ஆஸி. ஓபன் டென்னிசில் அசத்திய திருப்பூர் டி-சர்ட்ஸ்!
ஆஸ்திரேலிய ஓபன் டென்னிஸ் போட்டியில் கலக்கிய இந்த திருப்பூர் டி-சர்ட்டுகள் எதிலிருந்து செய்யப்பட்டது தெரியுமா?
இயற்கை சார்ந்த வாழ்க்கை வாழ்வதற்காக, மனிதன் செயற்கையாக வசதிக்காகவும் ஆடம்பரமாகவும் உருவாக்கிய பொருட்களின் பயன்பாடுகள் அண்மைக் காலங்களாக குறைந்த வருகின்றன. அவற்றில் முக்கியமானது பிளாஸ்டிக் என்னும் அழியாத அரக்கன்.
எளிதில் வேலை முடிந்துவிடும் என்பதால் பிளாஸ்டிக் பயன்பாடு என்பது சர்வசாதாரணமாகிவிட்டது. பூக்கடையில் தொடங்கி மளிகை சாமான்கள், சாப்பாடு பார்சல் என எல்லாவற்றிலும் புகுந்து விட்ட பிளாஸ்டிக், பயன்படுத்தியப் பிறகு தூக்கி வீசப்பட்டு அவை மண்ணில் மக்காமல் மரம், செடி வளர முடியாமல் பூமியை மலடாக்குகிறது.
பிளாஸ்டிக்கிற்கு எதிரான குரல்கள் உலகம் முழுவதும் எதிரொலிக்கும் நிலையில் மெல்பர்ன் பூங்காவில் நடந்து முடிந்த ஆஸ்திரேலிய ஓபன் டென்னிஸ் போட்டியும் தனது பங்களிப்பை அளித்துள்ளது.
![Tshirts](https://images.yourstory.com/cs/18/7be5482008d911e9bb473d9d98ed1e05/TirupurTshirts-1581313590827.png?fm=png&auto=format)
பட உதவி: Simplicity
நடப்பு ஆண்டின் போட்டியில், ‘டென்னிஸ் ஆஸ்திரேலியா’ அமைப்பானது, போட்டி முழுவதும் சுற்றுச் சூழலுக்கு உகந்த வகையில் நடத்துவதற்குத் தீர்மானம் செய்திருந்தது. அதன் அடிப்படையில் டென்னிஸ் போட்டிகளில், முழுவதிலும் வித்தியாசமான ஒரு முயற்சியாக, ஆஸ்திரேலிய டென்னிஸ் ஆடுகளத்தில் இருக்கின்ற போட்டியினை நிர்வகிக்கும் குழுவினர்கள், போட்டியின் புள்ளி விபர அலுவலர்கள், போட்டியின், ஆடுகளத்தில் பந்துகளை எடுக்கின்ற, சிறுவர்கள் மற்றும் சிறுமிகள் போன்றவர்களுக்கு வழங்கப்படுகின்ற ஆடைகளை சுற்றுச்சூழலுக்கு மாசு ஏற்படுத்தாத வகையில் தயாரிக்கப்பட்ட ஆடைகளை மட்டுமே வழங்க தீர்மானித்தது.
![Tiruppur tshirts](https://images.yourstory.com/cs/18/7be5482008d911e9bb473d9d98ed1e05/TiruppurTennis-1581312751122.png?fm=png&auto=format)
பட உதவி: The hindu and Simplicity
சுமாராக 4 லட்சம் பிளாஸ்டிக் பாட்டில்கள் குவியல் குவியலாக வைக்கப்பட்டிருந்தால் அவை சுற்றுச்சூழலுக்கு எந்த அளவிற்கு மாசு ஏற்படுத்தி இருக்கும். ஆனால் பின்னலாடை நகரமான திருப்பூர் மாவட்டம் முதலியார்பாளையத்தில் அமைந்துள்ள என்.சி.ஜான் & சன்ஸ் நிறுவனம் வேறு விதமாக யோசித்துள்ளது.
சுற்றுச்சூழலுக்கு மாசு ஏற்படுத்தாத ஆடைகள் தேவை என்று டென்னிஸ் ஆஸ்திரேலியா அமைப்பு என்.சி.ஜான் & சன்ஸ் நிறுவனத்தை நாட, சுற்றுச் சூழலுக்கு நன்மை பயக்கின்ற வகையிலான ஒரு தயாரிப்பை உருவாக்கி அசத்தி இருக்கின்றனர்.
திருப்பூரின் சிறு தொழில் வளர்ச்சி கழகத்தின் வளாகத்தில் அமைந்திருக்கின்ற ஒரு சிறிய அலுவலகத்தில் செயல்பட்டு வருகின்ற என் சி ஜான் & சன்ஸ் நிறுவனமானது, 100% மறு சுழற்சி செய்யப்பட பாலியெஸ்டர் ரகத்திலான ஆடைகளை, மொத்தமாக 4 லட்சம் பிளாஸ்டிக் பாட்டில்களை வைத்து 25,000 ஆடைகளை உற்பத்தி செய்து டென்னிஸ் போட்டிக்காக வழங்கி இருக்கிறது. ஒவ்வொரு டி-சர்ட்டிலும் எத்தனை பிளாஸ்டிக் பாட்டில்கள் மறுசுழற்சி செய்யப்பட்டிருக்கிறது என்பதும் அச்சடிக்கப்பட்டிருக்கிறது.
![aus open](https://images.yourstory.com/cs/18/a52e212008d911e9bb473d9d98ed1e05/Image83o2-1581269602194.jpg?fm=png&auto=format)
பட உதவி: Simplicity
இது எப்படி சாத்தியமானது என்று அந்நிறுவனத்தின் பொது மேலாளர் சத்யா கூறுகையில், “டென்னிஸ் அமைப்பானது சுற்றுச்சூழலுக்கு உகந்த ஆடைகளை உற்பத்தி செய்யுமாறு எங்களை அணுகியது. எனவே நாங்கள் மறு சுழற்சி செய்யப்பட பாலியெஸ்டர் நூலிழையின் மூலமாக ஆடைகளை வடிவமைக்க முடிவு செய்தோம். பிளாஸ்டிக் பாட்டில்களில் இருந்து பாலியெஸ்டர் நூலிழை உற்பத்தி செய்யும் சான்றிதழ் பெற்ற நிறுவனத்தை அணுகி அவர்களிடம் இருந்து நூலை பெற்றோம்.
மறுசுழற்சி செய்யப்பட்ட, பாலியெஸ்டர் நூழிலையில் சூரத்திலிருக்கும் ஒரு நிறுவனத்தின் மூலமாக சாயம் ஏற்றப்பட்டது. மேலும், எங்களது நிறுவனத்தின் 100 தையல் கலைஞர்கள் ஒன்று சேர்ந்து நீலம், வெள்ளை, பச்சை ஆகிய நிறங்களில் டி.சர்ட்கள் இன்னும் பல்வேறு ஆடை ரகங்களையும் உற்பத்தி செய்ததாக தெரிவிக்கிறார் சத்யா.
மேலும் இந்த ஆடை தயாரிப்புக்காக ஜான் & சன்ஸ் நிறுவனம், முற்றிலும் சூர்ய சக்தி மின்சாரத்திலேயே உருவாக்கப்பட்டிருக்கிறது.
சுமார் 4 லட்சம் பிளாஸ்டிக் பாட்டில்கள் 25,000 ஆடைகளாக மாற்றப்பட்டு ஆஸ்திரேலியாவிற்கு ஏற்றுமதி செய்யப்பட்டுள்ளது. ஆஸ்திரேலிய ஓபன் டென்னிஸ் பணியாளர்கள் அணிந்திருந்த இந்த பளிச் நிற மாசில்லாத ஆடைகள் அனைவரது கவனத்தையும் ஈர்த்ததோடு, திருப்பூர் பின்னலாடை நிறுவனத்திற்கு பாராட்டுகளையும் குவித்துள்ளது.
![டி சர்ட்கள்](https://images.yourstory.com/cs/18/7be5482008d911e9bb473d9d98ed1e05/Image2p9b-1581312873985.jpg?fm=png&auto=format&w=800)
படஉதவி : தி இந்து
என் சி ஜான் & சான்ஸ் நிறுவனம் 2007-ம் ஆண்டு முதல் சுற்றுசூழலுக்கு மாசு ஏற்படுத்தாத ஆடை ரகங்களை தயாரித்து வருகிறது. தற்போது 90 % இயற்கைக்கு உகந்த தயாரிப்பாக இருக்கின்ற இந்த ஆடை வடிவமைப்பானது, முற்றிலும் 100 % இயற்கைக்கு உகந்த அளவில் உருவாக்க திட்டமிட்டு செயல்பட்டு வருகிறது.
கட்டுரையாளர் : கஜலெட்சுமி மகாலிங்கம்