என்ன ஆனது விக்ரம் லேண்டர்? இன்று படமெடுக்கிறது நாசாவின் ஆர்பிட்டர்!
விக்ரம் லேண்டரின் நிலை என்ன? நாசாவின் எல்.ஆர் ஆர்பிட்டர் இன்று அதனை சந்திர பரப்பில் படம்பிடிக்கிறது. இந்தப் புகைப்படங்களை நாசா இஸ்ரோவுடன் பகிர்ந்து கொண்ட பின்னரே லேண்டரை செயல்படுத்த முடியுமா என்பது தெரிய வரும்.
சந்திராயன் -2 திட்டத்தில் ஆர்பிட்டரில் இருந்து பிரிந்து சென்று சந்திரனில் தரையிறங்க வேண்டிய விக்ரம் லேண்டர் நிலவின் மேற்பரப்பில் இறங்கும்போது இந்திய விண்வெளி ஆராய்ச்சி அமைப்புடனான தொடர்பை இழந்தது. லேண்டருடன் துண்டிக்கப்பட்ட சிக்னல்களை மீண்டும் கொண்டு வர இஸ்ரோ விஞ்ஞானிகள் தொடர்ந்து முயற்சித்து வருகின்றனர். லேண்டருடனான இணைப்பை இழந்து கிட்டத்தட்ட 10 நாட்கள் ஆகும் நிலையில் அதனுடனான தொடர்பை மீண்டும் நிறுவுவதற்கான நம்பிக்கை வேகமாக மறைந்து வருகிறது.
விக்ரம் லேண்டர் செப்டம்பர் 7 அதிகாலையில் நிலவில் தரையிறங்க முயற்சித்தபோது, அது சந்திர நாளின் தொடக்கமாகும். விக்ரமின் காலம் மற்றும் அதன் ரோவர் பிரக்யானின் பணியானது ஒரு சந்திர நாள் மட்டுமே. ஒரு சந்திர நாள் என்பது சுமார் 14 பூமி நாட்களுக்கு சமம். எனவே செப்டம்பர் 20-21 க்குள், சந்திரனின் ஒரு பகுதியில் இரவு சூழ்ந்துவிடும். தற்போது அதிலுள்ள சோலார் தகடுகள் சக்தியேற்றும் வகையில் அமைக்கப்பட்டுள்ளன. சூரிய ஒளி இல்லாமல் இருள் சூழ்ந்துவிட்டால் லேண்டர் முற்றிலுமாக செயலிழந்துவிடும்.
செப்டம்பர் 7ம் தேதி அதிகாலை 1:40 மணி வரை விக்ரம் லேண்டர் சந்திரனில் தரையிறங்க சரியாக பயணித்துக் கொண்டிருந்தது. சந்திராயன் -2 அதன் அணுகுமுறையை குறைக்கத் தொடங்கியதால் அதன் வேகத்தை வெகுவாகக் குறைத்தது. சுமார் 10 நிமிடங்களுக்குப் பிறகு, பெங்களூரில் உள்ள இஸ்ரோ கட்டளை மையம், லேண்டரின் முன்னேற்றத்தைக் கண்காணித்து வந்தது. விக்ரமில் ஏதோ தவறு நடந்துவிட்டது என்பது தெளிவாகத் தெரிந்ததால், அங்கு கூடியிருந்த விஞ்ஞானிகளின் முகங்கள் வெளிறிப் போனது.
அதிகாலை 2:18 மணியளவில், விக்ரம் உடனான தொடர்பு துண்டிக்கப்பட்டதாக இஸ்ரோ தலைவர் கே. சிவன் கட்டுப்பாட்டு அறையில் மைக் மூலம் அறிவிப்பை வெளியிட்டார். எனினும் மனம் தளராமல், விக்ரம் லேண்டருடன் தகவல்தொடர்புகளை மீண்டும் ஏற்படுத்த இந்திய விண்வெளி ஆராய்ச்சி அமைப்பு அனைத்து முயற்சிகளையும் மேற்கொண்டு வருகிறது. இருப்பினும், சந்திராயன் -2 சுற்றுப்பாதையில் சுழன்று கொண்டிருக்கும் ஆர்பிட்டரின் உதவியுடன் சந்திரனில் சாய்வலாக லேண்டர் ஹார்ட் லேண்டிங் செய்திருக்கிறது என்பதை மட்டுமே உறுதி செய்ய முடிந்தது.
இந்நிலையில் விக்ரமைத் தொடர்பு கொள்வதற்கான முயற்சிகளில் தற்போது இஸ்ரோவுடன் நாசாவும் கைகோர்த்துள்ளது. அமெரிக்க விண்வெளி நிறுவனமான தேசிய வானூர்தி மற்றும் விண்வெளி நிர்வாகம் (NASA) லேண்டருக்கு தகவல்களை அனுப்பி அதில் இருந்து பதிலுக்கு சிக்னல் கிடைக்கிறதா என்று பரிசோதித்தது. நாசா தனது டீப் ஸ்பேஸ் நெட்வொர்க்கையும் செயல்படுத்தியுள்ளது - உலகளாவிய ஆண்டெனாக்களின் நெட்வொர்க் விண்கலங்களுடன் தொடர்புகொள்வதற்கு பயன்படுத்தப்படுகிறது.
நாசாவின் டி.எஸ்.என் சந்திராயன் -2 லேண்டருக்கு சிக்னல்களை அனுப்பி வருகிறது. இருப்பினும், அந்த சமிக்ஞைகளுக்கு விக்ரம் பதிலளிக்கவில்லை. சந்திராயன்-2ல் நிலவைச் சுற்றி வரும் ஆர்பிட்டரைப் போல நாசாவின் லூனார் ரிகாய்ன்னெசன்ஸ் ஆர்பிட்டர் நிலவை சுற்றிக் கொண்டிருக்கிறது.
செப்டம்பர் 17ம் தேதி, அதாவது இன்று நாசாவின் எல்.ஆர்.ஓ சந்திரனில் விக்ரம் அமைந்துள்ள இடத்திற்கு மேலே பறக்க உள்ளது. விக்ரமின் தரையிறங்கும் தளத்தின் புகைப்படங்களை எடுக்க சந்திர சுற்றுப்பாதை முயற்சிக்கும் என்றும், அந்தப் புகைப்படங்கள் இஸ்ரோவுடன் பகிரப்படும் என்றும் விண்வெளி நிறுவனத்தின் செய்தித் தொடர்பாளர் தெரிவித்துள்ளார்.
விக்ரமுடன் மீண்டும் தொடர்பு கொள்ள இஸ்ரோவுக்கு இப்போது நான்கு நாட்கள் மட்டுமே உள்ளன. நாசாவின் ஆர்பிட்டர் கொடுக்கும் புகைப்படங்களுக்காக இஸ்ரோ விஞ்ஞானிகள் காத்திருந்து கொண்டிருக்கும் போதும் அதுவே போதுமானதாக இருக்காது என்றும் சொல்லப்படுகிறது.
நாசாவின் ஆர்பிட்டர் விக்ரம் இருக்கும் சந்திரனின் ஒரு பகுதியில் செல்லும் போது அது மாலை வேளையாக இருக்கக் கூடும் என்று கணிக்கப்படுகிறது. எனவே புகைப்படம் எந்த அளவிற்கு தெளிவாக இருக்கும் என்பதை உறுதியாகச் சொல்ல முடியாது. எனினும் கிடைக்கும் புகைப்படத்தை நாசா இஸ்ரோவுடன் பகிர்ந்து கொள்ளும் என்று நாசா அதிகாரி கூறியுள்ளார்.
சந்திராயன் -2 மிஷனுக்கு என்ன நடக்கிறது?
சந்திராயன் -2 பணி தற்போது சந்திரனைச் சுற்றிக் கொண்டிருக்கும் ஆர்பிட்டரால் 95 சதவிகிதம் வெற்றியடைந்துள்ளது. சந்திராயன் -2 சோதனைகளில் பெரும்பாலானவை அமைந்துள்ள இடமே சுற்றுப்பாதை தான். சந்திரனுக்கான பயணத்தில் விண்கலத்தால் செய்யப்பட்ட எரிபொருள் சேமிப்பு காரணமாக சந்திரயான் -2 சுற்றுப்பாதையின் பணி ஆயுளை ஒரு வருடம் முதல் ஏழு ஆண்டுகள் வரை இஸ்ரோவால் நீட்டிக்க முடியும்.
அடுத்த சில ஆண்டுகளில், சந்திரயான் 2 சுற்றுப்பாதை சந்திரனின் மேற்பரப்பை வரைபடமாக்கும், கனிமங்களுக்காக பகுப்பாய்வு செய்யும், சந்திரனின் வளிமண்டலத்தைப் படிக்கும் மற்றும் மிக முக்கியமாக, சந்திரனின் தென் துருவத்திற்கு அருகில் இருக்கும் பனிக்கட்டி நீரின் அளவை மதிப்பிடும்.
சந்திராயன் -2 மூலம் ஜிஎஸ்எல்வி மார்க் -3 ராக்கெட்டை இஸ்ரோ வெற்றிகரமாக சோதிக்க முடிந்தது. ஜி.எஸ்.எல்.வி எம்.கே.- III 'பாஹுபலி' ராக்கெட் சந்திராயன் -2 ஐ விண்வெளிக்கு கொண்டு சென்றது. ஜி.எஸ்.எல்.வி எம்.கே.-III இஸ்ரோவால் உருவாக்கப்பட்ட மிக சக்திவாய்ந்த ராக்கெட் ஆகும். இந்த விண்கலத்தில் மூன்று இந்தியர்களை விண்வெளிக்கு அனுப்பும் லட்சிய ககன்யான் திட்டத்திற்கு இதனை பயன்படுத்த இஸ்ரோ பயன்படுத்த முடியும்.
கட்டுரையாளர் : கஜலெட்சுமி
