‘இப்படியொரு பெற்றோரிடம் வளர்ந்தது எங்களின் அதிர்ஷ்டம்’ - இன்ஃபோசிஸ் வாரிசு ரோஹன் மூர்த்தி உருக்கம்!
25 ஆண்டுகால சமூகப் பணிக்காக தனது தாயின் பத்ம பூஷண் விருதுக்கு வாழ்த்து தெரிவிக்கும் வகையில், சுதா மூர்த்தியின் மகன் ரோஹன் மூர்த்தி தனது லிங்க்ட்இன் பக்கத்தில் பதிவிட்டுள்ள உருக்கமான பதிவு வைரலாகி வருகிறது.
25 ஆண்டுகால சமூகப் பணிக்காக தனது தாயின் பத்ம பூஷன் விருதுக்கு வாழ்த்து தெரிவிக்கும் வகையில், சுதா மூர்த்தியின் மகன் ரோஹன் மூர்த்தி தனது லிங்க்ட்இன் பக்கத்தில் பதிவிட்டுள்ள உருக்கமான பதிவு வைரலாகி வருகிறது.
புகழ்பெற்ற கல்வியாளர், எழுத்தாளர், ஆசிரியர், சிந்தனையாளர், ஆய்வாளர், கதை சொல்லி, பரோபகாரி என பன்முகத்தன்மையுடையவரான சுதா மூர்த்தி சமூகத்திற்காக ஆற்றிய உயரிய சேவைகளுக்காக மத்திய அரசால் 2023ம் ஆண்டிற்கான பத்ம பூஷன் விருது பெற்றுள்ளார்.
இதற்கு முன்னதாக சுதா மூர்த்தியின் சமூக சேவையை பாராட்டி 2006ம் ஆண்டு மத்திய அரசு அவருக்கு பத்மஸ்ரீ விருது வழங்கியுள்ளது குறிப்பிடத்தக்கது.
இன்ஃபோசிஸ் அறக்கட்டளை:
1996 ஆம் ஆண்டு முதல் இன்ஃபோசிஸ் அறக்கட்டளையை நிர்வாகித்து வந்த சுதா மூர்த்தி, 2021 அறக்கட்டளை தலைவர் பதவியில் இருந்து ஓய்வு பெற்றார். அதுவரை பெண் கல்வி, ஆதரவற்ற குழந்தைகளுக்கான இல்லம், கர்நாடக மாநில கிராமப்புற வளர்ச்சி உள்ளிட்ட பல்வேறு சமூக சேவைகளை ஆற்றியுள்ளார்.
இன்ஃபோசிஸ் அறக்கட்டளையின் தலைவராக இருந்த சுதா மூர்த்தி, சுகாதாரம், கல்வி, கலை மற்றும் கலாச்சாரம், விலங்குகள் நலன் மற்றும் பெண்கள் அதிகாரமளித்தல் ஆகிய துறைகளில் 25 ஆண்டுகாலமாக ஆற்றிய சமூகப் பணிக்காக மத்திய அரசு பத்ம பூஷன் விருது வழங்கி கெளரவித்துள்ளது.
டெல்லியில் ஏப்ரல் 5ம் தேதி நடைபெற்ற விழாவில் குடியரசுத்தலைவர் திரெளபதி முர்மு சுதா மூர்த்திக்கு பத்ம பூஷன் விருது பெற்றார். இந்நிகழ்ச்சியில் அவரது கணவரும், இன்ஃபோசிஸ் நிறுவனருமான நாராயண மூர்த்தி, மகன் ரோஹன், மகள் அக்ஷதா ஆகியோர் பங்கேற்றனர்.
![sudha](https://images.yourstory.com/cs/18/536edf40e52011e9bc420fad7003cf62/hq720-1680931731588.jpg?fm=png&auto=format)
தனது தாயார் சுதா மூர்த்திக்கு, உயரிய சேவைக்கான பத்ம பூஷன் விருது வழங்கப்பட்டுள்ளது குறித்து அவரது மகன் ரோஹன் வெளியிட்டுள்ள லிங்க்ட்இன் பதிவு இணையத்தில் தாறுமாறு வைரலாகி வருகிறது.
ஒரு லிங்க்ட்இன் இடுகையில், அவரது மகன் ரோஹன், ஒரு தாயாக, ஆசிரியராக, எழுத்தாளர் மற்றும் சமூக சேவகியாக சுதாவின் கதையைப் பகிர்ந்துள்ளார்.
டெல்லியில் உள்ள ராஷ்டிரபதி பவனில் நடந்த #padmaawards2023 விழாவில் கலந்து கொள்ளும் வாய்ப்பு கிடைத்தது குறித்து, அதில் பல்வேறு பின்னணிகள், வாழ்க்கைக் கதைகள் மற்றும் சமூகத்திற்கான பங்களிப்புகளை உள்ளடக்கிய பலதரப்பட்ட நபர்களுக்கு இந்தியக் குடியரசுத் தலைவர் விருது வழங்கியதைக் கண்டு உணர்ச்சி வசப்பட்டதாகவும் ரோஹன் தெரிவித்துள்ளார்.
தனது தாயார் சுதா மூர்த்தி குறித்து கூறுகையில்,
“கடந்த 25 ஆண்டுகளாக சமூகப் பணியில் அவர் ஆற்றிய பணிக்காக எனது தாயார் சுதா மூர்த்திக்கு பத்ம பூஷன் விருது வழங்கப்பட்டது. 90களின் முற்பகுதியில் பெங்களூரில் உள்ள ஒரு சிறிய மகளிர் கல்லூரியில் என் அம்மா கணினி அறிவியல் கற்பித்தார். அந்த பணியை அவர் நேசித்த போதும், தன்னால் இதைவிட அதிகமாக செய்ய முடியும் என்பதை உணர்ந்திருந்தார். என் தந்தை அல்லது அவருடைய சக ஊழியர்களை விட திறமையானவள் என்பதை எனது தாயார் நன்கு அறிந்திருந்தார். அவருடைய இந்த ஆசை இறுதியில் இன்ஃபோசிஸ் அறக்கட்டளையை நிறுவி 25 ஆண்டுகள் வரை நடத்த உதவியது,” எனக்குறிப்பிட்டுள்ளார்.
தனது பள்ளிப்பருவத்தில் அவரது தாயார் எவ்வளவு பிசியாக சமூக சேவைகளில் தன்னை ஈடுபடுத்திக்கொண்டார் என்பது குறித்தும் ரோஹன் மெய்சிலிர்ப்புடன் விவரித்துள்ளார்.
![sudha](https://images.yourstory.com/cs/18/536edf40e52011e9bc420fad7003cf62/Rohan-Murty-with-His-Parents-and-1680931762967.jpg?fm=png&auto=format)
“நான் உயர்நிலைப் பள்ளியில் படிக்கும் போது, என் அம்மா கிட்டத்தட்ட வீட்டில் இருந்ததே இல்லை. வெள்ளம், நிலநடுக்கம், தொலை தூர காடுகளில் உள்ள பழங்குடியின மக்களுக்கு உதவுதல் போன்ற நிவாரணப் பணிகளில் தொடர்ந்து ஈடுபட்டு வந்தார். தன்னால் முடிந்தவர்களுக்கு உதவ வேண்டும் என்ற அவரது உயரிய எண்ணத்தை நான் பல சந்தர்ப்பங்களில் நேரடியாக பார்த்துள்ளேன்,” என பதிவிட்டுள்ளார்.
பெற்றோரிடம் இருந்து கற்றுக்கொண்டது என்ன?
சமூக சேவையாக மட்டுமின்றி எழுத்தாளராகவும் தனது தாயார் சிறந்து விளங்கியதை குறிப்பிட்டுள்ள ரோஹன், தனது பெற்றோரிடம் இருந்து தான் கற்றுக்கொண்ட விஷயங்களையும் விவரித்துள்ளார்.
“15 ஆண்டுகளுக்கு முன்பு என் தந்தை இன்ஃபோசிஸ் நிறுவனத்தை நிறுவி கட்டியெழுப்பியதற்காக பத்ம விபூஷன் விருதைப் பெற்றார். அப்போது அவரிடம், நானும் மற்றவர்களும் அவருடைய வாழ்க்கையிலிருந்து கற்றுக்கொள்ள வேண்டிய பாடம் என்ன எனக்கேட்டேன். அதற்கு அவர்,
“ஒருவருக்கு அதிக அதிர்ஷ்டம் மட்டும் இருந்தால், அது அவரது பிறப்பு, சூழ்நிலை என அனைத்தையும் கடந்து அவர்களின் தலைவிதியையே மாற்றக்கூடும்,” எனக்கூறியதை நினைவுகூர்ந்துள்ளார்.
![sudha murthy family](https://images.yourstory.com/cs/18/7be5482008d911e9bb473d9d98ed1e05/SudhaMurthyfamily-1680937830609.png?fm=png&auto=format)
நானும் எனது சகோதரியும் இப்படிப்பட்ட பெற்றோர்களிடம் இருந்து கற்றுக்கொள்ளக்கூடிய சூழ்நிலையில் வளர்ந்தது எங்களுடைய அதிர்ஷ்டம் என தனது நீண்ட, நெடிய பதிவை நிறைவு செய்துள்ளார்.
யார் இந்த சுதா மூர்த்தி?
சுதா மூர்த்தி ஆகஸ்ட் 19, 1950 அன்று இந்தியாவின் கர்நாடகாவில் உள்ள ஹாவேரியில் உள்ள ஷிகாவ்னில் பிறந்தார். மருத்துவரான ஆர். எச். குல்கர்னி மற்றும் கணித ஆசிரியையான விமலா குல்கர்னி தம்பதியின் மகளான இவர், பிவிபி பொறியியல் மற்றும் தொழில்நுட்பக் கல்லூரியில் எலக்ட்ரிக்கல் மற்றும் எலக்ட்ரானிக்ஸ் இன்ஜினியரிங் பட்டம் பெற்றவர். இந்திய அறிவியல் கழகத்தில் கணினி அறிவியலில் முதுகலை பட்டப்படிப்பில் தங்க பதக்கம் பெற்றுள்ளார்.
![sudha](https://images.yourstory.com/cs/18/536edf40e52011e9bc420fad7003cf62/maxresdefault-1680931806126.jpg?fm=png&auto=format&w=800)
1968ம் ஆண்டில் இன்ஜினியரிங் பட்டம் பெற்ற ஒரே பெண்மணி சுதா மூர்த்தி மட்டுமே. எனவே, வேலை கிடைப்பதில் கடுமையான பாலின சிக்கல்களை சந்தித்துள்ளார். TELCO-வில் உள்ள பாலின சமத்துவமின்மை குறித்து சுதா மூர்த்தி எழுதிய கடிதம், அவருக்கு வேலை கிடைக்க உதவியது. இந்தியாவின் மிகப்பெரிய வாகன உற்பத்தியாளரான டாட்டா இன்ஜினியரிங் மற்றும் லோகோமோட்டிவ் நிறுவனத்தில் பணியமர்த்தப்பட்ட முதல் பெண் பொறியாளர் என்பது குறிப்பிடத்தக்கது.
புனேவில் டெவலப்மென்ட் இன்ஜினியராக நியமிக்கப்பட்ட சுதா மூர்த்தி, பின்னர் மும்பை மற்றும் ஜாம்ஷெட்பூரில் பணிபுரிந்தார். அதன் பின்னர், புனேவில் உள்ள வால்சந்த் குழும தொழில் நிறுவனத்திலும் மூத்த சிஸ்டம்ஸ் அனலிஸ்ட்டாக பணியாற்றியுள்ளார்.
![sudha](https://images.yourstory.com/cs/18/536edf40e52011e9bc420fad7003cf62/murthy-family-collage-770x435-1680931824328.jpg?fm=png&auto=format)
புனேவில் உள்ள TELCO நிறுவனத்தில் இன்ஜினியராக பணியாற்றி வந்த என்.ஆர். நாராயண மூர்த்தியை சுதா மூர்த்தி திருமணம் செய்து கொண்டார். அதன் பின்னர், நாராயண மூர்த்தி, சுதா மூர்த்தியுடன் இணைந்து இன்ஃபோசிஸ் நிறுவனத்தை தொடங்கினார்.
தற்போது இந்தியாவிலேயே இரண்டாவது மிகப்பெரிய தகவல் தொழில்நுட்ப நிறுவனமாக இன்ஃபோசிஸ் உள்ளது. நாராயண மூர்த்தி - சுதா மூர்த்தி தம்பதிக்கு அக்ஷதா என்ற மகளும், ரோஹன் என்ற மகனும் உள்ளனர். அக்ஷதாவின் கணவர் தான் இங்கிலாந்து பிரதமர் ரிஷி சுனக் என்பது குறிப்பிடத்தக்கது.
![](https://images.yourstory.com/assets/images/alsoReadGroupIcon.png?fm=png&auto=format)