‘தீபாவளி பரிசு’ - ஆபீஸ் பாய் முதற்கொண்டு 12 ஊழியர்களுக்கு கார் பரிசளித்த ஹரியானா நிறுவனம்!
பெரும் கார்ப்பரேட் நிறுவனங்கள் பணிச்சுமை மற்றும் பணிநீக்கம் போன்ற அழுத்தங்களை ஊழியர்களுக்கு கொடுத்து வரும் நிலையில், ஹரியானாவைச் சேர்ந்த நிறுவனம் ஒன்று தனது ஊழியர்களுக்கு தீபாவளி பரிசாக கார் கொடுத்து அசத்தியுள்ளது.
பெரும் கார்ப்பரேட் நிறுவனங்கள் பணிச்சுமை மற்றும் பணிநீக்கம் போன்ற அழுத்தங்களை ஊழியர்களுக்கு கொடுத்து வரும் நிலையில், ஹரியானாவைச் சேர்ந்த நிறுவனம் ஒன்று தனது ஊழியர்களுக்கு தீபாவளி பரிசாக கார் கொடுத்து அசத்தியுள்ளது.
ஃபார்மா நிறுவனம் கொடுத்த பரிசு:
ஹரியானாவில் உள்ள ஒரு நிறுவனம் தனது ஊழியர்களுக்கு அற்புதமான பரிசை அறிவித்துள்ளது. தீபாவளியை முன்னிட்டு ஊழியர்களுக்கு கார்களை பரிசாக அளித்தது அவர்களை வியப்பில் ஆழ்த்தியுள்ளது. அந்த நிறுவனத்திற்காக நேர்மை மற்றும் விசுவாசத்தை பாராட்டும் விதமாக 12 ஸ்டார் ஊழியர்களுக்கு இந்த பரிசு அறிவிக்கப்பட்டுள்ளது.
இதில் ஸ்பெஷலான விஷயம் என்னவென்றால், 12 ஊழியர்களில் ஒரு ஆபீஸ் பாயும் அடக்கம். தன்னிடம் வேலை பார்க்கும் ஊழியர்களிடையே எவ்வித பாகுபாடும் பார்க்காமல், பரிசளித்துள்ள உரிமையாளர்களுக்கு பாராட்டுக்கள் குவிந்து வருகிறது,
12 பேருக்கு கார் பரிசு:
ஹரியானா மாநிலம் பஞ்ச்குலாவில் உள்ள “மிட்ஸ் ஹெல்த் கேர்” என்ற ஃபார்மா நிறுவனம் செயல்பட்டு வருகிறது. அந்நிறுவனத்தின் உரிமையாளர் எம்.கே.பாட்டியா தனது நிறுவனத்தில் பணிபுரியும் ஊழியர்களில் 12 பேரை ஸ்டார் ஊழியர்களாக தேர்வு செய்து கார்களை பரிசாக வழங்கியுள்ளார்.
இதில் ஆச்சர்யமான விஷயம் என்னவென்றால் தீபாவளி பரிசாக கார்களை வாங்கிய பலருக்கும் கார் ஓட்டவே தெரியாதாம். தங்களது நிறுவனம் இப்படியொரு எதிர்பாராத பரிசு கொடுத்ததை எண்ணி மகிழ்ச்சியில் திக்குமுக்காடி போயுள்ளனர்.
மேலும், நிறுவனத்தில் பணிபுரியும் 38 ஊழியர்களுக்கும் கார் பரிசு வழங்க ஃபார்மா நிறுவனம் திட்டமிட்டுள்ளது. இதுகுறித்து மிட்ஸ் ஹெல்த் கேர் எம்.டி. எம்.கே பாட்டியா கூறுகையில்,
“ஊழியர்களின் கடின உழைப்பு, அர்ப்பணிப்பு மற்றும் விசுவாசமே தனது நிறுவனத்தின் வெற்றிக்குக் காரணம். அதனால் தான் அவர்களை பிரமாண்டமாக கவுரவிக்க முடிவு செய்தேன்,” என்கிறார்.
கார் பரிசு பெற்ற 12 பேர்களில் சிலர் நிறுவனம் தொடங்கப்பட்டதில் இருந்தே அதன் வளர்ச்சிக்காக பல்வேறு வகைகளில் பாடுபட்டு வருகின்றனர். எனவே, இந்த கார் வெறும் தீபாவளி பரிசு அல்ல என்றும், தங்கள் நிறுவனத்தின் மீதான அவர்களின் நம்பிக்கை மற்றும் அர்ப்பணிப்புக்கான வெகுமதி என்றும் பாட்டியா தெரிவித்துள்ளார்.
வைரல் வீடியோ:
தீபாவளி பண்டிகையை முன்னிட்டு சுமார் 12 ஸ்டார் ஊழியர்களுக்கு கடந்த மாதமே எம்.கே.பாட்டியா கார்களை பரிசாக வழங்கியுள்ளார். ஒவ்வொருவருக்கும் சுமார் 6 லட்சம் மதிப்புள்ள டாடா பஞ்ச் காரின் 2021 மாடல் பரிசாக வழங்கப்பட்டுள்ளது. அடுத்ததாக 38 பேருக்கு கார்களை பரிசளிக்கும் நடவடிக்கையிலும் நிறுவனம் ஈடுபடவுள்ளது.
இதுதொடர்பான வீடியோ தற்போது இணையத்தில் வைரலானதை அடுத்து, ஊழியர்களுக்கு கார் பரிசளித்த உரிமையாளருக்கு பாராட்டுக்கள் குவிந்து வருவதோடு, பலரது கவனத்தையும் ஈர்த்துள்ளது.
தீபாவளி பரிசாக கார், பைக் - ஊழியர்களுக்கு சர்ப்ரைஸ் தந்த சென்னை நகைக்கடை அதிபர்!
