ಸೇನೆ ಕೇವಲ 60 ಸಾವಿರ ರೂ. ಖರ್ಚಿನಲ್ಲಿ ವಾಯುಗಾಮಿ ಪೊಡ್ಗಳನ್ನು ತಾನೇ ವಿನ್ಯಾಸಗೊಳಿಸಿ, ಅಭಿವೃದ್ಧಿಪಡಿಸಿ, ಸೇವೆಗೆ ನಿಯೋಜಿಸಿದೆ.
ದೇಶದಲ್ಲಿ ಕೊರೊನಾವೈರಸ್ ಪ್ರಕರಣಗಳು ಏರಿಕೆಯಾಗುತ್ತಿರುವ ಬೆನ್ನಲ್ಲೆ ಭಾರತೀಯ ವಾಯು ಸೇನೆ ಹೊಸ ಆವಿಷ್ಕಾರದೊಂದಿಗೆ ಗಂಬೀರ ಪರಿಸ್ಥಿತಿಯಲ್ಲಿರುವ ರೋಗಿಗಳಿಗೆ ಮತ್ತು ಸೋಂಕಿತರಿಗೆ ಸಹಾಯಮಾಡಲು ಸಜ್ಜಾಗಿದೆ. ವೈದ್ಯಕೀಯ ತುರ್ತು ಸಮಯದಲ್ಲಿ ಇಂತಹ ರೋಗಿಗಳನ್ನು ಪ್ರತ್ಯೇಕವಾದ ದೂರದ ಪ್ರದೇಶಗಳಿಂದ ಸ್ಥಳಾಂತರಿಸಲು ಭಾರತೀಯ ವಾಯು ಸೇನೆ ವಾಯುಗಾಮಿ ಪೊಡ್(ಎಆರ್ಪಿಐಟಿಎಸ್) ಅನ್ನು ವಿನ್ಯಾಸಗೊಳಿಸಿ, ಅಭಿವೃದ್ಧಿಪಡಿಸಿದೆ.
ಪೊಡ್ನ ಮೂಲ ಮಾದರಿಯನ್ನು ಚಂದೀಗಡದ ಭಾರತೀಯ ವಾಯು ಸೇನೆಯ ನಿರ್ವಹಣಾ ಕಮಾಂಡ್ 3 ಬೇಸ್ ರಿಪೇರ್ ಡಿಪೊ ಸಿದ್ಧಪಡಿಸಿತ್ತು. ಕೊರೊನಾವನ್ನು ಜಾಗತಿಕ ಪಿಡುಗು ಎಂದು ವಿಶ್ವ ಆರೋಗ್ಯ ಸಂಸ್ಥೆ ಘೋಷಿಸಿದಾಗ ಸೇನೆಯ ಸಿಬ್ಬಂದಿಗಳು ರೋಗಿಗಳನ್ನು ವಿಶೇಷವಾಗಿ ಕೊರೊನಾ ಸೋಂಕಿತರನ್ನು ಸ್ಥಳಾಂತರಿಸಲು ವಾಯುಗಾಮಿ ಪೊಡ್ಗಳು(ಎಆರ್ಪಿಐಟಿಎಸ್) ತೀರಾ ಅವಶ್ಯವಾಗಿವೆಯೆಂದು ಅರಿತರು.
ಪ್ರಸ್ತುತವಾಗಿ ಸೇನೆ 7 ಎಆರ್ಪಿಐಟಿಎಸ್ಗಳನ್ನು ಸೇವೆಗೆ ನಿಯೋಜಿಸುತ್ತಿದೆ.
“ಈ ವ್ಯವಸ್ಥೆಯನ್ನು ವಾಯುಯಾನ ಪ್ರಮಾಣೀಕೃತ ವಸ್ತುಗಳಿಂದ ಅಭಿವೃದ್ಧಿಪಡಿಸಲಾಗಿದೆ. ಇದು ರೋಗಿಗಳ ಗೋಚರತೆಗಾಗಿ ಪಾರದರ್ಶಕ ಮತ್ತು ಬಾಳಿಕೆ ಬರುವ ಎರಕಹೊಯ್ದ ಪರ್ಸ್ಪೆಕ್ಸ್ ಅನ್ನು ಹೊಂದಿದೆ, ಇದು ಅಸ್ತಿತ್ವದಲ್ಲಿರುವ ಮಾದರಿಗಳಿಗಿಂತ ದೊಡ್ಡದಾಗಿದೆ ಮತ್ತು ಅಗಲವಾಗಿದೆ,” ಎಂದು ರಕ್ಷಣಾ ಸಚಿವಾಲಯದ ಪತ್ರಿಕಾ ಪ್ರಕಟಣೆ ತಿಳಿಸಿದೆ.
ಪೊಡ್ ರಚಿಸಲು ಐಎಎಫ್ ಸ್ಥಳೀಯ ವಸ್ತುಗಳನ್ನು ಬಳಸಿದೆ ಮತ್ತು ಉತ್ಪನ್ನದ ಒಟ್ಟು ವೆಚ್ಚ ಕೇವಲ 60,000 ರೂ ಆಗಿದೆ. ಆಮದು ಮಾಡಿಕೊಳ್ಳುವ 60 ಲಕ್ಷ ರೂ. ಯಷ್ಟು ಬೆಲೆಬಾಳುವ ವ್ಯವಸ್ಥೆಗಳೊಂದಿಗೆ ಹೋಲಿಸಿದರೆ ಇದು ಹೆಚ್ಚು ಸಮಂಜಸವಾಗಿದೆ ಎಂದು ಹೇಳಲಾಗುತ್ತದೆ.
ಚಿತ್ರಕೃಪೆ: ಇಂಡಿಯನ್ ಎಕ್ಸ್ಪ್ರೆಸ್
ಎಆರ್ಪಿಐಟಿಎಸ್ ಹೆಚ್ಚಿನ ದಕ್ಷತೆ ಹೊಂದಿರುವ ಎಚ್-19 ಫಿಲ್ಟರ್ಗಳನ್ನು ಹೊಂದಿದೆ ಮತ್ತು ಟ್ರಾನ್ಸ್ಪೊರ್ಟ್ ವೆಂಟಿಲೇಟರ್ ಬಳಸಿ ಇನ್ವಾಸಿವ್ ವೆಂಟಿಲೇಷನ್ ಅನ್ನು ಬೆಂಬಲಿಸುತ್ತದೆ. ಪ್ರತ್ಯೇಕ ವ್ಯವಸ್ಥೆಯು ವಾಯು ವಿನಿಮಯ, ವೈದ್ಯಕೀಯ ಮೇಲ್ವಿಚಾರಣಾ ಉಪಕರಣಗಳು, ಜೀವ ಬೆಂಬಲ ಸಾಧನಗಳನ್ನು ಒಳಗೊಂಡಿರುತ್ತದೆ ಮತ್ತು ರೋಗಿಗೆ ವಾತಾಯನವನ್ನು ಒದಗಿಸುತ್ತದೆ.
ಎಲ್ಲಾ ವಿನ್ಯಾಸ ಅಗತ್ಯತೆಗಳು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯ, ಆಸ್ಪತ್ರೆಗಳು ಮತ್ತು ಆರೋಗ್ಯ ಪೂರೈಕೆದಾರರ ರಾಷ್ಟ್ರೀಯ ಮಾನ್ಯತೆ ಮಂಡಳಿ ಮತ್ತು ಅಮೇರಿಕದ ರೋಗ ನಿಯಂತ್ರಣ ಕೇಂದ್ರ (ಸಿಡಿಸಿ) ಹೊರಡಿಸಿದ ಮಾರ್ಗಸೂಚಿಗಳನ್ನು ಆಧರಿಸಿವೆ.
ಹೆಚ್ಚುವರಿಯಾಗಿ, ಸಾರಿಗೆ ಸಮಯದಲ್ಲಿ ಆರೋಗ್ಯ ಕಾರ್ಯಕರ್ತರು, ವಾಯು ಸಿಬ್ಬಂದಿ ಮತ್ತು ನೆಲದ ಸಿಬ್ಬಂದಿಗೆ ವೈರಸ್ ಹರಡುವ ಅಪಾಯವನ್ನು ತಡೆಗಟ್ಟಲು ಇದು ಸ್ಥಿರವಾಗಿ ಸಹಾಯಮಾಡುತ್ತದೆ ಎಂದು ದಿ ಟ್ರಿಬ್ಯೂನ್ ವರದಿ ಮಾಡಿದೆ.