Chandrayaan-2 நிலவின் சுற்றுவட்டப் பாதைக்குள் வெற்றிகரமாக செலுத்தப்பட்டது!

'சந்திராயன் 2' விண்கலத்தை நிலவின் சுற்றுவட்டப் பாதைக்குள் வெற்றிகரமாக செலுத்தி இஸ்ரோ விஞ்ஞானிகள் சாதனைப் படைத்துள்ளனர்.

கடந்த மாதம் (ஜூலை) 22ம் தேதி நிலவின் தென் துருவத்தில் இறங்கி ஆய்வு செய்வதற்காக சந்திராயன் 2 விண்கலத்தை விண்ணில் செலுத்தியது இஸ்ரோ. ஜி.எஸ்.எல்.வி. மார்க் 3 ராக்கெட் மூலம் ஏவப்பட்ட அந்த விண்கலம் இன்று காலை 9 மணி அளவில் வெற்றிகரமாக சுற்றுவட்டப் பாதைக்குள் செலுத்தப்பட்டது என்று அதிகாரப்பூர்வமாக அறிவிக்கப்பட்டுள்ளது.

இது குறித்து செய்தியாளர்களிடம் பேசிய இஸ்ரோ தலைவர் கே.சிவன்,

”சந்திராயன்-2 பயணம் மிகப்பெரிய மைல் கல்லை இன்று கடந்து, இலக்கிற்கு அருகில் சென்றுவிட்டது. இன்று காலை 9 மணி அளவில் சுமார் 30 நிமிடங்களில் நிலவின் வட்டப் பாதைக்குள் சந்திராயன் 2 செலுத்தப்பட்டது. இந்த செயல்பாடு நிகழும் போது சற்று பதற்றமும், பரபரப்பும் இருந்தது,” என தெரிவித்தார்.

கடந்த புதன் கிழமை அதிகாலை 2.21 மணி அளவில் புவி வட்டப் பாதையில் இருந்து சந்திரயன் 2 இஸ்ரோ விஞ்ஞானிகள் வெளியேற்றினர். புவி வட்டப் பாதையில் இருந்து விடுபட்ட சந்திரயான் 2 நிலவை நோக்கிய தனது பயணத்தைத் தொடங்கியது. நிலவில் இருந்து குறைந்தபட்சமாக 114 கிலோ மீட்டர், அதிகப்பட்சமாக 18 ஆயிரத்து 72 கிலோ மீட்டர் தொலைவில் அமைந்த சுற்றுவட்டப் பாதையில் சந்திரயன் 2 செலுத்தப்பட்டுள்ளது.

ALSO READ

விண்ணில் சீறிப்பாய்ந்த 'Chandrayaan- 2'- மகிழ்ச்சியில் இந்தியா! பயணத்தில் அடுத்து என்ன நடக்கப் ...

பூமியில் இருந்து செலுத்தப்பட்டு 28 நாட்களுக்குப் பிறகு, தற்போது நிலவின் நீள்வட்டப் பாதையை செயற்கைக்கோள் அடைந்த நிலையில், வரும் செப்டம்பர் 2 ஆம் தேதி சந்திராயன் 2-ல் உள்ள விக்ரம் லேன்டர் பிரிந்து உள்நுழையும் என இஸ்ரோ தெரிவித்துள்ளது.

“விக்ரம் லேன்டர் பிரிந்த பிறகு செப் 3 ஆம் தேதி அதன் அசைவு சரியாக உள்ளதா என்பதை சோதிக்க 3 நொடி செயல்பாடு மேற்கொள்ளப்படும். அதன்பிறகு, செப்டம்பர் 7 ஆம் தேதி அதிகாலையில் பிரிக்கப்பட்ட விக்ரம் லேன்டர் நிலவில் தரையிறங்கும்,” என்றார்.

தற்போது வரை விண்கலத்தின் அனைத்து கருவிகளும் மிகச்சரியாக வேலை செய்து கொண்டிருப்பதாக இஸ்ரோ விஞ்ஞானிகள் கூறியுள்ளனர். பெங்களூரில் உள்ள திட்டச் செயல்பாடுகளுக்கான வளாகத்தில் இருந்து சந்திராயன் 2 தொடர்ந்து கண்காணிக்கப்பட்டு வருவதாகவும் விஞ்ஞானிகள் தெரிவித்துள்ளனர்.

இந்த வெற்றியை இஸ்ரோ மற்றும் இந்தியா முழுவதும் கொண்டாடி வருகின்றனர்.

தகவல் உதவி: ANI

ALSO READ

Chandrayaan-1, 2 வெற்றிக்குப் பின் இருந்த இரு தமிழர்கள்!