1,627 கோடியில் 12,525 கிராமங்களை இணைக்கும் ஆப்டிகல் ஃபைபர் கேபிள் திட்டங்களின் சிறப்பம்சம் என்ன?

தமிழ்நாட்டில் ரூ.1,627.83 கோடி மதிப்பீட்டிலான ’பாரத்நெட்’ திட்டத்தை செயல்படுத்தும் விதமாக கன்னியாகுமரி மாவட்டம், முத்தலகுறிச்சி கிராமப் பஞ்சாயத்தில் கண்ணாடி இழை கம்பி வடம் (ஆப்டிகல் ஃபைபர் கேபிள்) பதிக்கும் பணியினை முதல்வர் மு.க.ஸ்டாலின் இன்று தொடங்கிவைத்துள்ளார்.

’பாரத்நெட்’ திட்டம் என்பது, தமிழ்நாட்டில் உள்ள 12,525 கிராமப் பஞ்சாயத்துகளையும் "கண்ணாடி இழை கம்பி வடம்" (ஆப்டிகல் ஃபைபர் கேபிள்) மூலம் இணைத்து, அதிவேக அலைக்கற்றை வழங்கும் திட்டமாகும். இத்திட்டம் தமிழக அரசின் ’தமிழ்நாடு கண்ணாடி இழை வலையமைப்பு நிறுவனம் (TANFINET)’ என்ற சிறப்பு நோக்கு நிறுவனம் வாயிலாக செயல்படுத்தப்படுகிறது.

தமிழக அரசு இத்திட்டத்தை தொடங்குவதன் நோக்கம் 12,525 கிராமங்களை 1 Gbps அளவிலான அலைக்கற்றை மூலமாக இணைப்பதே ஆகும்.

ஆப்டிகல் ஃபைபர் கேபிள் பதிக்கும் பணி தொடக்கம்:

’பாரத்நெட்’ என்ற தமிழ்நாட்டில் உள்ள 12,525 கிராமப் பஞ்சாயத்துகளையும் ’கண்ணாடி இழை கம்பி வடம்’ (ஆப்டிகல் ஃபைபர் கேபிள்) மூலம் இணைய வசதி வழங்கும் இந்த திட்டத்தை முதல்வர் மு.க.ஸ்டாலின் காணொலி காட்சி வாயிலாக இன்று திறந்துவைத்துள்ளார்.

கன்னியாகுமரி மாவட்டம் தக்கலை ஊராட்சியில் உள்ள முத்தலக்குறிச்சி கிராமப் பகுதியில் ஆப்டிகல் ஃபைபர் கேபிள் அமைக்கும் பணியை முதலமைச்சர் மு.க. ஸ்டாலின் சென்னை தலைமை செயலகத்தில் இருந்து தொடங்கி வைத்தார். இந்நிகழ்ச்சியில், தகவல் தொழில்நுட்பவியல் துறை அமைச்சர் த.மனோ தங்கராஜ். தலைமைச் செயலாளர் இறையன்பு. தகவல் தொழில்நுட்பவியல் துறை முதன்மைச் செயலாளர் நீபஜ் மித்தல், தமிழ்நாடு கண்ணாடி இழை வலையமைப்பு நிறுவனத்தின் மேலாண்மை இயக்குநர் கே. கமல் கிஷோர், முதன்மை தொழில்நுட்ப அலுவலர் திரு எ.ராபர்ட் ஜெரார்ட் ரவி உள்ளிட்டோர் பங்கேற்றனர்.

நான்கு தொகுப்புகளாக பிரிப்பு:

"பாரத்நெட்" திட்டம் மூலமாக 1 Gbps அளவிலான அலைக்கற்றைகளைக் கொண்டு 12,525 கிராமங்களை இணைக்கும் இத்திட்டம் நான்கு (A, B, C & D) தொகுப்புகளாக பிரிக்கப்பட்டுள்ளது.

தொகுப்பு A ல் காஞ்சிபுரம், திருவள்ளூர், வேலூர் கிருஷ்ணகிரி, செங்கல்பட்டு, சென்னை (NOC), இராணிப்பேட்டை, திருப்பத்தூர். திருவண்ணாமலை ஆகிய மாவட்டங்களும், தொகுப்பு B-ல் கடலூர், அரியலூர், பெரம்பலூர், தர்மபுரி, கள்ளக்குறிச்சி, சேலம், ஈரோடு, நீலகிரி, விழுப்புரம் ஆகிய மாவட்டங்களும், தொகுப்பு C-ல் நாகப்பட்டினம், தஞ்சாவூர், திருவாரூர், புதுக்கோட்டை, நாமக்கல், கரூர், கோயம்பத்தூர், திருப்பூர், திருச்சிராப்பள்ளி, மயிலாடுதுறை ஆகிய மாவட்டங்களும், தொகுப்பு D-ல் கன்னியாகுமரி, மதுரை, இராமநாதபுரம், தேனி, தூத்துக்குடி, திருநெல்வேலி, விருதுநகர், தென்காசி, திண்டுக்கல், சிவகங்கை ஆகிய மாவட்டங்களிலும் செயல்படவுள்ளது.

ஆப்டிகல் ஃபைபர் கேபிள் திட்டத்தின் பயன்கள்:

• இத்திட்டத்தின் மூலம் பொதுமக்களுக்கு குறைந்த விலையில் மின்னணு (டிஜிட்டல்) சேவைகள், இணையவழி கல்வி (e-Education), தொலை மருத்துவம் (Tele Medicine), இணையதள இணைப்பின் மூலம் வழங்கப்படும் சேவைகளான Triple Play Services (தொலைபேசி, தொலைக்காட்சி & இணையம்) ஆகியவற்றை வழங்க இயலும்.

• அரசு அலுவலகங்கள், பள்ளிகள், கல்லூரிகள் மற்றும் தொழில் நிறுவனங்கள், அதிவேக இணையதள சேவையினைப் பெறுவதன் மூலம் கிராம அளவில் அரசின் பல்வேறு திட்டங்கள் மக்களை விரைந்து சென்றடையும்.

• புதிய வேலைவாய்ப்புகளை உருவாக்கி ஊரக பொருளாதார நிலை மேன்மையடையவும் வழி வகுக்கும்.

• தமிழகத்தின் அனைத்து கிராமப் பஞ்சாயத்துகளும் பாதுகாப்பான மற்றும் விரைவான இணைய சேவைகளைப் கிராமப்புறங்களுக்கு இடையேயான இடைவெளியைக் குறைக்கவும் உதவும்.

ALSO READ

கழிவுநீர்த் தொட்டிகளை சுத்தம் செய்ய ரோபோ வந்தாச்சு - தமிழகத்தில் பயன்படுத்த ஐஐடி திட்டம்!