டாக்டர் தம்பதியின் ‘அனைவருக்குமான இல்லம்’ - இங்கு எவரும் வரலாம் சாப்பிடலாம், படிக்கலாம், தங்கலாம்...
ஹைதராபாத்தைச் சேர்ந்த டாக்டர் சூர்யபிரகாஷ் தன் மனைவியுடன் நடத்தி வரும் 'அந்தரி இல்லு’ தினமும் காலை 5.30 மணி முதல் இரவு 1 மணி வரை மக்கள் பயன்பாட்டிற்காக திறந்துள்ளது.
ஹைதராபாத்தில் வசிக்கும் டாக்டர் ஒருவர் தற்போது தலைப்புச் செய்திகளில் இடம்பிடித்திருக்கிறார். இவர் மக்கள் பயன்பாட்டிற்காக திறந்தவெளி இல்லம் ஒன்றை நிர்வகித்து வருகிறார்.
டாக்டர் சூர்யபிரகாஷிற்கு 56 வயதாகிறது. இவர் தனது மனைவி டாக்டர் பரமேஷ்வரியுடன் ஹைதராபாத்தில் வசித்து வருகிறார். இவர் மக்கள் பயன்படுத்தும் வகையில் இல்லம் ஒன்றை நடத்துகிறார்.
![டாக்டர் ஜோடி](https://images.yourstory.com/cs/18/7be5482008d911e9bb473d9d98ed1e05/Doctorcouple-1645601028364.png?fm=png&auto=format)
இந்த இல்லத்துக்கு வருபவர்கள் இங்கு அமர்ந்து படிக்கலாம், சாப்பிடலாம், ஓய்வெடுக்கலாம். தங்கள் விருப்பம் போல் இருந்துகொள்ளலாம். பரிச்சியமில்லாத நபர்களை வீட்டிற்குள் சேர்க்க தயக்கம் காட்டும் மக்களுக்கு மத்தியில் இப்படி ஒரு உன்னத மனிதரா என மக்கள் வியந்து வருகின்றனர்.
சூர்யபிரகாஷ் மற்றும் அவரது மனைவி தொடங்கியிருக்கும் இந்த இல்லத்திற்கு ‘அனைவருக்குமான இல்லம்’ (அந்தரி இல்லு) எனப் பெயர். இந்த இல்லம் காலை 5.30 மணி முதல் இரவு 1 மணி வரை திறந்திருக்கும். இந்த இல்லம் ஹைதராபாத் நகரின் கொத்தாபேட் பகுதியில் அமைந்துள்ளது.
![1](https://images.yourstory.com/cs/18/a52e212008d911e9bb473d9d98ed1e05/openhouse-1645503825011.png?fm=png&auto=format)
தேர்வு எழுத இந்தப் பகுதிக்கு வரும் மாணவர்கள், உணவும் உடையும் தேடி வருபவர்கள் என பலர் இங்கு தஞ்சமடைகின்றனர். சாதி, மதம், இனம் என எந்தவித பாகுபாடுமின்றி அனைவருக்கும் சமமாக உதவி வழங்கப்படுகிறது.
தன்னைச் சுற்றியிருப்பவர்கள் பசியுடன் இருக்கக்கூடாது என்பது டாக்டர் சூர்யபிரகாஷின் விருப்பம். இங்கு வருபவர்களின் வயிற்றுப் பசிக்கு மட்டுமல்லாது அறிவுப்பசிக்கும் தீனி போடுகிறார் இந்த மருத்துவர்.
ஆம்! திறந்தவெளியில் அமைக்கப்பட்டுள்ள இந்த இல்லத்தின் சமையல் செய்து கொள்ள வசதி, இருபுறமும் புத்தக அலமாரிகள் வைக்கப்பட்டுள்ளன. இங்கு வருபவர்கள் தாங்களே சமைத்து சாப்பிடலாம். அவர்கள் சமைத்து சாப்பிடத் தேவையான அரிசி, காய்கறி, கேஸ் போன்றவற்றை டாக்டர் சூர்யபிரகாஷ் கொடுத்துவிடுகிறார்.
![open house](https://images.yourstory.com/cs/18/7be5482008d911e9bb473d9d98ed1e05/Openhouse-1645601189138.png?fm=png&auto=format&w=800)
இந்த இல்லம் அனைவருக்காகவும் வெயில், மழை என எல்லா நேரங்களிலும் திறந்திருக்கின்றன. கொரோனா சமயத்திலும் இது திறந்திருந்ததால் பலருக்கும் பேருதவியாக இருந்துள்ளது.
கிட்டத்தட்ட 38 ஆண்டுகளாக சமூக சேவையில் ஈடுபட்டு வரும் டாக்டர் சூர்யபிரகாஷ் இதை வணிக நோக்குடன் செய்யவில்லை. சமூக சேவைக்காக வாழ்க்கையையே அர்ப்பணித்துள்ள இந்த மருத்துவர் யாரிடமும் நன்கொடை பெற்றுக்கொள்வதில்லை என்பது குறிப்பிடத்தக்கது.
தமிழில்: ஸ்ரீவித்யா