‘மேக்னஸ் கார்ல்சன் எந்த காயை நகர்த்துவார்’ - ஏ.ஐ. உதவியுடன் டிஜிட்டல் செஸ் விளையாட்டு!
மெய்நிகர் மேடைகள் முதல், செஸ் இஞ்சின்கள், பயிற்சி மென்பொருள்கள் என செஸ் விளையாட்டில் ஏ.ஐ நுட்பம் பெரும் தாக்கத்தை ஏற்படுத்தி, ஆர்வலர்கள் மற்றும் இளம் வீரர்களுக்கு உதவி வருகிறது.
நீங்கள் ஆன்லைனில் செஸ் விளையாடுவதாக கற்பனை செய்து கொள்ளுங்கள். இப்போது நீங்கள் ஒரு நகர்வை மேற்கொள்ளும் போது, செஸ் சாம்பியன் மேக்னஸ் கார்ல்சன் எப்படி காய்களை நகர்த்தி இருப்பார் என்று சொல்லப்பட்டால் எப்படி இருக்கும்? இதையடுத்து, நீங்கள் பதில் நகர்வுக்கு யோசிக்க வேண்டியிருக்கும். இதை படிக்க சுவாரஸ்யமாக இருக்கிறதா?
இது போன்ற சேவையை அளிப்பதில் தான், சென்னையில் நடைபெறும் 44வது FIDE செஸ் ஒலிம்பியாட் டிஜிட்டல் பங்குதாரரான டெக் மகிந்திரா நிறுவனம் ஈடுபட்டிருக்கிறது. செஸ் வீரர்கள், ஆர்வலர்கள் மற்றும் ரசிகர்களுக்கான மெய்நிகர் டிஜிட்டல் செஸ் அனுபவத்தை அளிப்பதற்கான செயற்கை நுண்ணறிவு சார்ந்த சேவையை இந்நிறுவனம் உருவாக்கி வருகிறது.
இந்த மேடை, உங்கள் நகர்வு சரியா? இல்லையா என்பதையும், அடுத்த நகர்வு எப்படி இருக்க வேண்டும் என்பதையும் சொல்லும் திறன் கொண்டிருக்கும்.
வழக்கமாக செஸ் ஆடும் போது ஏற்படும் உணர்வை டிஜிட்டல் மேடையில் விளையாடும் போதும் பெறலாம் என்பதால், செஸ் விளையாட்டு செயற்கை நுண்ணறிவு (A.i) சார்ந்த மாதிரிக்கு ஏற்றது என்கிறார் டெக் மகிந்திரா நிறுவனத்தின் வளர்ச்சி தலைவர் மற்றும் சி.எஸ்.ஒ ஜெகதீஷ் மித்ரா.
ஏ.ஐ சார்ந்த மேடையை வருங்காலத்தில் அறிமுகம் செய்ய இருப்பதாக நிறுவனம் தெரிவிக்கிறது. இதற்காக உலகின் முன்னணி 100 செஸ் வீரர்களின் விளையாட்டை நிறுவனம் ஆய்வு செய்து வருகிறது.
“இயந்திரக் கற்றல் மூலமாக விளையாட்டு நகர்வுகளை ஆய்வு செய்வதன் வாயிலாக இது சாத்தியமாகும். இது இளம் வீரர்கள் முற்றிலும் புதிய விதமாக இந்த விளையாட்டை அணுக உதவும்,” என்கிறார் ஜெகதீஷ்.
நிறுவனம் செஸ் விளையாட்டு சார்ந்த கேமிங் சமூகத்தை உருவாக்கி, அனுபவங்களை பகிர வழி செய்யவும் திட்டமிட்டுள்ளது.
செஸ் ஒலிம்பியாட் நிகழ்வுடன் தொடர்பு கொண்டுள்ளதன் ஒரு பகுதியாக, டெக் மகிந்திரா நிறுவனம், ரசிகர்கள் தொடர்புக்கான FanNxt.Now எனும் டிஜிட்டல் செயலியை அறிமுகம் செய்துள்ளது.
இதன் வாயிலாக, ரசிகர்கள், விருப்பங்கள், அபிமான வீரர்கள் போன்றவற்றை நிறுவனம் அறிய திட்டமிட்டுள்ளது. பயனர்கள் பழக்கங்கள், மற்றும் எதிர்கால வாய்ப்புகளை இது அலச உதவும். எதிர்காலத்தில் மெட்டாவர்ஸ் சார்ந்த வாய்ப்புகளை பயன்படுத்திக்கொள்ளவும், ஹோலோகிராம் சார்ந்த செஸ் பலகையை அளிக்கவும் திட்டமிட்டுள்ளது.
அடுத்த தலைமுறை செஸ் தொழிநுட்பம் தொடர்பாக ஆலோசனை வழங்க, இந்திய செஸ் ஜாம்பவான் விஸ்வநாதன் ஆனந்தும் டெக் மகிந்திராவுடன் இணைந்துள்ளது. ஆனந்த் ஏற்கனவே செஸ் விளையாட்டில் ஏ.ஐ பற்றி பேசியிருக்கிறார்.
ஸ்டார்ட் அப்’களில் Artificial Intelligence
ஏ.ஐ நுட்பம் ஸ்டார்ட் அப் நிறுவனங்களையும் ஈர்த்திருக்கிறது. அமெரிக்காவிலும் செயல்பாடுகளைக் கொண்ட, மும்பையைச்சேர்ந்த Square Off, ஏஐ திறன் கொண்ட செஸ் பலகைகளை வழங்குகிறது. இது தானியங்கி நகர்வுகளைக் கொண்டது. மடித்து சுருட்டக்கூடிவை வடிவத்தையும் கொண்டுள்ளது.
ஒரு முனையில் பயனர் விளையாடும் போது, மறுமுனையில் செயலி உதவியோடு தானாக நகர்வுகள் நிகழும். பயனர்கள் தங்கள் விளையாட்டுத்திறன் மற்றும் முன்னேற்றத்தை உடனுக்குடன அலசி ஆராய்ந்து புரிந்து கொள்ள முடியும், என்கிறார் Square Off இணை நிறுவனர் மற்றும் சி.டி.ஓ அத்தூர் மேத்தா.
இந்நிறுவனம் அண்மையில் இந்தியாவில் (ரூ.10,000 முதல் ரூ.35,000) தனது தயாரிப்பை அறிமுகம் செய்தது. விரைவில் அதிகாரப்பூர்வமாக அறிமுகக் செய்ய உள்ளது. அமெரிக்கா மற்றும் ஐரோப்பாவிலும் அறிமுகம் செய்யப்பட்டுள்ளது.
“இந்த பலகைகளுக்கு நல்ல தேவை உள்ளது, குறிப்பாக கோவிட் சூழலுக்கு பிறகு தேவை அதிகரித்துள்ளது என்கிறார் அத்தூர்.
தற்போதுள்ள செஸ் பலகையுடன் இணைந்து செயல்படக்கூடிய ஏ.ஐ மற்றும் எம்.எல் சார்ந்த பயிற்சி மென்பொருளை அறிமுகம் செய்யவும் நிறுவனம் திட்டமிட்டுள்ளது. எம்.பி.எல் மற்றும் ஸ்டார்பிக் போன்ற விளையாட்டுகளின் பின்னே உள்ள சென்னையைச்சேர்ந்த விளையாட்டு தொழில்நுட்ப நிறுவனம் செஸ் விளையாட்டை சுற்றியுள்ள பரபரப்பை விரும்புகிறது.
செஸ் விளையாட்டை Gamefication ஆக்குவது எதிர்காலத்தில் நிகழலாம் என்கிறார் இதன் இணை நிறுவனர் மற்றும் சி.இ.ஓ ஆண்டோ பினிஷ் கஸ்பர்.
“மற்ற விளையாட்டுக்காக உள்ள அதே இஞ்சினை செஸ் கற்றுத்தரவும் பயன்படுத்தலாம். கற்பனை விளையாட்டை எப்படி ஆடியிருக்க வேண்டும் என ஏ.ஐ ஆலோசனைகள் வழங்கும்,” என்கிறார்.
சர்வதேச சூழல்
அண்மையில், ரஷ்யாவில் செஸ் விளையாடும் ரோபாவால் சிறுவனின் கை உடைந்த நிகழ்வு கவலை அளிப்பதாக அமைந்தாலும், ஏ.ஐ செஸ் விளையாட்டின் எதிர்காலத்தில் முக்கியப் பங்கு வகிப்பதை மறுக்க முடியாது.
செஸ் விளையாட்டில் ஏ.ஐ நுட்பம் புதியது அல்ல. 1997ல், செஸ் ராஜா கேரி காஸ்பரேவை ஏ.ஐ திறன் கொண்ட டீப் புளு கம்ப்யூட்டர் தோற்கடித்த நிகழ்வு பெரும் பரபரப்பை உண்டாக்கியது. இன்று செஸ் விளையாட்டு அலசி ஆராயப்படும் விதத்தை ஏ.ஐ வழிநடத்துகிறது. பல கிராண்ட்மாஸ்டர்கள் தங்கள் மற்றும் போட்டியாளர்கள் விளையாட்டை ஆய்வு செய்ய ஏ.ஐ நுட்பத்தை பயன்படுத்துகின்றனர்.
கூகுளால் கையகப்படுத்தப்பட்ட டீப் மைண்ட் நிறுவனம் உருவாக்கிய ஆல்பா ஜீரோ புரோகிராம் செஸ் விளையாட்டில் பெரும் திறன் பெற்றுள்ளது. மைக்ரோசாப்டின் Maia, இந்த விளையாட்டின் மனித முகத்தை காட்டுகிறது. இது மனித நகர்வுகளில் இருந்து கற்றுக்கொண்டு, மனிதர்கள் போல நகர்வுகளை மேற்கொள்கிறது.
ஆங்கிலத்தில்: ஸ்வேதா கண்ணன் | தமிழில்: சைபர் சிம்மன்
