ஓலா எலெக்ட்ரிக் ஸ்கூட்டர்களுக்கு எகிறும் டிமாண்ட்- 34% சந்தைப் பங்கை எட்டியது!

பாவிஷ் அகர்வால் தலைமையிலான ஓலா எலெக்ட்ரிக் நிறுவனம் அக்டோபர் 14ம் தேதி வரை தனது இருசக்கர வாகனங்களுக்கு 15,672 புதிய பதிவுகளைப் பெற்றுள்ளது. ஓலா இதன் மூலம் இப்போது மின்சார இரு சக்கர வாகனப் பிரிவில் 34% சந்தைப் பங்கைக் கொண்டுள்ளது.

இந்த வளர்ச்சியானது அதன் S1 ஸ்கூட்டருக்கான தேவை அதிகரிப்பு மற்றும் அதன் விரிவடைந்து வரும் சேவை நெட்வொர்க் ஆகியவற்றின் விளைவே என்று நிறுவனம் அறிக்கை ஒன்றில் தெரிவித்துள்ளது.

இரண்டாம் மற்றும் மூன்றாம் அடுக்கு நகரங்களில் மின்சார வாகன விற்பனையை அதிகரிக்கவும் விற்பனைக்குப் பிந்தைய மற்றும் உரிமையாளர் அனுபவத்தை மேம்படுத்தவும் ஓலா எலெக்ட்ரிக் கடந்த சில வாரங்களாக தொடர் முயற்சிகளை மேற்கொண்டுள்ளது.

தனது வாடிக்கையாளர்களுக்கு விற்பனைக்குப் பிந்தையத் தொழில்நுட்பம் சார்ந்த சேவையை வழங்க #HyperService பிரச்சாரத்தைத் தொடங்கியது. இந்த முன்முயற்சியின் ஒரு பகுதியாக, ஓலா எலெக்ட்ரிக் தனது நிறுவனத்திற்கு சொந்தமான சேவை வலையமைப்பை 2024 டிசம்பரில் 1,000 மையங்களாக இரட்டிப்பாக்குவதன் மூலம் அதன் சேவை உள்கட்டமைப்பை விரிவுபடுத்த திட்டமிட்டுள்ளது.

Ola Electric அதன் நெட்வொர்க் கூட்டாண்மைத் திட்டத்தின் ஒரு பகுதியாக 2025 ஆம் ஆண்டின் இறுதிக்குள் விற்பனை மற்றும் சேவை முழுவதும் 10,000 கூட்டாளிகளை இணைக்க திட்டமிட்டுள்ளது. மூன்றாம் தரப்பு மெக்கானிக்குகளாக ஒரு லட்சம் பேரை மின் வாகன மெக்கானிக் வேலைக்குப் பயிற்றுவிப்பதற்கான EV சேவை பயிற்சி திட்டத்தையும் நிறுவனம் அறிவித்துள்ளது.

சமீபத்தில் தனது S1 போர்ட்ஃபோலியோவை வெளியிட்டது, வெவ்வேறு விலை புள்ளிகளில் ஆறு மாடல்களை வழங்குகிறது. பிரீமியம் பிரிவில் எஸ்1 ப்ரோ மற்றும் எஸ்1 ஏர் ஆகியவை முறையே ரூ.1,34,999 மற்றும் ரூ.1,07,499 விலையில் உள்ளன. வெகுஜன சந்தைக்கு, S1 X வரிசையானது 2 kWh, 3 kWh மற்றும் 4 kWh பேட்டரி திறன் கொண்ட மூன்று வகைகளை உள்ளடக்கியது, இதன் விலை முறையே ரூ.74,999, ரூ.87,999 மற்றும் ரூ.101,999 என ஓலா தன் அறிக்கையில் தெரிவித்துள்ளது.

ஓலா எலக்ட்ரிக் தனது ரோட்ஸ்டர் மோட்டார்சைக்கிள் தொடரை அறிமுகப்படுத்துவதாகவும் அறிவித்தது. புதிய தொடரில் ரோட்ஸ்டர் X (2.5 kWh, 3.5 kWh, 4.5 kWh), ரோட்ஸ்டர் (3.5 kWh, 4.5 kWh, 6 kWh) மற்றும் ரோட்ஸ்டர் ப்ரோ (8 kWh, 16 kWh) ஆகியவை அடங்கும். ரோட்ஸ்டர் எக்ஸ் விலை ரூ.74,999, ரோட்ஸ்டர் ரூ.1,04,999 மற்றும் ரோட்ஸ்டர் ப்ரோ ரூ.1,99,999.